Ti Maikadua a Cronicas

27 Agtawen ni Jotam+ iti 25 idi nagbalin nga ari, ket nagturay iti 16 a tawen idiay Jerusalem. Ti nanangna ket ni Jerusa nga anak ni Zadok.+ 2 Inar-aramidna ti umiso iti imatang ni Jehova, kas iti inaramid ni Uzias nga amana.+ Saanna nga impapilit ti simrek iti templo ni Jehova.+ Ngem nagar-aramid latta iti dakes dagiti umili. 3 Imbangonna ti makinngato a ruangan ti balay ni Jehova,+ ken adu ti imbangonna iti pader ti Ofel.+ 4 Nagbangon met kadagiti siudad+ iti kabambantayan ti Juda,+ ken nagbangon kadagiti napaderan a lugar+ ken torre+ kadagiti kabakiran. 5 Nakigubat iti ari dagiti Ammonita+ ket inabakna ida idi agangay, isu nga inikkan ida dagiti Ammonita iti dayta a tawen iti 100 a talento* a pirak, 10,000 a cor* a trigo, ken 10,000 a cor a sebada. Kasta met ti imbayad kenkuana dagiti Ammonita iti maikadua ken maikatlo a tawen.+ 6 Gapuna, bimmileg a bimmileg ni Jotam, ta determinado* a magna kadagiti dalan ni Jehova a Diosna.

7 Ti dadduma pay a pasamak iti pakasaritaan ni Jotam, ti amin a pannakilabanna ken ti amin nga inaramidna, ket naisurat iti Libro ti Ar-ari ti Israel ken ti Juda.+ 8 Agtawen iti 25 idi nagbalin nga ari, ket nagturay iti 16 a tawen idiay Jerusalem.+ 9 Naginana ni Jotam a kas kadagidi ammana, ket intabonda iti Siudad ni David.+ Ni Ahaz ti simmaruno nga ari.+