Jeremias

40 Adda mensahe ni Jehova ken Jeremias kalpasan a winayawayaan ni Nabuzaradan+ a panguluen dagiti guardia idiay Rama.+ Nakaposas ni Jeremias idi impanda kenkuana, ken kaduana ti amin a maipanaw idiay Jerusalem ken Juda a maipan idiay Babilonia. 2 Kalpasanna, ni Jeremias ket inyadayo ti panguluen dagiti guardia sa imbagana kenkuana: “Impakpakauna ni Jehova a Diosmo daytoy a didigra maibusor iti daytoy a lugar, 3 ken tinungpal dayta ni Jehova kas iti imbagana, gapu ta dakayo a tattao ket nagbasol ken Jehova ken saankayo a nagtulnog kenkuana. Isu a napasamak daytoy kadakayo.+ 4 Ita, ikkatekon dagiti posasmo. No iti panagkunam ket pagsayaatam ti sumurot kaniak idiay Babilonia, umayka, ket aywanankanto. Ngem no dimo kayat ti sumurot kaniak idiay Babilonia, saanka nga umay. Kitaem! Adda iti sangom ti intero a daga. Mapanka iti kayatmo a papanan.”+

5 Saan a makapagdesision ni Jeremias isu nga imbaga ni Nabuzaradan: “Agsublika ken Gedalias+ nga anak ni Ahikam+ nga anak ni Safan,+ a dinutokan ti ari ti Babilonia a mangituray kadagiti siudad ti Juda. Makipagyanka kenkuana a kadua dagiti umili; wenno mapanka iti kayatmo a papanan.”

Kalpasanna, inikkan ti panguluen dagiti guardia iti makan ken regalo sana pinalubosan. 6 Isu a napan ni Jeremias ken Gedalias nga anak ni Ahikam idiay Mizpa.+ Nakipagyan kenkuana a kadua dagiti umili a nabati iti daga.

7 Amin a pangulo ti armada ket adda iti tay-ak a kadua dagiti soldadoda. Idi agangay, nadamagda a ni Gedalias nga anak ni Ahikam ti dinutokan ti ari ti Babilonia a mangituray kadagiti lallaki, babbai, ken annak dagiti napanglaw iti daga a saan a naipan idiay Babilonia.+ 8 Isu a napan ken Gedalias idiay Mizpa+ da Ismael+ nga anak ni Netanias, Johanan+ ken ni Jonatan nga annak ni Karea, Seraias nga anak ni Tanhumet, dagiti annak ni Efai a Netofatita, ken ni Jezanias+ nga anak ti Maacatita, agraman dagiti soldadoda. 9 Insapata ni Gedalias nga anak ni Ahikam nga anak ni Safan kadakuada ken kadagiti soldadoda: “Dikay agbuteng nga agpaadipen kadagiti Caldeo. Agnaedkayo iti daga ken agserbikayo iti ari ti Babilonia, ket nasayaatto ti pagbanaganyo.+ 10 Agyanakto idiay Mizpa kas pannakabagiyo* kadagiti Caldeo nga umay kadatayo. Ngem masapul nga agurnongkayo iti arak, prutas ti kalgaw, ken lana. Ikabilyo dagita kadagiti pagkargaan ket agyankayo kadagiti siudad a sinakupyo.”+

11 Nadamag met ti amin a Judio idiay Moab, Ammon, ken Edom ken iti amin a dadduma pay a nasion, nga adda dagiti pinalubosan ti ari ti Babilonia nga agbati idiay Juda ken dinutokanna a mangituray kadakuada ni Gedalias nga anak ni Ahikam nga anak ni Safan. 12 Isu a nagsubli idiay Juda ti amin a Judio manipud iti amin a lugar a nakaiwarawaraanda, ket napanda ken Gedalias idiay Mizpa. Nagurnongda iti nakaad-adu nga arak ken prutas ti kalgaw.

13 Ni Johanan nga anak ni Karea ken ti amin a pangulo ti armada nga adda iti tay-ak ket napan ken Gedalias idiay Mizpa. 14 Imbagada kenkuana: “Saanmo kadi nga ammo nga imbaon ni Baalis nga ari dagiti Ammonita+ ni Ismael nga anak ni Netanias tapno patayennaka?”+ Ngem saan ida a pinati ni Gedalias nga anak ni Ahikam.

15 Imbaga ni Johanan nga anak ni Karea ken ni Gedalias idiay Mizpa idi duduada: “Palubosannak a mapan mangpatay ken ni Ismael nga anak ni Netanias, ket awanto ti makaammo. Apay koma a patayennaka, ken apay koma a mawarawara ti amin a tattao ti Juda ken matay dagiti nabati iti Juda?” 16 Ngem imbaga ni Gedalias+ nga anak ni Ahikam ken ni Johanan nga anak ni Karea: “Saanmo nga aramiden dayta, ta saan nga agpayso ti ibagbagam maipapan ken Ismael.”