Ti Umuna a Samuel

25 Idi agangay, natay ni Samuel,+ ket naguummong ti intero nga Israel tapno sangitan ken itabonda iti balayna idiay Rama.+ Kalpasanna, napan ni David idiay let-ang ti Paran.

2 Adda idi maysa a lalaki idiay Maon+ a ti trabahona ket adda idiay Carmelo.*+ Nakabakbaknang dayta a lalaki; 3,000 ti karnerona ken 1,000 ti kaldingna, ket madama idi a pukpukisanna dagiti karnerona idiay Carmelo. 3 Nabal+ ti naganna, ken Abigail+ ti nagan ti asawana. Mannakaawat ken napintas ti asawana ngem isu ket nauyong ken dakes ti ugalina.+ Isu ket nagtaud iti pamilia ni Caleb.+ 4 Nadamag ni David idiay let-ang a pukpukisan ni Nabal dagiti karnerona. 5 Nangibaon ni David iti 10 a tattaona a mapan ken Nabal, ket imbagana kadakuada: “Mapankayo idiay Carmelo, ket inton makitayo ni Nabal, ibagayo a komkomustaek. 6 Kunayonto, ‘Sapay koma ta agpaut ti biagmo ken nasayaat ti kasasaadmo,* ti sangakabbalayam, ken ti amin nga adda kenka. 7 Nadamagko a pukpukisam dagiti karnerom. Idi adda iti asidegmi dagiti agipaspastor iti arbanmo, saanmi ida a dinangdangran,+ ken awan a pulos ti napukaw kadagiti tarakenda bayat ti kaaddada idiay Carmelo. 8 Uray damagem kadagiti adipenmo, ibagadanto kenka. Sapay koma ta patgam ti kiddaw dagiti tattaok ta immaykami iti naragsak nga aldaw.* Pangngaasim ta ikkam dagiti adipenmo ken ti anakmo* a ni David iti aniaman a maitedmo.’”+

9 Isu a napan dagiti tattao ni David ket indanonda ken Nabal ti amin a paibagbaga ni David. Idi naibagadan, 10 kinuna ni Nabal kadagiti tattao ni David: “Asino dayta a David nga anak ni Jesse? Adu nga adipen itan ti agtaltalaw kadagiti amoda.+ 11 Apay koma nga alaek ti tinapayko ken ti danumko ken ti karne a pinartik para kadagiti agpukpukis iti karnerok tapno laeng itedko kadagiti tattao a diak am-ammo?”

12 Nagsubli dagiti tattao ni David ket impulongda kenkuana ti amin nga imbaga ni Nabal. 13 Kinuna a dagus ni David kadagiti tattaona: “Ibarikesyo dagiti espadayo!”+ Isu nga imbarikesda amin ti espadada ket kasta met ti inaramid ni David. Agarup 400 a lallaki ti kakadua ni David a simmang-at ket 200 a lallaki ti nagbati nga agbantay iti gargaret.

14 Kabayatanna, maysa kadagiti adipen ti nangipadamag ken Abigail nga asawa ni Nabal: “Kitaem! Adda dagiti imbaon ni David manipud let-ang a mangkomusta ken apomi, ngem pinagsasawanna ida.+ 15 Nakasaysayaat kadakami dagidiay a lallaki. Saandakami a pulos inan-ano ken tinaktakawan bayat ti panagkakaduami idiay away.+ 16 Kasda la pader a nangsalaknib kadakami iti aldaw ken rabii bayat ti panagipastormi iti arban. 17 Panunotem ita a naimbag no ania ti masapul nga aramidem, ta sigurado nga adda dakes a mapasamak iti apomi ken iti intero a sangakabbalayanna,+ ta awan serserbina* a tao+ ken awan ti makaitured a makisarita kenkuana.”

18 Isu a nagdardaras a nangala ni Abigail+ iti 200 a tinapay, dua a dadakkel a karamba a napno iti arak, lima a karnero a naparti, lima a sea a sukat* ti kinirog a bukel, ken 100 a bibingka a pasas, ken 200 a bibingka ti pinitpit a higos ket insakayna amin dagita kadagiti asno.+ 19 Kalpasanna, kinunana kadagiti adipenna: “Umunakayon ket sumarunoak.” Ngem dina pulos imbaga dayta iti asawana a ni Nabal.

20 Bayat a sisasakay iti asno ken sililimed a sumalsalog iti bantay, sumalsalog met idin ni David ken dagiti tattaona nga agturong kenkuana, ket sinabatna ida. 21 Kinuna ni David: “Sayang laeng ti panagbannogko a nangsalaknib iti amin a kukua daytoy a tao idiay let-ang. Awan a pulos ti napukaw iti amin a kukuana,+ ngem sinubadanna iti dakes ti naimbag nga inaramidko.+ 22 Balsen koma ti Dios dagiti kabusor ni David.* Nakarkaro pay koma ti panangdusana kadakuada no adda lalaki* nga iteddak a sibibiag agingga iti bigat.”

23 Idi nakita ni Abigail ni David, dagus a dimsaag iti asno sa nagruknoy ken David ken nagrukob 24 iti sakaananna, ket kinunana: “Apo, siak latta koman ti singirem iti napasamak. Palubosam koma a makisarita kenka daytoy adipenmo, ket denggem koma ti ibaga daytoy adipenmo. 25 Pangngaasim apo, ta baybay-am koma lattan daytoy awan serserbina a tao a ni Nabal,+ ta isu ket kas iti naganna. Nabal* ti naganna ket maag isuna. Ngem saan ngamin a nakita daytoy adipenmo dagiti imbaonmo a tattaom. 26 Ket ita, apo, isapatak kenka ken iti nagan ti sibibiag a Dios a ni Jehova, ni Jehova ti nangigawid kenka+ a mangpatay+ ken mangusar iti bukodmo nga ima a mangibales.* Sapay koma apo ta dagiti kabusormo ken dagidiay mayat a mangdangran kenka ket agbalin a kas ken Nabal. 27 Apo, awatem koma daytoy sagut*+ nga inyeg kenka daytoy adipenmo a para kadagiti tattaom.+ 28 Pangngaasim, apo, ta pakawanem ti basol daytoy adipenmo, ta sigurado nga iyaramidannaka ni Jehova iti agpaut a balay,+ ta makilablabanka kadagiti gubat ni Jehova,+ ket awan ti dakes a nasarakan kenka iti unos ti panagbiagmo.+ 29 Apo, no addanto mangdarup kenka ken mayat a mangpatay kenka, sigurado a salaknibannakanto ni Jehova a Diosmo, ngem ipalladawnanto ti biag* dagiti kabusormo a kas iti pannakaipalladaw dagiti bato manipud iti pallatibong. 30 Apo, inton naaramiden ni Jehova ti amin a naimbag nga inkarina kenka ken piliennaka a kas lider ti Israel,+ 31 awanto ti pagbabawyam wenno pakakonsiensiaam* a nakapatayka ken nagibaleska* nga awan gapgapuna.+ Apo, inton bendisionannaka ni Jehova, laglagipemto koma daytoy adipenmo a babai.”

32 Kinuna ngarud ni David ken Abigail: “Madaydayaw koma ni Jehova a Dios ti Israel a nangibaon kenka a mangsabat kaniak ita nga aldaw! 33 Ket mabendisionan koma ti kinamanakemmo! Mabendisionanka koma iti pananglappedmo kaniak ita nga aldaw a pumatay+ ken agibales.* 34 Ta no saan, isapatak iti nagan ni Jehova a sibibiag a Dios ti Israel a nangigawid kaniak a mangdangran kenka,+ awan koman ti nabati a lalaki* nga adipen ni Nabal inton bigat,+ no saanka a nagdardaras a simmabat kaniak.”+ 35 Inawat ngarud ni David dagiti intedna kenkuana, ket kinunana: “Saankan nga agdanag ket agawidkan. Nangngegko dagiti imbagam ket aramidek ti kiddawmo.”

36 Nagawid ni Abigail idiay balayda ket nasangpetanna ni Nabal nga agpiespiesta a kasla ari. Nakaragragsak ni Nabal* ken napalalo ti bartekna. Awan a pulos ti imbagbaga ni Abigail kenkuana agingga a naglawag iti bigat. 37 Iti agsapa, idi nausawanen ti bartek ni Nabal, imbaga kenkuana ti asawana dagitoy a banag. Ket kimmapsut ti pusona ken naparalisado. 38 Kalpasan ti agarup 10 nga aldaw, pinatay ni Jehova ni Nabal.

39 Idi nadamag ni David a natayen ni Nabal, kinunana: “Maidaydayaw koma ni Jehova, a nangidepensa iti kasok+ maipapan iti panangumsi kaniak ni Nabal+ ken nanglapped kaniak nga adipenna nga agaramid iti aniaman a dakes.+ Dinusa ni Jehova ni Nabal gapu iti kinadakesna!” Kalpasanna, impaibaga ni David ken Abigail ti panggepna a mangala kenkuana kas asawana. 40 Isu a napan dagiti adipen ni David ken Abigail idiay Carmelo ket imbagada kenkuana: “Imbaonnakami ni David a mangala kenka kas asawana.” 41 Dagus a timmakder ken nagruknoy ket kinunana: “Situtulokak nga agbalin nga adipenmo, apo, a mangbuggo kadagiti saka+ dagiti adipenmo.” 42 Nagdardaras ni Abigail+ a timmakder ket nagsakay iti asnona a sinaruno ti lima nga adipenna a babbai; kimmuyog ni Abigail kadagiti imbaon ni David ket nagbalin nga asawana.

43 Innala met ni David ni Ahinoam+ manipud Jezreel+ kas asawana; ket isuda a dua ti nagbalin nga assawana.+

44 Ngem inted ni Saul ti anakna a ni Mical,+ nga asawa ni David, ken Palti+ nga anak ni Lais, a naggapu idiay Galim.