Ebanghelio ni Juan

6 Kalpasanna, bimmallasiw ni Jesus iti Baybay ti Galilea, wenno Tiberias.+ 2 Adu a tattao ti simmurot kenkuana+ ta nakitada dagiti inaramidna a milagro a panangpaimbag kadagiti masakit.+ 3 Gapuna, simmang-at ni Jesus ken dagiti adalanna iti maysa a bantay, ket nagtugawda sadiay. 4 Asideg idin ti Paskua,+ a piesta dagiti Judio. 5 Inwaras ni Jesus ti panagkitana ket nakitana nga umas-asideg ti adu a tattao isu a kinunana ken Felipe: “Panggatangantayo ngata iti tinapay a kanen dagitoy a tattao?”+ 6 Imbagana daytoy tapno subokenna ni Felipe, ta ammo ni Jesus ti aramidenna. 7 Insungbat ni Felipe: “Saan nga umanay ti tinapay a magatang ti 200 a denario* uray saggabassitda laeng.” 8 Imbaga ti maysa kadagiti adalanna, ni Andres a kabsat ni Simon Pedro: 9 “Adda ubing a lalaki ditoy nga addaan iti lima a tinapay a sebada ken dua a babassit nga ikan. Ngem kasano a makaanay dagitoy iti kastoy kaadu a tattao?”+

10 Kinuna ni Jesus: “Pagtugawenyo dagiti tattao.” Nagdalupisakda ta karuotan daydiay a disso. Agarup 5,000 ti lallaki kadakuada.+ 11 Innala ni Jesus dagiti tinapay, ket kalpasan a nagyaman iti Dios, inwarasna dagita kadagiti nakatugaw sadiay; kasta met ti inaramidna kadagiti babassit nga ikan, ket napnek a nangan dagiti tattao. 12 Idi nakapangandan, kinunana kadagiti adalanna: “Urnongenyo dagiti natedda, tapno awan ti masayang.” 13 Idi inurnongda dagiti natedda manipud iti lima a tinapay a sebada, napno ti 12 a basket.

14 Idi nakita dagiti tattao ti pagilasinan nga inaramidna, kinunada: “Sigurado a daytoy ti Propeta a naipadto nga umay ditoy lubong.”+ 15 Gapu ta ammo ni Jesus a pilitenda nga agbalin nga ari,+ napan manen iti bantay nga is-isuna.+

16 Idi sumipngeten, napan dagiti adalanna iti baybay,+ 17 ket nagbangkada nga agturong idiay Capernaum. Rabii idin, ngem saanda pay a kadua ni Jesus.+ 18 Mangrugin a dumawel ti baybay gapu iti napigsa nga angin.+ 19 Idi nakaadayodan iti agarup tallo wenno uppat a milia,* nakitada ni Jesus a magmagna iti rabaw ti baybay nga umas-asideg iti bangka, ket nagbutengda. 20 Ngem kinuna ni Jesus: “Siak daytoy; dikay agbuteng!”+ 21 Gapuna, naragsakda a nangilugan kenkuana iti bangka, ket alistoda a simmanglad iti lugar a papananda.+

22 Iti sumaganad nga aldaw, awan bangka a nakita dagiti tattao a nabati iti ballasiw ti baybay. Adda idi bassit a bangka sadiay, ngem saan a limmugan ni Jesus iti dayta a kadua dagiti adalanna, ta pimmanaw dagiti adalanna nga is-isuda. 23 Nupay kasta, adda dagiti bangka manipud Tiberias a simmanglad iti asideg ti nangananda iti tinapay kalpasan a nagkararag ti Apo. 24 Isu nga idi nakita dagiti tattao nga awan sadiay ni Jesus wenno dagiti adalanna, limmuganda kadagiti bangka tapno sapulenda ni Jesus idiay Capernaum.

25 Idi nabirokanda iti ballasiw ti baybay, kinunada kenkuana: “Rabbi,+ kaano a nakadanonka ditoy?” 26 Insungbat ni Jesus: “Pudno unay kunak kadakayo, birbirokendak gapu kadagiti tinapay a kinnanyo ket nabsogkayo, saan a gapu kadagiti pagilasinan a nakitayo.+ 27 Agtrabahokayo, saan a para iti madadael a taraon, no di ket para iti agpaut a taraon a mangted iti biag nga agnanayon,+ nga itedto kadakayo ti Anak ti tao; ta isu ti inaprobaran ti Ama, ti Dios a mismo.”+

28 Gapuna, insaludsodda: “Ania ti masapul nga aramidenmi tapno maitungpalmi ti ipapaaramid ti Dios?” 29 Insungbat ni Jesus: “Daytoy ti ipapaaramid ti Dios, nga ipakitayo ti pammati iti daydiay imbaonna.”+ 30 Kinunada kenkuana: “Ania ti maipakitam a pagilasinan+ tapno patiendaka? Ania ti aramidem? 31 Nangan dagidi ammatayo iti manna idiay let-ang,+ kas naisurat: ‘Inikkanna ida iti tinapay manipud langit.’”+ 32 Kinuna ni Jesus: “Pudno unay kunak kadakayo, saan a ni Moises ti nangted kadakayo iti tinapay manipud langit, no di ket ni Amak. 33 Ta ti tinapay nga inted ti Dios ket daydiay bimmaba manipud langit ken mangted iti biag iti lubong.” 34 Gapuna, kinunada: “Apo, ikkannakami koma a kanayon iti kastoy a tinapay.”

35 Kinuna ni Jesus: “Siak ti tinapay ti biag. Ti umay kaniak saanton nga agbisin, ket ti mangipakita iti pammati kaniak saanton a mawaw.+ 36 Ibagak kadakayo, nakitadak a mismo ngem saankayo a mamati.+ 37 Umayto kaniak ti amin nga ited ti Ama, ket saankonto a papanawen ti umay kaniak;+ 38 ta bimmabaak manipud langit+ tapno aramidek ti pagayatan daydiay nangibaon kaniak, saan ket a ti pagayatak.+ 39 Daytoy ti pagayatan daydiay nangibaon kaniak, nga awan koma ti mapukawko iti amin nga intedna kaniak no di ket pagungarek+ ida iti maudi nga aldaw. 40 Ta daytoy ti pagayatan ni Amak, nga asinoman nga umawat iti Anak ken mangipakita iti pammati kenkuana maaddaan koma iti biag nga agnanayon,+ ken pagungarekto+ iti maudi nga aldaw.”

41 Gapuna, nagtanabutob dagiti Judio gapu ta imbagana: “Siak ti tinapay a bimmaba manipud langit.”+ 42 Kinunada: “Saan aya a daytoy ni Jesus nga anak ni Jose, nga am-ammotayo ti ama ken inana?+ Apay nga ibagbagana, ‘Bimmabaak manipud langit’?” 43 Insungbat ni Jesus kadakuada: “Isardengyon ti agtanabutob. 44 Awan ti tao a makaumay kaniak malaksid no iyasideg ti Ama, a nangibaon kaniak,+ ket pagungarekto iti maudi nga aldaw.+ 45 Insurat dagiti propeta: ‘Sursuruanto amin ida ni Jehova.’*+ Umay kaniak ti asinoman a dumngeg iti Ama ken agpaisuro kenkuana. 46 Awan ti tao a nakakita iti Ama,+ no di laeng daydiay naggapu iti Dios; daytoy ti nakakita iti Ama.+ 47 Pudno unay kunak kadakayo, ti mamati ket maaddaan iti biag nga agnanayon.+

48 “Siak ti tinapay ti biag.+ 49 Nangan dagidi ammayo iti manna idiay let-ang ngem kaskasdi a natayda.+ 50 Ngem ti mangan iti tinapay a naggapu idiay langit ket saan a matay. 51 Siak ti sibibiag a tinapay a naggapu idiay langit. Ti asinoman a mangan iti daytoy a tinapay ket agbiagto iti agnanayon. Kinapudnona, ti tinapay nga itedko tapno agbiag ti lubong ket ti lasagko.”+

52 Gapuna, nagsusupiat dagiti Judio ket kinunada: “Kasano koma nga ited daytoy a tao ti lasagna a kanentayo?” 53 Kinuna ni Jesus: “Pudno unay kunak kadakayo, no saanyo a kanen ti lasag ti Anak ti tao ken inumen ti darana, saankayo a maaddaan iti biag.+ 54 Ti mangan iti lasagko ken uminum iti darak ket maaddaan iti biag nga agnanayon, ken pagungarekto+ iti maudi nga aldaw; 55 ta ti lasagko ket pudno a taraon, ken ti darak ket pudno nga inumen. 56 Ti mangan iti lasagko ken uminum iti darak ket agtalinaed a maikaykaysa kaniak, ken maikaykaysaak met kenkuana.+ 57 No kasano nga agbiagak gapu iti sibibiag nga Ama a nangibaon kaniak, ti mangan iti lasagko agbiagto met gapu kaniak.+ 58 Daytoy ti tinapay a naggapu idiay langit, saan a kas iti kinnan dagidi ammayo ket kaskasdi a natayda. Agbiagto nga agnanayon ti mangan iti daytoy a tinapay.”+ 59 Imbagana dagitoy bayat a nangisursuro iti sinagoga* idiay Capernaum.

60 Idi nangngeg daytoy ti adu kadagiti adalanna, kinunada: “Makapakigtot ti ibagbagana; dimi maitured a denggen!” 61 Ngem gapu ta ammo ni Jesus nga agtantanabutob dagiti adalanna, kinunana: “Maitibkolkayo kadi iti daytoy? 62 Anianto la ketdin no makitayo ti Anak ti tao nga umul-uli iti naggapuanna?+ 63 Ti espiritu ti mangted iti biag;+ awan a pulos ti maited ti lasag. Dagiti imbagak kadakayo ket maitunos iti espiritu ken mangted iti biag.+ 64 Ngem saan a mamati ti dadduma kadakayo.” Ta ammo ni Jesus sipud idi damo no siasino dagiti saan a mamati ken no asino ti mangtraidor kenkuana.+ 65 Intuloyna: “Daytoy ti rason a kinunak kadakayo nga awan ti makaumay kaniak malaksid no iyasideg kaniak ti Ama.”+

66 Gapu iti daytoy, adu kadagiti adalanna ti nagsubli iti dati a panagbiagda+ ket saandan a simmurot kenkuana. 67 Kinuna ni Jesus iti Sangapulo ket Dua: “Pumanawkay met kadi?” 68 Simmungbat ni Simon Pedro: “Apo, sadino koma ti papananmi?+ Adda kenka ti sasao a makaited iti biag nga agnanayon.+ 69 Mamatikami ken ammomi a sika ti Nasantuan nga Adipen ti Dios.”+ 70 Kinuna ni Jesus: “Saan kadi a siak ti nangpili kadakayo a 12?+ Ngem maysa kadakayo ti manangpardaya.”*+ 71 Kinapudnona, ni Judas nga anak ni Simon Iscariote ti tuktukoyenna, ta isu ti mangtraidorto kenkuana, nupay maysa kadagiti Sangapulo ket Dua.+