Ezekiel

42 Kalpasanna, inturongnak iti makinruar a paraangan iti amianan.+ Ken impannak iti ayan dagiti siled a panganan iti abay ti espasio,+ iti amianan, a kaabay ti patakder.+ 2 Ti kaatiddog dayta manipud iti pagserkan iti amianan ket 100 a kasiko,* ken 50 a kasiko ti kaakabana. 3 Masarakan dayta iti nagbaetan ti makin-uneg a paraangan, a 20 a kasiko ti kalawana,+ ken ti pagnaan iti makinruar a paraangan. Agsisinnango dagiti balkonna ken tallo a kadsaaran ti kangatona. 4 Iti sango dagiti siled a panganan,* adda makin-uneg a pagnaan+ a 10 a kasiko ti kaakabana ken 100 a kasiko ti kaatiddogna,* ken adda iti amianan ti pagserkanda. 5 Ak-akikid dagiti siled a panganan iti maikatlo a kadsaaran ti patakder ngem kadagiti adda iti umuna ken maikadua a kadsaaran, ta dakdakkel nga espasio ti innala dagiti balkon. 6 Ta tallo a kadsaaran ti kangatoda, ngem awan ti adigida a kas kadagiti adigi ti paraangan. Isu a nail-ilet ti espasio ti maikatlo a kadsaaran ngem iti umuna ken maikadua a kadsaaran.

7 Ti makinruar a bato a pader iti asideg dagiti siled a panganan a sumilpo iti makinruar a paraangan a sumango iti dadduma a siled a panganan ket 50 a kasiko ti kaatiddogna. 8 Ti kaatiddog dagiti siled a panganan a sumango iti makinruar a paraangan ket 50 a kasiko, ngem 100 a kasiko dagidiay sumango iti santuario. 9 Adda pagserkan dagiti siled a panganan iti daya nga agturong kadagita manipud iti makinruar a paraangan.

10 Adda met dagiti siled a panganan iti uneg* ti bato a pader iti paraangan nga agpadaya, iti asideg ti espasio ken ti patakder.+ 11 Adda pagnaan iti sango dagita a kas kadagiti siled a panganan iti amianan.+ Agpada ti kaatiddog ken kaakabada, ken agpada ti pagruaran ken disenioda. Dagiti pagserkanda 12 ket kas kadagiti pagserkan dagiti siled a panganan nga agpaabagatan. Adda ridaw a pagserkan ti maysa iti rugi ti pagnaan, iti sango ti bato a pader nga agpadaya.+

13 Kinunana kaniak: “Dagiti siled a panganan iti amianan ken iti abagatan nga adda iti abay ti espasio+ ket dagiti nasantuan a siled a panganan dagiti papadi nga umasideg ken Jehova. Kanenda sadiay dagiti nasantuan a daton. Ikabilda sadiay dagiti nasantuan a daton,+ daton a bukbukel, daton gapu iti basol, ken daton gapu iti biddut, gapu ta nasantuan ti disso.+ 14 No sumrek dagiti papadi, masapul a saanda a rummuar iti nasantuan a disso nga agturong iti makinruar a paraangan no saanda nga ikkaten nga umuna dagiti badoda a nagserbi,+ ta nasantuan dagita. Agbadoda iti sabali no mapanda kadagiti disso a maipalubos kadagiti umili.”

15 Idi narukodnan ti makin-uneg a paset ti templo,* inruarnak iti ruangan a sumango iti daya,+ ket rinukodna ti intero nga aglikmut.

16 Rinukodna ti makindaya a sikigan babaen ti pagrukod a runo.* Sigun iti pagrukod a runo, 500 a runo ti kaatiddogna manipud iti ungto agingga iti sabali nga ungto.

17 Rinukodna ti makin-amianan a sikigan, ket sigun iti pagrukod a runo, 500 a runo ti kaatiddogna.

18 Rinukodna ti makin-abagatan a sikigan, ket sigun iti pagrukod a runo, 500 a runo ti kaatiddogna.

19 Rinukodna ti makinlaud a sikigan, ket sigun iti pagrukod a runo, 500 a runo ti kaatiddogna.

20 Rinukodna dayta iti uppat a sikigan. Napalawlawan dayta iti pader+ a 500 a runo ti kaatiddogna ken 500 a runo ti kaakabana,+ kas dibision iti nagbaetan ti nasantuan ken ti di nasantuan a disso.+