Uk-ukom

20 Gapuna, naguummong ti amin nga Israelita manipud Dan+ agingga idiay Beer-sheba kasta met dagiti naggapu idiay Gilead+ ket nagparangda a sangsangkamaysa* iti sanguanan ni Jehova idiay Mizpa.+ 2 Dagiti panguluen dagiti umili ken ti amin a tribu ti Israel ket karaman kadagiti naguummong nga ili ti Dios. Adda 400,000 a soldado a nakaespada.+

3 Nadamag dagiti Benjaminita a napan idiay Mizpa dagiti Israelita.

Kinuna dagiti Israelita: “Ibagayo kadakami no kasano a napasamak daytoy a nagdakes a banag.”+ 4 Simmungbat ti Levita+ nga asawa ti natay a babai: “Napanak imyan idiay Gibea+ iti Benjamin a kaduak ti asawak. 5 Karabiyanna, immay dagiti agnanaed* iti Gibea ket pinalikmutanda ti balay. Kayatdak a papatayen, ngem ti asawak ti rinamesda ket natay.+ 6 Gapuna, innalak ti bangkay ti asawak ket ginuduaguduak sa nangipatulodak iti maysa a pedaso iti tunggal teritoria ti Israel,+ gapu iti nakababain ken nakadakdakes nga inaramidda iti Israel. 7 Ita, ania ti makunayo dakayo nga umili ti Israel?”+

8 Gapuna, nagtakder a sangsangkamaysa* ti amin nga umili ket kinunada: “Awan kadatayo ti mapan iti toldana wenno agawid iti balayna. 9 Kastoy ti aramidentayo iti Gibea: Pagbibinnunotantayo no siasino ti manggubat kadakuada.+ 10 Mangpilitayo kadagiti agkolekta iti kasapulan ti armada, 10 a lallaki iti tunggal 100 manipud iti amin a tribu ti Israel, ken 100 iti tunggal 1,000 ken 1,000 iti tunggal 10,000. Gubatenda ti Gibea iti Benjamin, gapu iti nagdakes nga inaramidda iti Israel.” 11 Gapuna, naguummong a sangsangkamaysa* ti amin nga Israelita a manggubat iti siudad.

12 Kalpasanna, nangibaon dagiti tribu ti Israel kadagiti lallaki a mapan kadagiti Benjaminita, ket kinunada: “Ania daytoy nagdakes nga inaramidyo? 13 Itedyo dagiti lallaki ti Gibea+ a nangaramid iti daytoy a kinadakes ket papatayenmi ida tapno madalusan ti Israel iti daytoy a kinadakes.”+ Ngem saan nga impangag dagiti Benjaminita dagiti kakabsatda nga Israelita.

14 Naguummong dagiti Benjaminita manipud kadagiti siudad ket napanda idiay Gibea tapno makigubatda kadagiti Israelita. 15 Iti dayta nga aldaw, nakaummong dagiti Benjaminita kadagiti siudadda iti 26,000 a lallaki a nakaespada, malaksid pay iti 700 a napili a lallaki ti Gibea. 16 Kattigid dagitoy a 700 a napili a lallaki. Pumapallatibongda amin ken uray iti kas kaingpis ti maysa a buok, saanda nga agmintis a mangtiro iti aniaman a puntaanda.

17 Dagiti lallaki iti dadduma pay a tribu ti Israel, malaksid ti Benjamin, ket addaan iti 400,000 a soldado a nakaespada+ ken nalaing a makigubat. 18 Napan dagiti Israelita idiay Bethel tapno isaludsodda iti Dios:+ “Asino ti mangidaulo kadakami a makigubat kadagiti Benjaminita?” Insungbat ni Jehova: “Ni Juda ti mangidaulo.”

19 Kabigatanna, nagkampo dagiti Israelita iti asideg ti Gibea tapno makigubatda.

20 Napan dagiti Israelita idiay Gibea ket nagpuestoda a makilaban kadagiti Benjaminita. 21 Gapuna, rimmuar dagiti Benjaminita manipud Gibea ket 22,000 nga Israelita ti napapatayda iti dayta nga aldaw. 22 Ngem saan a napabutngan dagiti Israelita. Kabigatanna, nagpuestoda manen a makilaban iti isu met laeng a lugar kas iti immuna nga aldaw. 23 Kasta met, napan dagiti Israelita idiay Bethel ket nagsangsangitda iti sanguanan ni Jehova agingga iti rabii. Insaludsodda ken Jehova: “Mapankami kadi manen makigubat kadagiti kakabsatmi a Benjaminita?”+ Insungbat ni Jehova: “Wen, mapankayo.”

24 Gapuna, rimmaut manen dagiti Israelita kadagiti Benjaminita iti maikadua nga aldaw. 25 Ngem simmabat dagiti Benjaminita manipud Gibea ket 18,000 manen ti napapatayda nga Israelita+ a nakaespada. 26 Kalpasanna, napan idiay Bethel ti amin nga Israelita. Nagsangsangit ken nagtugawda iti sanguanan ni Jehova+ ket nagayunarda+ agingga iti rabii. Nangipaayda ken Jehova kadagiti daton a mapuoran+ ken daton a pakikappia.+ 27 Kalpasanna, nagsaludsod dagiti Israelita ken ni Jehova,+ ta adda sadiay ti lakasa ti tulag ti pudno a Dios kadagidi nga aldaw. 28 Agserserbi* idi sadiay ni Finehas+ nga anak ni Eleazar, nga anak ni Aaron. Insaludsodda: “Mapankami kadi manen makigubat kadagiti kakabsatmi a Benjaminita, wenno agsardengkamin?”+ Insungbat ni Jehova: “Mapankayo, ta itedko ida iti imayo inton bigat.” 29 Iti kasta, nangibaon dagiti Israelita kadagiti lallaki nga agtambang+ iti aglikmut ti Gibea.

30 Iti maikatlo nga aldaw, nagpuesto manen dagiti Israelita idiay Gibea a makigubat kadagiti Benjaminita a kas met laeng iti inaramidda kadagiti immuna a gundaway.+ 31 Idi rimmuar dagiti Benjaminita a makigubat kadagiti soldado, nayadayoda iti siudad.+ Kas iti dati, adda dagiti lallaki a napapatayda kadagiti kalsada nga agturong idiay Bethel ken idiay Gibea. Agarup 30 nga Israelita ti napapatay iti tanap.+ 32 Gapuna, kinuna dagiti Benjaminita: “Abakentay manen ida.”+ Ngem kinuna dagiti Israelita: “Agatrastayo ket iyadayotayo ida iti siudad nga agturong kadagiti kalsada.” 33 Iti kasta, nagpuesto idiay Baal-tamar ti amin a soldado ti Israel, ken dimmarup met dagiti Israelita a naibaon nga agtambang iti asideg ti Gibea. 34 Dimmarup iti Gibea ti 10,000 a napili a lallaki manipud iti Israel, ket nakaro ti panaglalabanda. Ngem saan nga ammo dagiti Benjaminita nga asidegen a maabakda.

35 Inabak ni Jehova ti Benjamin+ iti sanguanan ti Israel, ket 25,100 a Benjaminita a nakaespada ti napapatay dagiti Israelita iti dayta nga aldaw.+

36 Impagarup dagiti Benjaminita+ nga abakenda dagiti Israelita gapu ta nagatrasda. Ngem nagatras dagiti Israelita ta mangnamnamada kadagiti naibaon nga agtambang iti Gibea.+ 37 Dimmarup a dagus dagiti naibaon nga agtambang iti Gibea. Nagwarasda iti siudad ket nangpapatayda babaen ti espada.

38 Tinulagan dagiti Israelita dagiti lallaki nga agtambang nga inton darupenda ti siudad, mangpataudda iti asuk nga agpangato kas pagilasinan.

39 Idi nagatras dagiti Israelita, dinarup ida dagiti Benjaminita ket agarup 30 nga Israelita ti napapatay,+ sa kinunada: “Sigurado nga abakentay manen ida kas iti dati.”+ 40 Ngem adda nagpuskol nga asuk a nagpangato manipud iti siudad. Idi timmaliaw dagiti Benjaminita, nakitada a maur-uram ti intero a siudad. 41 Nagbuelta dagiti Israelita, ket nagdanag dagiti Benjaminita, ta ammoda a maabakdan. 42 Gapuna, tinarayanda dagiti Israelita ket nagturongda iti let-ang, ngem kimmamat dagiti Israelita. Timmulong met dagiti lallaki a rimmaut iti siudad a mangpapatay kadagiti Benjaminita. 43 Pinalawlawanda dagiti Benjaminita ken saanda a nagsardeng a nangkamkamat kadakuada. Pinarmekda ida iti daya ti Gibea. 44 Napapatay ti 18,000 a Benjaminita a nabileg a mannakigubat.+

45 Nagturong dagiti Benjaminita idiay let-ang iti dakkel a bato ti Rimmon,+ ngem bayat nga addada iti kalsada, 5,000 kadakuada ti napapatay* dagiti Israelita. Intultuloy dagiti Israelita ti kimmamat agingga idiay Gidom ket 2,000 pay ti napapatayda. 46 Agdagup iti 25,000 a nabileg a mannakigubat a Benjaminita a nakaespada ti napapatay iti dayta nga aldaw.+ 47 Ngem 600 ti nakapagkamang idiay let-ang iti dakkel a bato ti Rimmon ket nagyanda sadiay iti uppat a bulan.

48 Sinublian dagiti Israelita dagiti Benjaminita ket pinapatayda iti espada ti amin a nabati iti siudad, tattao man wenno animal. Pinuoranda met ti amin a siudad a nalabsanda.