Ebanghelio ni Mateo

5 Idi nakita ni Jesus ti adu a tattao, simmang-at iti bantay. Nagtugaw ket immasideg dagiti adalanna. 2 Inrugina nga isuro ida, ket kinunana:

3 “Naragsak dagiti sipapanunot iti naespirituan a kasapulanda,*+ ta kukuada ti Pagarian ti langit.

4 “Naragsak dagiti agladladingit, ta maliwliwadanto.+

5 “Naragsak dagiti naalumamay,*+ ta tawidendanto ti daga.+

6 “Naragsak dagiti mabisin ken mawaw+ iti kinalinteg, ta mabsogdanto.*+

7 “Naragsak dagiti naasi,+ ta maipakitaandanto iti asi.

8 “Naragsak dagiti nadalus ti panagpuspusoda,+ ta makitadanto ti Dios.

9 “Naragsak dagiti mannakikappia,+ ta maawagandanto iti annak ti Dios.

10 “Naragsak dagiti maidaddadanes gapu iti kinalinteg,+ ta kukuada ti Pagarian ti langit.

11 “Naragsakkayo no uyawen+ ken idadanesdakayo+ dagiti tattao ken no padpadaksendakayo gapu kaniak.+ 12 Agrag-o ken agragsakkayo unay,+ ta dakkel ti gunggonayo+ idiay langit, ken gapu met iti dayta a naidadanes dagiti propeta idi un-unana.+

13 “Dakayo ti asin+ ti daga, ngem no tumamnay ti asin, kasanonto pay a mapaapgad dayta? Awanen ti serserbina no di ket maibelleng laeng iti ruar+ a payatpayaten dagiti tattao.

14 “Dakayo ti silaw ti lubong.+ Saan a mailemmeng ti maysa a siudad nga adda iti bantay. 15 No sindian dagiti tattao ti maysa a lampara, saanda a kaluban iti basket,* no di ket ikabilda iti pagiparabawan iti silaw tapno malawagan amin nga adda iti balay.+ 16 Kasta met, agraniag koma ti lawagyo+ babaen kadagiti nasayaat nga aramidyo+ tapno makita dagita ti tattao, ket idaydayawda ti Amayo nga adda idiay langit.+

17 “Diyo panunoten nga immayak tapno dadaelek ti Linteg wenno dagiti Propeta, no di ket immayak tapno tungpalek dagita.+ 18 Pudno kunak kadakayo, no kasano a saan a mapukaw ti langit ken daga, saan met a mapukaw ti uray kabassitan a letra wenno kur-it ti letra iti Linteg agingga a matungpal amin dagita.+ 19 Gapuna, asinoman a mangsukir iti kabassitan kadagitoy a bilin ken mangisuro iti dadduma nga agsukir, saanto a maikari* iti Pagarian ti langit. Ngem asinoman nga agtungpal ken mangisuro iti dadduma nga agtungpal, maikarinto* iti Pagarian ti langit. 20 Ta ibagak kadakayo, no saankayo a nalinlinteg ngem kadagiti eskriba ken Fariseo,+ pulos a saankayto a makastrek iti Pagarian ti langit.+

21 “Nangngegyo a naikuna idi un-unana: ‘Dika pumatay,+ ta manungsungbatto iti korte ti asinoman a pumatay.’+ 22 Ngem ibagak kadakayo, asinoman nga agtultuloy a makapungtot+ iti kabsatna maipanto iti korte. Asinoman a mangumsi iti kabsatna babaen ti naalas a sasao manungsungbatto iti Korte Suprema. Ken ti asinoman nga agkuna, ‘Awan serserbim a maag!’ maipanto iti umap-apuy a Gehenna.*+

23 “Gapuna, no mangipaayka iti daton iti altar+ ket malagipmo nga adda gura kenka ti kabsatmo, 24 panawam ti datonmo iti sango ti altar. Mapanka makikappia nga umuna ken kabsatmo ket inton makasublika, ipaaymo ti datonmo.+

25 “Alistuam ti makiareglo iti daydiay adda pangidarumanna kenka bayat a mapmapankayo iti korte. Ta no saan, isaklangnaka iti hues, ket iyawatnaka ti hues iti guardia a mangibalud kenka.+ 26 Ibagak kenka, dikanto pulos makaruar sadiay agingga a maibayadmo ti maudi a sentimom.*

27 “Nangngegyo a naikuna: ‘Dika makikamalala.’+ 28 Ngem ibagak kadakayo, asinoman nga agtultuloy a mangmatmat iti maysa a babai+ ket gartemanna, nakabasolen iti pusona iti pannakikamalala.+ 29 No ti kannawan a matam ti mangitibkol kenka, suatem ket ibellengmo.+ Ta nasaysayaat a mapukaw ti maysa a paset ti bagim ngem ti maitapuak ti intero a bagim iti Gehenna.*+ 30 Kasta met, no itibkolnaka ti kannawan nga imam, putdem ket ibellengmo.+ Ta nasaysayaat a mapukaw ti maysa a paset ti bagim ngem ti maitapuak ti intero a bagim iti Gehenna.*+

31 “Naikuna pay: ‘Asinoman a mangidiborsio iti asawana a babai, ikkanna koma iti kasuratan ti diborsio.’+ 32 Nupay kasta, ibagak kadakayo, no idiborsio ti lalaki ti asawana ngem saan a maigapu iti seksual nga immoralidad,* mabalin nga agbasolto ti babai iti pannakikamalala. Asinoman a mangasawa iti dayta a babai ket makabasol iti pannakikamalala.+

33 “Nangngegyo pay a naikuna idi un-unana, ‘Dikay agsapata no saanyo a tungpalen,+ no di ket masapul a tungpalenyo dagiti kariyo ken Jehova.’*+ 34 Ngem ibagak kadakayo: Diyo ibaga no agsapatakayo,+ ‘saksik ti langit,’ ta dayta ti trono ti Dios; 35 wenno ‘saksik ti daga,’ ta dayta ti pagbatayan dagiti sakana;+ wenno ‘saksik ti Jerusalem,’ ta dayta ti siudad ti naindaklan nga Ari.+ 36 Diyo met isapata, ‘uray man maputed ti ulok,’* ta saanyo a mapagbalin a puraw wenno nangisit ti uray maysa laeng a buok. 37 No kunayo a ‘Wen,’ wen; ngem no ‘Saan,’ saan;+ ta aniaman a surok dagita ket nagtaud iti daydiay managdakdakes.+

38 “Nangngegyo a naikuna: ‘Mata iti mata ken ngipen iti ngipen.’+ 39 Ngem ibagak kadakayo: Dimo busoren ti dakes a tao. No adda mangtungpa iti kannawan a pingpingmo, itayam pay ti kannigid.+ 40 No adda mangidarum kenka ta kayatna nga alaen ti makin-uneg a badom, itedmo pay ti makinruar a badom;+ 41 ket no adda mangpilit kenka a mangbagkat iti awit iti maysa a milia,* kumuyogka kenkuana iti dua a milia. 42 Ikkam daydiay agdawdawat kenka, ken pautangam daydiay kayatna ti umutang* kenka.+

43 “Nangngegyo a naikuna: ‘Masapul nga ayatem ti kaarrubam+ ket guraem ti kabusormo.’ 44 Ngem ibagak kadakayo: Itultuloyyo nga ayaten dagiti kabusoryo+ ken ikararagan dagidiay mangidaddadanes kadakayo,+ 45 tapno mapaneknekanyo nga annaknakayo ni Amayo nga adda idiay langit,+ ta pagsilnagenna ti initna kadagiti dakes ken kadagiti naimbag ken pagtinnagenna ti tudo kadagiti nalinteg ken kadagiti nakillo.+ 46 Ta no dagidiay laeng mangay-ayat kadakayo ti ayatenyo, ania ti magunggonayo?+ Saan kadi a kasta met laeng ti ar-aramiden dagiti agsingsingir iti buis? 47 No dagiti laeng kakabsatyo ti kablaawanyo, nasaysayaat kadi ti ar-aramidenyo ngem iti dadduma? Saan kadi a kasta met laeng ti ar-aramiden ti tattao kadagiti nasion? 48 Masapul ngarud nga agbalinkayo a perpekto* a kas iti nailangitan nga Amayo a perpekto.+