Levitico

11 Kinuna ni Jehova kada Moises ken Aaron: 2 “Ibagayo kadagiti Israelita, ‘Dagitoy ti sibibiag a parsua iti daga* a mabalinyo a kanen:+ 3 Tunggal animal a nagpisi ken nagsina ti kukona ken agngatingat ket mabalin a kanen.

4 “‘Ngem diyo kanen dagitoy nga animal nga agngatingat wenno nagpisi ti kukoda: ti kamelio, ta agngatingat ngem saan a nagpisi ti kukona. Ibilangyo a narugit.+ 5 Kasta met ti koneho iti kabatuan,+ ta agngatingat ngem saan a nagpisi ti kukona. Ibilangyo a narugit. 6 Kasta met ti liebre, ta agngatingat ngem saan a nagpisi ti kukona. Ibilangyo a narugit. 7 Ken ti baboy,+ ta nagpisi ken nagsina ti kukona ngem saan nga agngatingat. Ibilangyo a narugit. 8 Diyo kanen ti aniaman a lasagda wenno sagiden ti bangkayda. Ibilangyo a narugit dagita.+

9 “‘Dagitoy ti parsua iti danum a mabalinyo a kanen:+ Aniaman nga addaan iti pigar ken siksik, iti man baybay wenno karayan. 10 Ngem maibilang a narugit ti amin nga ikan iti baybay ken karayan nga awanan iti pigar ken siksik, ti amin nga aggugrupo a parsua ken dadduma pay a sibibiag a parsua* iti danum. 11 Wen, narugit dagita isu a diyo kanen ti aniaman a lasagda+ ken karugityo ti bangkayda. 12 Amin a parsua iti danum nga awanan iti pigar ken siksik ket ibilangyo a narugit.

13 “‘Dagitoy ti billit nga ibilangyo a narugit; masapul a diyo kanen ta narugitda: agila,+ kali nga agsippayot iti ikan, nangisit a buitre,+ 14 lumabaga a gikgik ken tunggal kita ti nangisit a gikgik, 15 tunggal kita ti wak, 16 abestrus, kullaaw, garseta, tunggal kita ti kali, 17 puek, kasili, atiddog ti lapayagna a kullaaw, 18 kalamon, pelikano, buitre, 19 tikbaboy, tunggal kita ti kannaway, abubilia, ken panniki. 20 Ibilangyo a narugit ti tunggal nagpayak nga agkarayam a parsua* a magna iti uppat a sakana.

21 “‘Iti amin a nagpayak nga agkarayam a parsua a magna iti uppat a sakana, ti laeng mabalinyo a kanen ket dagidiay addaan kadagiti luppo a makalagto iti daga. 22 Dagitoy ti mabalinyo a kanen: nagduduma a kita ti agtaytayab a dudon, dadduma pay a makan a dudon,+ ken kuriat. 23 Ibilangyo a narugit ti amin a dadduma pay a nagpayak nga agkarayam a parsua ken makapagna. 24 Maibilangkayo a narugit no kanenyo dagita. Asinoman a mangsagid iti bangkayda ket maibilang met a narugit agingga a lumnek ti init.+ 25 Asinoman a mangiggem iti bangkayda ket masapul a labaanna dagiti badona;+ maibilang a narugit agingga a lumnek ti init.

26 “‘Maibilang a narugit ti aniaman nga animal a nagpisi ti kukona ngem saan a nagsina ken saan nga agngatingat. Agbalin a narugit ti asinoman a mangsagid kadagita.+ 27 Ibilangyo a narugit ti tunggal sibibiag a parsua nga addaan iti gammat ken magna iti uppat a sakana. Asinoman a mangsagid iti bangkayda ket maibilang a narugit agingga a lumnek ti init. 28 Asinoman a mangawit iti bangkayda masapul a labaanna dagiti badona,+ ket maibilang a narugit agingga a lumnek ti init.+ Ibilangyo a narugit dagita.

29 “‘Dagitoy ti agkarayam a parsua iti daga nga ibilangyo a narugit: marabutit, bao,+ tunggal kita ti alutiit, 30 tekka, banias, bagangan, alibut, ken bannagaw. 31 Ibilangyo a narugit dagitoy nga agkarayam a parsua.+ Asinoman a mangsagid iti bangkayda ket maibilang a narugit agingga a lumnek ti init.+

32 “‘Maibilang a narugit ti aniaman nga alikamen a pagdissuan ti bangkayda, kayo man dayta, lupot, lalat, wenno nakersang a lupot. Masapul a mabugguan ti aniaman nga alikamen a mausar ket maibilang a narugit agingga a lumnek ti init. Kalpasan dayta, maibilangen a nadalus. 33 No agdissoda iti karamba, burakenyo dayta ket maibilang a narugit ti aniaman a nagyanna.+ 34 Aniaman a kita ti taraon a maparsiakan iti danum a naggapu iti dayta a karamba ken ti aniaman a mainum a nagyanna ket maibilang a narugit. 35 Maibilang met a narugit ti aniaman a pagdissuan ti bangkayda, urno man wenno dalikan. Masapul a maburak dayta. Narugit dagita, ket agtalinaeddanto a narugit. 36 Ngem no agdisso ti bangkayda iti ubbog wenno pagurnongan iti danum, agtalinaed a nadalus ti danum, ngem maibilang a narugit ti asinoman a makasagid kadagita a bangkay. 37 No agdisso ti bangkayda iti bin-i a maimula, maibilang a nadalus dayta. 38 Ngem no maikkan iti danum ti bin-i a pagdissuan ti bangkayda, ibilangyo a narugit dagita.

39 “‘No matay ti animal a mabalin a kanen, ti asinoman a makasagid iti bangkayna ket maibilang a narugit agingga a lumnek ti init.+ 40 Asinoman a mangan iti aniaman a paset ti natay nga animal, masapul a labaanna dagiti badona, ket maibilang a narugit agingga a lumnek ti init.+ Asinoman a mangawit iti bangkay ti animal masapul a labaanna dagiti badona, ket maibilang a narugit agingga a lumnek ti init. 41 Maibilang a narugit dagiti agkarayam nga animal iti daga.+ Saan a mabalin a kanen dagita. 42 Masapul a diyo kanen ti aniaman a parsua nga aguyas, magna iti uppat a sakana, wenno adu ti sakana, ta maibilangda a narugit.+ 43 Diyo pagbalinen a narugit ti bagiyo* babaen ti pannanganyo iti aniaman kadagitoy nga agkarayam a parsua.+ 44 Siak ni Jehova a Diosyo,+ ket masapul nga agtalinaedkayo a nadalus ken nasantuan,+ ta nasantuanak.+ Diyo ngarud rugitan ti bagiyo* babaen ti aniaman nga agkarayam a parsua iti daga. 45 Siak ni Jehova a nangiruar kadakayo idiay Egipto tapno agbalinak a Diosyo,+ ket masapul nga agbalinkayo a nasantuan,+ ta nasantuanak.+

46 “‘Daytoy ti linteg maipapan kadagiti animal, billit, sibibiag a parsua* iti danum, ken amin a parsua* nga agkarayam iti rabaw ti daga, 47 tapno mailasinyo ti narugit ken nadalus kasta met dagiti sibibiag a parsua a mabalin a kanen ken saan a mabalin a kanen.’”+