Exodo

29 “Kastoy ti aramidem tapno agbalinda a nasantuan nga agserbi kaniak kas papadi: Mangalaka iti maysa nga urbon a kalakian a baka, dua a nasalun-at a kalakian a karnero,+ 2 tinapay nga awan lebadurana, awan lebadurana a sinansingsing a tinapay a nalaokan iti lana, ken awan lebadurana a naingpis a tinapay a napulagidan iti lana.+ Agusarka iti napino nga arina ti trigo. 3 Ikabilmo dagiti tinapay iti maysa a basket+ ket idatonmo dagita agraman ti urbon a kalakian a baka ken ti dua a kalakian a karnero.

4 “Ipanmo ni Aaron ken dagiti annakna iti ruangan ti tolda a pagkonsultaan,+ ket ibilinmo nga agdigusda.+ 5 Kalpasanna, alaem dagiti bado+ ket ikawesmo ken Aaron ti nagayad a bado, ti awan manggasna a bado a maisuot nga umuna sakbay ti efod, ti efod, ken ti pektoral. Igalutmo a naimbag iti siketna ti naabel a sinturon* ti efod.+ 6 Ikabilmo ti espesial a turbante iti ulona ken igalutmo met iti espesial a turbante ti nasantuan a tanda ti dedikasion;*+ 7 sa alaem ti nasantuan a lana+ ken ibukbokmo iti ulona.+

8 “Iyasidegmo met dagiti annakna ken ikawesmo kadakuada dagiti nagayad a bado+ 9 ket igalutmo ti barikes ken ni Aaron ken kadagiti annakna, sa ikabilmo ti turbante iti uloda; ket agtultuloyto ti kinapadida. Permanente dayta a paglintegak.+ Kasta ti panangisaadmo ken Aaron ken kadagiti annakna kas papadi.*+

10 “Kalpasanna, ipanmo ti kalakian a baka iti sanguanan ti tolda a pagkonsultaan, ket iparabaw ni Aaron ken dagiti annakna ti imada iti ulo ti baka.+ 11 Partiem ti baka iti sanguanan ni Jehova, iti ruangan ti tolda a pagkonsultaan.+ 12 Mangalaka iti dara ti baka ket isawsawmo ti ramaymo sa ipulagidmo ti dara kadagiti sara ti altar.+ Ti natedda a dara ket ibukbokmo iti baba ti altar.+ 13 Ket alaem ti amin a taba+ a nangbalkut kadagiti lalaem, ti taba iti dalem, ken ti dua a bato* agraman ti balkutna a taba. Puoram dagita tapno agasukda iti altar.+ 14 Ngem ti lasag, kudil, ken takki ti baka ket puoram iti ruar ti kampo. Dayta ket daton gapu iti basol.

15 “Kalpasanna, alaem ti maysa a kalakian a karnero, ket iparabaw ni Aaron ken dagiti annakna ti imada iti ulo ti karnero.+ 16 Partiem dayta ken mangalaka iti darana sa iwarsim dayta iti amin a sikigan ti altar.+ 17 Rangrangkayem ti karnero, bugguam dagiti bagis+ ken sakana, ket urnosem dagiti paset ti bagina agingga iti ulona. 18 Masapul a puoram dayta a sibubukel tapno agasuk iti altar. Daton dayta a mapuoran para ken Jehova a makaay-ayo* ti banglona.+ Daton dayta a mapuoran para ken Jehova.

19 “Kalpasanna, alaem ti sabali pay a kalakian a karnero, ket iparabaw ni Aaron ken dagiti annakna ti imada iti ulo ti karnero.+ 20 Partiem dayta ket mangalaka iti darana ken ipulagidmo iti piditpidit ti makannawan a lapayag ni Aaron ken dagiti annakna ken iti tangan ti makannawan nga ima ken sakada. Iwarsim ti dara iti amin a sikigan ti altar. 21 Kalpasanna, mangalaka iti dara nga adda iti altar ken mangalaka iti nasantuan a lana.+ Mangiwarsika ken Aaron ken kadagiti annakna ken iti badoda tapno agbalinda a nasantuan agraman dagiti badoda.+

22 “Ket alaem ti taba ti kalakian a karnero, ti nataba nga ipus, ti taba a nangbalkut kadagiti bagis, ti taba ti dalem, ti dua a bato ken ti taba a nangbalkut kadagita,+ ken ti kannawan a luppo. Maidaton dayta bayat ti pannakaisaad ti agserbi kas padi.+ 23 Mangalaka met iti maysa a nagtimbukel a tinapay, maysa a sinansingsing a tinapay a nalaokan iti lana, ken naingpis a tinapay manipud iti basket a nakaikabilan dagiti tinapay nga awan lebadurana nga adda iti sanguanan ni Jehova. 24 Ipaiggemmo amin dagita ken Aaron ken kadagiti annakna. Ket masapul nga ingatom dagita sa ililim kas daton a mailili iti sanguanan ni Jehova. 25 Kalpasanna, alaem dagita kadakuada ket puoram iti altar, iti rabaw dagiti daton a mapuoran, kas makaay-ayo* a banglo iti imatang ni Jehova. Daton dayta a mapuoran para ken Jehova.

26 “Alaem ti barukong ti kalakian a karnero a maidaton bayat ti pannakaisaad ni Aaron kas padi,+ ket ingatom dagita sa ililim kas daton a mailili iti sanguanan ni Jehova, ket daytanto ti bingaymo. 27 Masapul a pagbalinem a nasantuan ti barukong a maipaay kas daton a mailili ken ti luppo ti sagrado a paset a nailili ken naala manipud iti kalakian a karnero a naidaton+ bayat ti pannakaisaad ni Aaron ken dagiti annakna kas papadi. 28 Agbalinto dagita a kukua ni Aaron ken dagiti annakna. Permanente dayta a paglintegak a masapul a tungpalen dagiti Israelita, ta sagrado dagita a paset, ken agbalinto a sagrado a paset nga ited dagiti Israelita.+ Ipaayda ken Jehova dagita a sagrado a paset no itedda ti daton a pakikappia.+

29 “Dagiti nasantuan a bado+ ni Aaron ket usarento dagiti annakna+ inton mabukbokan ti uloda iti nasantuan a lana tapno maisaadda kas papadi. 30 Pito nga aldaw+ nga ibado dagita ti padi nga anakna a sumukat kenkuana ken sumrek iti tolda a pagkonsultaan tapno agserbi iti nasantuan a disso.

31 “Alaem ti kalakian a karnero a maidaton bayat ti pannakaisaad ti agserbi kas padi ket ilutom ti karnena iti nasantuan a disso.+ 32 Kanento ni Aaron ken dagiti annakna+ ti karne ti kalakian a karnero ken ti tinapay iti basket nga adda iti ruangan ti tolda a pagkonsultaan. 33 Kanendanto dagiti naidaton bayat ti pannakaisaadda kas papadi* ken panagbalinda a nasantuan. Ngem saan a mabalin a mangan ti saan nga autorisado* gapu ta nasantuan dagita a banag.+ 34 No adda matedda kadagiti naidaton a tinapay wenno karne agingga iti bigat, masapul a puoram dagita.+ Saan a mabalin a kanen gapu ta nasantuan dagita.

35 “Kasta ti aramidem ken Aaron ken kadagiti annakna kas iti amin nga imbilinko kenka. Iti pito nga aldaw, isaadmo ida kas papadi.*+ 36 Tapno mapakawan dagiti basol, inaldaw a mangidatonka iti kalakian a baka kas daton gapu iti basol, ken pagbalinem a nasantuan ti altar babaen ti panangipaaymo iti kasta a daton, ken patedtedam ti altar iti nasantuan a lana tapno agbalin a nasantuan.+ 37 Pito nga aldaw nga agidatonka iti altar. Kasta ti aramidem tapno agbalin dayta a kasasantuan nga altar.+ Masapul a nasantuan ti asinoman a mangsagid iti altar.

38 “Daytoy ti kanayon ken inaldaw+ nga idatonmonto iti altar: dua a kalakian a karnero a maysa ti tawenda. 39 Idatonmo ti maysa nga urbon a kalakian a karnero iti bigat ken idatonmo ti sabali sakbay a sumipnget kalpasan a lumnek ti init.*+ 40 Ti umuna nga urbon a kalakian a karnero ket pakuyogam iti apagkapullo ti maysa nga efa* a napino nga arina, apagkapat ti maysa a hin* a lana ti nataltal nga olibo, ken apagkapat ti maysa a hin ti arak a maidaton. 41 Sakbay a sumipnget kalpasan a lumnek ti init,* idatonmo ti maikadua nga urbon a kalakian a karnero a napakuyogan iti arina ken arak a kas met la kadagiti naidaton iti bigat. Idatonmo dayta kas makaay-ayo* a banglo, maysa a daton a mapuoran para ken Jehova. 42 Iti amin a henerasionyo, kastanto ti kanayon nga itedyo a daton a mapuoran iti ruangan ti tolda a pagkonsultaan iti sanguanan ni Jehova. Sadiay a makisaritaak kadakayo.+

43 “Agparangakto sadiay kadagiti Israelita, ket gapu iti dayagko, agbalinto a nasantuan dayta a lugar.+ 44 Pagbalinekto a nasantuan ti tolda a pagkonsultaan ken ti altar, agraman ni Aaron ken dagiti annakna+ tapno makapagserbida kaniak kas papadi. 45 Makipagnaedakto* kadagiti Israelita, ket siakto ti Diosda.+ 46 Ket maammuandanto a siak ni Jehova a Diosda a nangiruar kadakuada idiay Egipto tapno makipagnaedak kadakuada.+ Siak ni Jehova a Diosda.