Levitico

13 Intuloy a kinuna ni Jehova kada Moises ken Aaron: 2 “No adda tumaud a letteg, gaddil, wenno marka iti kudil* ti maysa a tao ken mabalin nga agbalin a kukutel,*+ masapul a maipan ken Aaron a padi wenno iti maysa kadagiti annakna a papadi.+ 3 Eksamenen ti padi ti impeksion iti kudil dayta a tao. No pimmuraw ti dutdotna ken naun-uneg ti impeksion ngem iti kudil, kukutel dayta. Eksamenen ti padi ket ipakaammona a narugit dayta a tao. 4 Ngem no puraw ti marka iti kudil ken narabaw laeng ken saan a pimmuraw ti buokna, ikuarentinas* ti padi dayta a tao iti pito nga aldaw.+ 5 Eksamenen manen ti padi iti maikapito nga aldaw, ket no makitana a nagsardeng ti impeksion ken saan a nagwaras iti kudil, ikuarentinasna ti tao iti pito pay nga aldaw.

6 “Masapul nga eksamenen manen ti padi iti maikapito nga aldaw, ket no pimmusiaw ken saan a nagwaras ti impeksion iti kudil, ipakaammona a nadalus dayta a tao;+ gaddil laeng dayta. Labaanna dagiti badona ket maibilangen a nadalus. 7 Ngem no nagwaras ti gaddil* iti kudil kalpasan a nagpakita iti padi tapno maipakaammo a nadalusen, agpakita manen* iti padi. 8 Eksamenen dayta ti padi ket no nagwaras ti gaddil iti kudil, ipakaammona a narugit dayta a tao. Kukutel dayta.+

9 “No agkukutel ti maysa a tao, masapul a maipan iti padi 10 a mangeksamen kenkuana.+ No adda puraw a letteg iti kudilna a nangpapuraw iti dutdot sa bimtak+ ti letteg, 11 nakaro a kukutel dayta. Ipakaammo ti padi a narugit dayta a tao ket saanna a masapul nga ikuarentinas.+ 12 No makita ti padi a nagwaras ti kukutel iti intero a bagi manipud ulo agingga iti dapan, 13 ket natakuatanna a nagwaras ti kukutel iti amin a kudilna, ipakaammo ti padi a nadalus* dayta a tao. Nagbalin a puraw ti amin a kudilna, isu a maibilang a nadalus. 14 Ngem no bumtak ti letteg, maibilang a narugit dayta a tao. 15 No makita ti padi ti bimtak a letteg, ipakaammona a narugit dayta a tao.+ Narugit ti bimtak a letteg. Kukutel dayta.+ 16 Ngem no pumuraw manen ti bimtak a letteg, masapul a mapan iti padi. 17 Eksamenen ti padi,+ ket no pimmuraw ti letteg, ipakaammona a nadalus dayta a tao.

18 “No adda tumaud a busali iti kudil ti maysa a tao ket immimbag, 19 ngem adda nagtubo iti dayta a puraw a letteg wenno lumabaga a puraw a marka, masapul nga agpakita iti padi. 20 Eksamenen ti padi,+ ket no makitana a naun-uneg ngem iti kudil ken pimmuraw ti dutdot, ipakaammona a narugit dayta a tao. Kukutel dayta a timmaud iti busali. 21 Ngem no eksamenen ti padi ket nakitana a saan a pimmuraw ti dutdot ken saan a naun-uneg ngem iti kudil ken pimmusiaw, ikuarentinasna ti tao iti pito nga aldaw.+ 22 No nalawag a nagwaras iti kudil, ipakaammo ti padi a narugit dayta a tao. Sakit dayta. 23 Ngem no saan a nagwaras ti marka, limteg laeng dayta. Ipakaammo ti padi a nadalus dayta a tao.+

24 “No adda masinit ket lumabaga a puraw wenno pumuraw ti nasinit a kudilna, 25 masapul nga eksamenen dayta ti padi. No pumuraw ti dutdot iti marka ken naun-uneg dayta ngem iti kudil, kukutel ti timmaud iti nasinit a kudil. Ipakaammo ti padi a narugit dayta a tao. Kukutel dayta. 26 Ngem no eksamenen dayta ti padi ket makitana a saan a pimmuraw ti dutdot iti marka ken saan a naun-uneg ngem iti kudil ken pimmusiaw, ikuarentinasna dayta a tao iti pito nga aldaw.+ 27 Eksamenen ti padi iti maikapito nga aldaw, ket no nagwaras iti kudil, ipakaammona a narugit dayta a tao. Kukutel dayta. 28 Ngem no saan a nagwaras ti marka ken pimmusiaw, limteg laeng ti nasinit a kudil. Ipakaammo ti padi a nadalus dayta a tao.

29 “No tumaud ti impeksion iti ulo wenno timid ti maysa a lalaki wenno babai, 30 eksamenen dayta ti padi.+ No naun-uneg ngem iti kudil ken duyaw ken naingpis dagiti buok, ipakaammo ti padi a narugit dayta a tao. Impeksion dayta iti kudil ti ulo wenno iti barbas. Kukutel dayta iti ulo wenno iti timid. 31 Ngem no makita ti padi a saan a naun-uneg ti impeksion ngem iti kudil ken saan a nangisit dagiti buok iti dayta, masapul nga ikuarentinasna dayta a tao iti pito nga aldaw.+ 32 Eksamenen ti padi ti impeksion iti maikapito nga aldaw, ket no saan a nagwaras ti impeksion ken saan a naun-uneg ngem iti kudil ken saan a nagbalin a duyaw dagiti buok, 33 masapul a makiskisan dagiti buok ti bagina malaksid iti naimpektaran a paset. Ikuarentinas ti padi dayta a tao iti pito pay nga aldaw.

34 “Eksamenen manen ti padi iti maikapito nga aldaw, ket no saan a nagwaras ti impeksion iti kudil ti ulo ken iti barbas ken saan a naun-uneg ngem iti kudil, masapul nga ipakaammona a nadalus dayta a tao. Labaanna dagiti badona ket maibilangen a nadalus. 35 Ngem no nagwaras ti impeksion iti kudil kalpasan a maipakaammo a nadalusen, 36 eksamenen ti padi. No nagwaras ti impeksion iti kudil, saanen nga agbirok pay ti padi iti duyaw a buok; maibilang a narugit dayta a tao. 37 Ngem no saan a nagwaras ti impeksion ken nangisit dagiti buok a nagtubo iti dayta, immimbagen ti impeksion. Nadalus dayta a tao, ket ipakaammo ti padi a nadalusen.+

38 “No tumaud dagiti puraw a marka iti kudil* ti maysa a lalaki wenno babai, 39 eksamenen dagita ti padi.+ No pimmusiaw dagiti puraw a marka, saan a makaakar dayta a sakit a timmaud iti kudil. Maibilang a nadalus dayta a tao.

40 “No agparut dagiti buok ti maysa a lalaki ket agkalbo, maibilang a nadalus. 41 No agparut dagiti buok iti ngatuen ti mugingna ket agludingas, maibilang a nadalus. 42 Ngem no adda tumaud a lumabaga a puraw iti nagkalbo a tuktok ti ulo wenno iti muging, kukutel dayta a timmaud iti tuktok ti ulo wenno iti muging. 43 Eksamenen ti padi, ket no lumabaga a puraw ti letteg iti nagkalbo a paset ti ulona wenno iti mugingna ken kasla kukutel ti langana, 44 agkukutel dayta a lalaki. Ipakaammo ti padi a narugit gapu iti impeksion iti ulona. 45 Masapul a mapisang dagiti bado ti agkukutel a tao, saan a mapukisan ti buokna, ken abbonganna ti imingna sa ipukkawna, ‘Narugitak, narugitak!’ 46 Maibilang a narugit agingga a saan nga umimbag ti sakitna. Masapul a maisina ti pagyananna, iti ruar ti kampo.+

47 “No adda kukutel* iti bado, delana man wenno lienso, 48 iti inabel a lupot,* wenno iti lalat wenno iti aniaman a naaramid iti lalat, 49 ken no adda dumuyaw a berde wenno lumabaga a mansa iti bado, lalat, inabel a lupot, wenno aniaman a naaramid iti lalat, naimpektaran dagita iti kukutel ket masapul a maipakita iti padi. 50 Eksamenen ti padi ti kimpet a sakit, ket masapul nga ikuarentinasna ti banag a nagparangan ti sakit iti pito nga aldaw.+ 51 No eksamenenna ti kimpet a sakit iti maikapito nga aldaw ket makitana a nagwaras dayta iti bado, iti inabel a lupot,* wenno iti lalat (aniaman ti pakausaran dayta a lalat), makadadael dayta a sakit ken maibilang a narugit.+ 52 Masapul a puoranna ti naimpektaran a bado, inabel* a delana wenno lienso, wenno ti aniaman a naaramid iti lalat ta makadadael dayta. Masapul a maipuor.

53 “Ngem no eksamenen dayta ti padi ket makitana a saan a nagwaras iti bado, iti inabel a lupot,* wenno iti aniaman a naaramid iti lalat, 54 ibilinna a malabaan ti naimpektaran a banag ken ikuarentinasna iti pito pay nga aldaw. 55 Eksamenen ti padi ti naimpektaran a banag kalpasan a nalabaan a naimbag. No saan a nagbaliw ti langana, uray no saan a nagwaras ti sakit, maibilang a narugit dayta. Masapul nga ipuormo dayta ta marunrunoten, iti man uneg wenno ruarna.

56 “Ngem no eksamenen ti padi ti bado, lalat, wenno inabel a lupot* ket makitana a pimmusiaw dayta kalpasan a nalabaan a naimbag, masapul nga ikkatenna ti apektado a paset. 57 Ngem no adda latta ti kimpet a sakit iti sabali a paset ti bado, inabel a lupot,* wenno aniaman a naaramid iti lalat, agwarwarasen ti sakit ket masapul nga ipuormo dayta.+ 58 Ngem no maikkat ti kimpet a sakit iti bado, iti inabel a lupot,* wenno iti aniaman a naaramid iti lalat kalpasan a malabaan, masapul a malabaan manen ket maibilangton a nadalus.

59 “Daytoy ti linteg maipapan iti sakit a kukutel a kimpet iti bado a naaramid iti delana wenno lienso, wenno iti inabel a lupot,* wenno iti aniaman a naaramid iti lalat, tapno maipakaammo a nadalus wenno narugit dayta.”