Ester

2 Kalpasanna, idi bimmaawen ti pungtot ni Ari Ahasuero,+ nalagipna ti inaramid ni Vasti+ ken ti naipataw a dusana.+ 2 Kinuna dagiti mamalbalakad ti ari: “Agpasapul koma ti ari iti napipintas a babbalasang a birhen. 3 Mangpili koma ti ari kadagiti tattao iti amin a probinsia* iti pagarianna+ a mangipan iti amin a napintas a birhen iti kastilio* ti Susan,* iti balay dagiti babbai. Maipanda ken Hegai+ a eunuko ti ari ken paraaywan kadagiti babbai, ket mapapintasda* koma. 4 Ti balasang a magustuan unay ti ari isunto ti sumukat ken Vasti.”+ Nagustuan ti ari ti suhestion, ket kasta ti inaramidna.

5 Adda idi maysa a Judio a lalaki iti kastilio* ti Susan.*+ Isu ni Mardokeo+ nga anak ni Jair nga anak ni Simei nga anak ni Kis, a Benjaminita.+ 6 Naitalaw idi ni Mardokeo kas balud manipud Jerusalem. Kaduana ni Ari Jeconias*+ ti Juda ken ti dadduma pay nga intalaw ni Ari Nabucodonosor ti Babilonia. 7 Isu ti agay-aywan ken Hadassa,* wenno Ester, a kasinsinna,* ta awanen ti tatang+ ken nanangna. Nakapimpintas ti pammagi ken langa ti balasang, ket idi naulila, inampon ni Mardokeo. 8 Idi naipaulog ti bilin ti ari ken ti lintegna ken idi naipan iti kastilio* ti Susan* ti adu a babbalasang iti aywan ni Hegai, naipan met ni Ester iti balay* ti ari iti aywan ni Hegai+ a paraaywan kadagiti babbai.

9 Nagustuan ni Hegai ti balasang ken pinaboranna,* isu nga inyurnosna a dagus ti pannakapapintasna*+ ken ti dietana, ken nangpili iti pito nga adipen a babbai manipud iti balay ti ari nga agserbi a katulonganna. Inyakarna met ida iti kasayaatan a paset ti balay dagiti babbai. 10 Awan ti imbagbaga ni Ester maipapan iti ilina wenno iti kakabagianna,+ ta kasta ti imbilin ni Mardokeo.+ 11 Inaldaw a lumabas ni Mardokeo iti paraangan ti balay dagiti babbai tapno ammuenna ti kasasaad ni Ester ken ti mapaspasamak kenkuana.

12 Adda batang ti tunggal balasang a mapan ken Ari Ahasuero kalpasan ti naibilin a 12 a bulan a pannakapapintasda*—innem a bulan a masapsapuanda iti lana ti mirra+ ken innem a bulan a masapsapuanda iti lana ti balsamo+ ken iti dadduma pay a lana—kasta idi ti pannakapapintasda.* 13 No nakasaganan ti maysa a balasang a mapan iti ari, maited ti aniaman a kayatna inton pumanaw iti balay dagiti babbai a mapan iti balay ti ari. 14 Mapan iti rabii ket iti kabigatanna, maipan iti maikadua a balay dagiti babbai iti aywan ni Saasgaz a eunuko ti ari,+ ti paraaywan iti sabali pay nga assawa ti ari. Saanen a mapan iti ari malaksid no naragsakan kenkuana ti ari ken no paayabanna.+

15 Dimteng ti batang ni Ester nga anak ni Abihail nga angkel ni Mardokeo, a nangampon kenkuana.+ Idi napan iti ari, saan a nagkiddaw iti aniaman malaksid iti imbaga ni Hegai a eunuko* ti ari, ti paraaywan kadagiti babbai. (Kabayatanna, ni Ester ket magusgustuan ti amin a makakita kenkuana.) 16 Naipan ni Ester iti balay ni Ari Ahasuero iti maika-10 a bulan a maawagan iti Tebet,* bayat ti maikapito a tawen+ a panagturayna. 17 Ad-adda nga inayat ti ari ni Ester ngem iti dadduma pay a babbai, ken ad-adda a pinaboran ken impategna* ngem iti dadduma pay a birhen. Kinoronaanna* ni Ester ket pinagbalinna a reyna+ a kasukat ni Vasti.+ 18 Nangaramid ti ari iti dakkel a selebrasion kas pammadayaw ken Ester ket inawisna ti amin a prinsipe ken adipenna. Nangiwaragawag met iti amnestia kadagiti probinsia* ken nangted kadagiti sagut maitunos iti kabaelanna.

19 Idi mapaayaban manen dagiti birhen,*+ nakatugaw ni Mardokeo iti ruangan ti palasio ti ari. 20 Awan ti imbagbaga ni Ester maipapan iti kakabagianna ken iti ilina,+ kas imbilin ni Mardokeo. Tungtungpalen ni Ester ti aniaman nga ibaga ni Mardokeo, kas idi adda pay laeng iti poderna.+

21 Bayat a nakatugaw ni Mardokeo iti ruangan ti palasio ti ari, ti dua nga opisial iti palasio ti ari ken parabantay iti ruangan a da Bigtan ken Teres ginurada ni Ari Ahasuero ket implanoda a papatayen.* 22 Ngem idi naammuan dayta ni Mardokeo, dagus nga imbagana ken Reyna Ester. Nakisarita met ni Ester iti ari iti nagan ni Mardokeo.* 23 Gapuna, naimbestigaran dayta ket napaneknekan a pudno, isu a naibitay dagiti dua a lallaki. Naisurat amin dagitoy iti sanguanan ti ari, iti libro ti pakasaritaan dagiti pasamak.+