Ezekiel

20 Iti maikapito a tawen, iti maika-10 nga aldaw ti maikalima a bulan, immay ti dadduma a panglakayen ti Israel ket nagtugawda iti sanguanak tapno agsaludsodda maipapan ken Jehova. 2 Iti kasta, kinuna manen kaniak ni Jehova: 3 “Anak ti tao, kasaritam dagiti panglakayen ti Israel, ket ibagam, ‘Daytoy ti kinuna ti Kangatuan* nga Apo Jehova: “Immaykayo kadi agsaludsod kaniak? ‘Ikarik, saankonto a sungbatan ti saludsodyo,’+ kuna ti sibibiag a Kangatuan nga Apo Jehova.”’

4 “Nakasaganaka kadi a mangukom kadakuada?* Nakasaganaka kadi a mangukom kadakuada, anak ti tao? Ipakaammom kadakuada dagiti dakes nga inaramid dagidi ammada.+ 5 Ibagam, ‘Daytoy ti kinuna ti Kangatuan nga Apo Jehova: “Iti daydi aldaw a pinilik ti Israel,+ nagkariak* met iti kaputotan* ti sangakabbalayan ni Jacob, ken inyam-ammok ti bagik kadakuada idiay Egipto.+ Wen, nagkariak kadakuada ket imbagak, ‘Siak ni Jehova a Diosyo.’ 6 Iti dayta nga aldaw, inkarik nga iruarko ida idiay Egipto ket ipanko ida iti daga a pinilik* para kadakuada, ti daga a pagay-ayusan ti gatas ken diro.+ Dayta idi ti kapintasan* iti amin a daga. 7 Sa imbagak, ‘Masapul nga ibelleng ti tunggal maysa kadakayo dagiti makarimon a banag a pagdaydayawanyo; diyo rugitan ti bagiyo kadagiti makarimon nga idolo* ti Egipto.+ Siak ni Jehova a Diosyo.’+

8 “‘“Ngem nagrebeldeda ken dida kayat ti dumngeg kaniak. Saanda a kayat nga ibelleng dagiti makarimon a banag a pagdaydayawanda, ken dida tinallikudan dagiti makarimon nga idolo ti Egipto.+ Isu nga inkarik nga ibukbokko ti pungtotko ken naan-anay nga ibulosko ti ungetko kadakuada idiay Egipto. 9 Ngem nagtignayak maigapu iti naganko tapno saan a maibabain dayta iti sanguanan dagiti nasion a pagnanaedanda.+ Ta impakaammok ti bagik kadakuada* iti sanguanan dagiti nasion a nangipanak kadakuada* idi inruarko ida idiay Egipto.+ 10 Isu nga inruarko ida idiay Egipto ket inturongko ida iti let-ang.+

11 “‘“Kalpasanna, intedko kadakuada dagiti paglintegak ken impakaammok dagiti pangngeddengko,+ tapno maaddaan iti biag ti tao a mangsurot kadagita.+ 12 Intedko met kadakuada dagiti sabbathko+ kas pagilasinan iti nagbaetanmi,+ tapno maammuanda a siak, ni Jehova, ti mamagbalin kadakuada a nasantuan.

13 “‘“Ngem nagrebelde kaniak ti sangakabbalayan ti Israel idiay let-ang.+ Saanda a sinurot dagiti paglintegak, ken linaksidda dagiti pangngeddengko, a no suroten ti maysa a tao, maaddaanto iti biag. Imbabainda dagiti sabbathko. Isu nga inkarik nga ibukbokko ti pungtotko kadakuada idiay let-ang tapno maibusda.+ 14 Ngem nagtignayak maigapu iti naganko tapno saan a maibabain dayta iti sanguanan dagiti nasion, a nakakita iti panangiruarko kadakuada.*+ 15 Inkarik met kadakuada idiay let-ang a saanko nga ipan ida iti daga nga intedko kadakuada+—ti daga a pagay-ayusan ti gatas ken diro,+ ti kapintasan* iti amin a daga— 16 ta linaksidda dagiti pangngeddengko, saanda a sinurot dagiti paglintegak, ken imbabainda dagiti sabbathko, ta sursuroten ti pusoda dagiti makarimon nga idoloda.+

17 “‘“Ngem naasianak* kadakuada, ket diak dinadael ida; saanko ida nga inibus idiay let-ang. 18 Imbagak kadagiti annakda idiay let-ang,+ ‘Saanyo a suroten dagiti regulasion dagidi ammayo+ wenno tungpalen dagiti pangngeddengda, ken dikay rugitan ti bagiyo kadagiti makarimon nga idoloda. 19 Siak ni Jehova a Diosyo. Surotenyo dagiti paglintegak, tungpalenyo dagiti pangngeddengko, ken aramidenyo dagita.+ 20 Ken ibilangyo a nasantuan dagiti sabbathko,+ ket agserbida a pagilasinan iti nagbaetantayo tapno maammuanyo a siak ni Jehova a Diosyo.’+

21 “‘“Ngem nagrebelde kaniak dagiti annak.+ Saanda a sinurot dagiti paglintegak, saanda a tinungpal ken inaramid dagiti pangngeddengko, a no suroten ti maysa a tao, maaddaanto iti biag. Imbabainda dagiti sabbathko. Isu nga inkarik nga ibukbokko ti pungtotko ken naan-anay nga ibulosko ti ungetko kadakuada idiay let-ang.+ 22 Ngem imbabawik dayta+ ket nagtignayak maigapu iti naganko,+ tapno saan a maibabain dayta iti sanguanan dagiti nasion, a nakakita iti panangiruarko kadakuada.* 23 Inkarik met kadakuada idiay let-ang nga iwarawarak ida kadagiti nasion ken nadumaduma a daga,+ 24 ta saanda a tinungpal dagiti pangngeddengko ken linaksidda dagiti paglintegak,+ imbabainda dagiti sabbathko, ken nagserbida* kadagiti makarimon nga idolo dagidi ammada.+ 25 Impalubosko pay a surotenda dagiti regulasion a saan a naimbag ken pangngeddeng a saan a makaited kadakuada iti biag.+ 26 Binay-ak a marugitanda kadagiti bukodda a daton—idi impalasatda iti apuy ti tunggal inauna nga anakda+—tapno agbalinda a nakakaasi, ket maammuandanto a siak ni Jehova.”’

27 “Isu a kasaritam ti sangakabbalayan ti Israel, O anak ti tao, ket ibagam, ‘Daytoy ti kinuna ti Kangatuan nga Apo Jehova: “Kastoy met laeng ti pananglais kaniak dagidi ammayo babaen ti saanda a panagmatalek kaniak. 28 Impanko ida iti daga nga inkarik nga ited kadakuada.+ Idi nakitada ti amin a nangato a turod ken narukbos a kayo,+ nangrugida a mangipaay kadagiti datonda ken kadagiti makaparurod a datonda. Impaayda ti makaay-ayo* a banglo dagiti datonda ken imbukbokda sadiay dagiti datonda nga inumen. 29 Isu nga insaludsodko, ‘Ania ti kayat a sawen daytoy nangato a disso a papananyo? (Maawagan pay laeng dayta iti Nangato a Disso agingga ita nga aldaw.)’”’+

30 “Ita, ibagam iti sangakabbalayan ti Israel, ‘Daytoy ti kinuna ti Kangatuan nga Apo Jehova: “Rugrugitanyo kadi ti bagiyo a kas iti inaramid dagidi ammayo babaen ti panagdayawyo* kadagiti makarimon nga idoloda?+ 31 Ken rugrugitanyo pay laeng kadi ti bagiyo agingga ita nga aldaw babaen ti panagdatonyo iti amin a makarimon nga idoloyo, nga ipalpalasatyo iti apuy dagiti annakyo?+ Rumbeng kadi a sungbatak ti saludsodyo, O sangakabbalayan ti Israel?”’+

“‘Ikarik a saankonto a sungbatan ti saludsodyo,’ kuna ti sibibiag a Kangatuan nga Apo Jehova.+ 32 Ket saanto a mapasamak ti pampanunotenyo* idi imbagayo, “Tuladentayo dagiti nasion, dagiti pamilia kadagiti sabali a daga, nga agdaydayaw* iti kayo ken bato.”’”+

33 “‘Ikarik,’ kuna ti sibibiag a Kangatuan nga Apo Jehova, ‘Iturayankayto kas ari babaen ti mannakabalin nga ima ken nabileg* a takiag, ken nakaro a pungtot.+ 34 Iruarkayto manipud kadagiti ili ken ummongenkayo manipud kadagiti daga a nakaiwarawaraanyo babaen ti mannakabalin nga ima ken nabileg a takiag, ken nakaro a pungtot.+ 35 Ipankayto iti let-ang ti tattao ken ukomenkayto sadiay iti rupanrupa.+

36 “‘No kasano nga inukomko dagidi ammayo iti let-ang idiay Egipto, ukomenkayto met,’ kuna ti Kangatuan nga Apo Jehova. 37 ‘Palasatenkayto iti sirok ti sarukod ti pastor+ ket makitulagakto kadakayo. 38 Ngem ikkatekto kadakayo dagiti rebelde ken dagidiay agbasbasol kaniak.+ Ta iruarkonto ida iti daga a pagnanaedanda kas ganggannaet, ngem saandanto a sumrek iti Israel;+ ket maammuanyonto a siak ni Jehova.’

39 “Daytoy ti imbaga kenka ti Kangatuan nga Apo Jehova, O sangakabbalayan ti Israel: ‘Mapan agserbi ti tunggal maysa kadakayo kadagiti makarimon nga idolona.+ Ngem no saankayto a dumngeg kaniak, saanyonton a maibabain ti nasantuan a naganko babaen kadagiti datonyo ken kadagiti makarimon nga idoloyo.’+

40 “‘Ta iti nasantuan a bantayko, iti nangato a bantay ti Israel,’+ kuna ti Kangatuan nga Apo Jehova, ‘ti pagserbianto kaniak ti intero a sangakabbalayan ti Israel.+ Maragsakanakto kadakuada sadiay, ken kiddawekto dagiti kontribusionyo ken umuna a bungbunga ti apityo kas daton, amin a nasantuan a bambanagyo.+ 41 Gapu iti makaay-ayo* a banglo, maragsakanakto kadakayo inton iruarkayo manipud kadagiti ili ken ummongenkayo kadagiti daga a nakaiwarawaraanyo;+ ket ipakitakto a nasantuanak iti tengngayo iti imatang dagiti nasion.’+

42 “‘Maammuanyonto a siak ni Jehova,+ inton ipankayo iti Israel,+ iti daga nga inkarik nga ited kadagidi ammayo. 43 Malagipyonto sadiay ti kababalin ken ti amin nga aramidyo a nangrugit iti bagiyo,+ ket kagurayonto ti bagiyo* gapu iti amin a dakes nga inaramidyo.+ 44 Iti kasta, maammuanyonto a siak ni Jehova inton pakilangenankayo maigapu iti naganko,+ saan a maitunos iti dakes a kababalinyo wenno dakes a pannakilangenyo, O sangakabbalayan ti Israel,’ kuna ti Kangatuan nga Apo Jehova.”

45 Kinuna manen kaniak ni Jehova: 46 “Anak ti tao, sumangoka iti abagatan ket agsaoka iti abagatan, ken agipadtoka iti bakir iti rehion iti abagatan. 47 Ibagam iti bakir ti abagatan, ‘Denggem ti sao ni Jehova. Daytoy ti kinuna ti Kangatuan nga Apo Jehova: “Mangpasgedak iti apuy maibusor kenka,+ ket uramennanto ti tunggal nalangto ken nagango a kayom. Saanto a maiddep ti apuy,+ ket mauramto ti amin a rupa, manipud abagatan agingga iti amianan. 48 Mabigbigto ti amin a tao* a siak, ni Jehova, ti nangpasged iti dayta, iti kasta saanto a maiddep.”’”+

49 Ket kinunak: “O Kangatuan nga Apo Jehova! Ibagbagada maipapan kaniak, ‘Saan kadi a burburtia* laeng ti ibagbagana?’”