Levitico

25 Kinuna pay ni Jehova ken ni Moises idiay Bantay Sinai: 2 “Ibagam kadagiti Israelita, ‘Inton makadanonkayo iti daga nga itedko kadakayo,+ masapul a tungpalenyo ti linteg ni Jehova maipapan iti sabbath ket dikay talonen ti daga.+ 3 Innem a tawen a mulaanyo ti talonyo iti bin-i ken innem a tawen nga arbasanyo ti kaubasanyo, ket ummongenyo ti apityo.+ 4 Ngem iti maikapito a tawen, masapul a paginanaenyo ti daga. Tawen ti Sabbath dayta ken Jehova. Diyo mulaan ti talonyo iti bin-i, ket diyo arbasan ti kaubasanyo. 5 Diyo apiten ti bunga dagiti nagtubo a binukel a naregreg iti panaganiyo, ken diyo burasen ti bunga dagiti di naarbasan a puon ti ubasyo. Masapul a naan-anay nga aginana ti daga iti dayta a tawen. 6 Ngem mabalinyo a kanen ti aniaman nga agtubo iti daga bayat ti sabbath, dakayo agraman dagiti adipenyo a lallaki ken babbai, ti matangtangdanan a trabahadoryo, ken dagiti ganggannaet a residente, 7 kasta met dagiti tarakenyo nga animal ken dagiti atap nga animal iti dagayo. Mabalin a kanen ti amin nga apit ti daga.

8 “‘Mangbilangkayo iti pito a tawen ti sabbath, mamimpito a pito a tawen, ket agdagupto dayta iti 49 a tawen. 9 Kalpasanna, puyotanyo iti napigsa ti tangguyob iti maika-10 nga aldaw ti maikapito a bulan; masapul a mapuyotan ti tangguyob iti intero a dagayo iti Aldaw ti Panangabbong.+ 10 Masapul nga ideklarayo a nasantuan ti maika-50 a tawen ken ipakaammoyo ti pannakawayawaya iti daga ken iti amin nga agnanaed iti dayta.+ Maibilangto a Jubileo dayta, ket agsubli ti tunggal maysa kadakayo iti tawidna a daga ken iti pamiliana.+ 11 Agbalinto ti maika-50 a tawen kas Jubileo. Dikay agimula iti bin-i wenno diyo apiten ti bunga ti agtubo a naregreg a binukel ken dikay met burasen ti bunga ti di naarbasan a puon ti ubas.+ 12 Ta Jubileo dayta a tawen ket agbalinto a nasantuan kadakayo. Ti laeng patauden ti daga ti mabalinyo a kanen.+

13 “‘Iti daytoy a tawen ti Jubileo, masapul nga agsubli ti tunggal maysa kadakayo iti tawidna a daga.+ 14 Diyo gundawayan ti padayo a tao no adda ilako wenno gatangenyo kenkuana.+ 15 Ti gatad ti aniaman a gatangenyo ket maibatay iti bilang dagiti limmabas a tawen kalpasan ti Jubileo; makuenta ti gatad ti ilakona sigun iti bilang dagiti nabati a tawen ti panagani.+ 16 No adu pay ti tawen a nabati, mabalinna a nayonan ti presio a pangilakuanna, ket no sumagmamano laengen a tawen ti nabati, masapul a kissayanna dayta a presio, ta aglako sigun iti bilang dagiti nabatbati a tawen ti panagani. 17 Diyo koma gundawayan ti padayo a tao,+ ket masapul nga agbutengkayo iti Diosyo,+ ta siak ni Jehova a Diosyo.+ 18 No tungpalenyo dagiti paglintegak ken surotenyo dagiti pangngeddengko, natalgedto ti panagnaedyo iti dayta a daga.+ 19 Ipaayto ti daga ti bungana,+ ket agpennekkayto a mangan ken natalgedto ti panagbiagyo sadiay.+

20 “‘Ngem no kunayo: “Anianto ti kanenmi iti maikapito a tawen ket saanmi met a mabalin ti agmula wenno agani?”+ 21 Bendisionankayto iti maikanem a tawen, ket mangpataudto ti daga iti apit nga umanay iti tallo a tawen.+ 22 Inton agmulakayo iti maikawalo a tawen, addanto pay la matedda iti inapityo iti maikanem a tawen ket umanayto a kanenyo agingga iti maikasiam a tawen.

23 “‘Diyo ilako ti dagayo kas permanente a sanikua ti gumatang,+ ta siak ti makinkukua iti daga+ ket ibilangkayo a ganggannaet a residente.+ 24 Iti daga nga agbalinto a sanikuayo, adda kalintegan ti asinoman a naglako a manggatang manen iti inlakona a daga.

25 “‘No pumanglaw ti padam nga Israelita ket ilakona ti dagana, masapul a ti kaasitgan a kabagianna ti mangsaka iti dayta.+ 26 No awan ti kasta a kabagianna, ket simmayaat ti panagbiagna ken nakaurnong iti pangsakana iti dagana, 27 kuentaenna ti gatad dagiti naapit manipud idi inlakona ti daga ket ikissayna dayta iti gatad a nangilakuanna sa bayadanna ti balanse. Kalpasanna, maalana manen ti dagana.+

28 “‘Ngem no saanna a kabaelan a gatangen manen, agtalinaed ti daga iti gimmatang agingga iti tawen ti Jubileo.+ Maisublinto dayta kenkuana iti Jubileo, ket agsublinto iti sanikuana.+

29 “‘No ilako ti maysa ti balayna nga adda iti napaderan a siudad, adda kalinteganna a manggatang manen+ iti dayta iti uneg ti makatawen kalpasan nga inlakona. 30 Ngem no limbes ti makatawen ket saanna a nagatang manen ti balayna nga adda iti napaderan a siudad, permanente a kukua daytan ti gimmatang ken dagiti sumaruno a henerasionna. Saanen a maisubli dayta iti Jubileo. 31 Ngem no ti mailako a balay ket adda iti ili a saan a napaderan, maibilang dayta kas paset ti talon. Agtultuloy nga adda kalintegan ti naglako a manggatang manen iti sanikuana, ket masapul a maisubli dayta iti Jubileo.

32 “‘No maipapan iti balay dagiti Levita kadagiti siudadda,+ agnanayon nga adda kalinteganda a manggatang manen iti dayta. 33 No saan a gatangen manen dagiti Levita ti balayda nga adda iti siudad, masapul a maisubli dayta iti Jubileo,+ ta dagiti balay kadagiti siudad dagiti Levita ket sanikuada iti tengnga dagiti Israelita.+ 34 Kasta met, saan a mabalin nga ilako dagiti pagpastoran+ iti aglawlaw dagiti siudadda, ta permanente a sanikuada dayta.

35 “‘No pumanglaw ti padayo nga Israelita ket saannan a kabaelan a biagen ti bagina, masapul a tulonganyo+ tapno agtultuloy nga agbiag, kas iti panangtulongyo iti maysa a ganggannaet a residente.+ 36 Diyo singiren iti interes wenno diyo pagganansiaan.*+ Agbutengkayo iti Diosyo,+ tapno agtultuloy nga agbiag ti kailianyo. 37 Diyo interesan ti kuarta nga ipabulodyo kenkuana+ wenno ganansiaan ti itedyo a taraon. 38 Siak ni Jehova a Diosyo, a nangiruar kadakayo idiay Egipto+ tapno itedko kadakayo ti Canaan ket agbalinak a Diosyo.+

39 “‘No pumanglaw ti padayo nga Israelita ket ilakona kadakayo ti bagina,+ diyo pagtrabahuen a kas maysa nga adipen.+ 40 Tratuenyo kas matangtangdanan a trabahador,+ kas makipagnanaed kadakayo. Agserbinto kadakayo agingga iti tawen ti Jubileo. 41 Ket wayawayaanyo dayta a tao agraman dagiti annakna,* ket agsubli kadagiti kabagianna. Agsublinto iti daga a tinawidna kadagidi ammana.+ 42 Ta adipenko ida nga inruarko idiay Egipto.+ Saanda koma nga ilako ti bagida a kas ti pannakailako ti maysa nga adipen. 43 Diyo maltratuen dayta a tao,+ ket masapul nga agbutengkayo iti Diosyo.+ 44 No kayatyo ti maaddaan iti adipen a lallaki ken babbai, mabalinyo ti gumatang kadagiti nasion iti aglawlawyo. 45 Mabalinyo met ti gumatang iti adipen kadagiti annak dagiti ganggannaet a residente+ ken kadagiti kameng ti pamiliada a nayanak iti dagayo. Agbalindanto a kukuayo. 46 Mabalinyo nga ited ida kas tawid dagiti annakyo, ket agtultuloydanto nga agserbi kadakuada. Mabalinyo nga usaren ida kas trabahador, ngem diyo maltratuen dagiti padayo nga Israelita.+

47 “‘No bumaknang ti ganggannaet a residente ngem pumanglaw ti maysa kadagiti padayo nga Israelita a kaarrubana ket ilakona ti bagina iti dayta a ganggannaet wenno iti miembro ti pamilia ti ganggannaet, 48 agtultuloy nga adda kalintegan ti Israelita a masaka kalpasan nga inlakona ti bagina. Mabalin a gatangen manen ti maysa kadagiti kakabsatna,+ 49 wenno angkelna, wenno kasinsinna, wenno asinoman nga asideg a kabagianna.

“‘Wenno mabalinna a sakaen ti bagina no bumaknang.+ 50 Makikuenta iti gimmatang kenkuana ket kuentaenda ti gatad a bayadanna sigun kadagiti nabati pay a tawen+ manipud panangilakona iti bagina agingga iti tawen ti Jubileo.+ Makuenta ti sueldona iti dayta a tiempo sigun iti sueldo ti matangtangdanan a trabahador.+ 51 No adu pay a tawen ti nabati, masapul nga isublina ti gatad a katupag dagita a tawen tapno mawayawayaan. 52 Ngem no sumagmamano laengen a tawen ti nabati agingga iti tawen ti Jubileo, masapul nga agkuenta ket isublina ti gatad a katupag ti nabatbati pay a tawen tapno mawayawayaan. 53 Bayat dagiti tawen a panagserbina, masapul a matrato kas matangtangdanan a trabahador. Siguraduenyo a saan a maltratuen ti amona.+ 54 Ngem no saanna a kabaelan a sakaen ti bagina sigun kadagitoy a kondision, mawayawayaanto agraman dagiti annakna* iti tawen ti Jubileo.+

55 “‘Ta adipenko dagiti Israelita. Adipenko ida nga inruarko idiay Egipto.+ Siak ni Jehova a Diosyo.