Ti Maikadua a Cronicas

11 Idi nakadanon ni Rehoboam idiay Jerusalem, dagus nga inummongna ti sangakabbalayan ti Juda ken ti Benjamin,+ 180,000 a nasanay* a mannakigubat, tapno makilabanda iti Israel ken maisubli ti pagarian ken Rehoboam.+ 2 Kalpasanna, kinuna ni Jehova ken Semaias+ nga adipen ti pudno a Dios: 3 “Ibagam ken Rehoboam nga anak ni Solomon nga ari ti Juda, ken iti amin nga Israelita nga adda iti Juda ken Benjamin, 4 ‘Daytoy ti kinuna ni Jehova: “Dikay mapan makilaban kadagiti kakabsatyo. Agawidkayon, ta siak ti nangimaniobra iti daytoy.”’”+ Gapuna, nagtulnogda iti sao ni Jehova ket nagawidda ken saanda a nakilaban ken Jeroboam.

5 Nagnaed ni Rehoboam idiay Jerusalem ken nangibangon kadagiti napaderan a siudad iti Juda. 6 Iti kasta, tinarimaanna* ti Betlehem,+ Etam, Tekoa,+ 7 Bet-zur, Soco,+ Adulam,+ 8 Gat,+ Maresa, Zif,+ 9 Adoraim, Lakis,+ Azeka,+ 10 Zora, Aijalon,+ ken Hebron,+ dagiti napaderan a siudad nga adda idiay Juda ken Benjamin. 11 Pinabilegna pay dagiti napaderan a siudad ken nangisaad kadagita kadagiti komander ken inikkanna ida iti taraon, lana, ken arak. 12 Nangted met kadagiti dakkel a kalasag ken gayang iti amin a nagduduma a siudad; kasta unay ti panangpabilegna kadagita. Intultuloyna nga inturayan ti Juda ken Benjamin.

13 Simmuporta kenkuana dagiti papadi ken Levita nga adda iti intero nga Israel ket pimmanawda iti amin a teritoriada. 14 Pinanawan dagiti Levita dagiti pagpastoran ken sanikuada+ ket immakarda idiay Juda ken Jerusalem, ta inikkat ida ni Jeroboam ken dagiti annakna kas papadi ni Jehova.+ 15 Nangdutok ngarud ni Jeroboam iti bukodna a papadi nga agserbi kadagiti nangato a disso+ ken kadagiti kasla kalding a demonio*+ ken kadagiti urbon a baka nga inaramidna.+ 16 Simmurot kadagiti papadi ken Levita dagiti umili a naggapu iti amin a tribu ti Israel a naimpusuan a mangsapsapul ken Jehova a Dios ti Israel ket napanda idiay Jerusalem tapno agidatonda ken Jehova a Dios dagidi ammada.+ 17 Tallo a tawen a pinatibkerda ti kinaari ti Juda ken sinuportaranda ni Rehoboam nga anak ni Solomon, ta tallo a tawen a nagnada iti dalan da David ken Solomon.

18 Kalpasanna, inasawa ni Rehoboam ni Mahalat nga anak ni Jerimot nga anak ni David; asawa ni Jerimot ni Abihail nga anak ni Eliab+ nga anak ni Jesse. 19 Idi agangay, naaddaanda iti annak a da Jeus, Semarias, ken Zaham. 20 Inasawa pay ni Rehoboam ni Maaca nga apoko ni Absalom.+ Idi agangay, naaddaanda iti annak a da Abias,+ Atai, Ziza, ken Selomit. 21 Ad-adda nga inayat ni Rehoboam ni Maaca nga apoko ni Absalom ngem iti amin a dadduma pay nga assawana,+ ta naaddaan iti 18 nga assawa ken 60 a sabali pay nga assawa, ket naaddaan iti annak a 28 a lallaki ken 60 a babbai. 22 Iti kasta, dinutokan ni Rehoboam ni Abias nga anak ni Maaca kas pannakaulo ken lider dagiti kakabsatna, ta panggepna a pagbalinen nga ari. 23 Ngem nagtignay a nainsiriban ket imbaonna* ti dadduma nga annakna a lallaki iti amin a paset ti Juda ken Benjamin, iti amin a napaderan a siudad,+ ket inikkanna ida iti adu a taraon ken adu nga assawa.