Josue

6 Nairikep a naimbag dagiti ruangan ti Jerico gapu kadagiti Israelita; awan idi ti rumrummuar ken awan ti sumsumrek.+

2 Kinuna ni Jehova ken Josue: “Itedko kadakayo ti Jerico ken ti arina agraman dagiti nabileg a mannakigubatna.+ 3 Dakayo amin a soldado, agmartsakayo iti aglawlaw ti siudad, maminsan iti kada aldaw. Kasta ti aramidenyo iti uneg ti innem nga aldaw. 4 Iti sango ti Lakasa, masapul nga adda pito a padi a mangiggem iti pito a tangguyob a sara ti kalakian a karnero. Ngem iti maikapito nga aldaw, mamimpito a rikusenda ti siudad ket masapul a puyoten dagiti papadi dagiti tangguyob.+ 5 Apaman a mangngegyo ti uni* ti tangguyob, agpukkawkayo amin a kas iti panagriaw dagiti dumarup a soldado. Marbanto a mamimpinsan dagiti pader+ ket nawayanton ti tunggal maysa a sumrek iti siudad.”

6 Inayaban ni Josue nga anak ni Nun ti amin a papadi ket kinunana: “Bagkatenyo ti lakasa ti tulag, ket pito kadakayo ti magna iti sango ti Lakasa ni Jehova a nakaiggem iti pito a tangguyob.”+ 7 Kinuna met ni Josue kadagiti tattao: “Agsaganakayo nga agmartsa iti aglawlaw ti siudad, ket masapul nga umun-una dagiti armado a soldado+ ngem iti Lakasa ni Jehova.” 8 Kas imbilin ni Josue kadagiti tattao, nagna ti pito a papadi a nakaiggem iti tangguyob iti sanguanan ni Jehova a puypuyotenda dagiti tangguyob. Sarsarunuen ida dagiti mangbagbagkat iti lakasa ti tulag ni Jehova. 9 Dagiti armado a soldado ti immuna a nagmartsa, ken sinaruno dagiti nakatangguyob a papadi, sa nagmartsa ti guardia iti likud ti Lakasa bayat nga agtultuloy ti pannakapuyot dagiti tangguyob.

10 Binilin ni Josue dagiti tattao: “Dikay agpukpukkaw ken dikay agtagtagari. Dikay agsasao agingga nga ibagak, ‘Agpukkawkayo!’ Ket agpukkawkayto.” 11 Imbilin ni Josue nga irikusda ti Lakasa ni Jehova iti aglawlaw ti siudad iti maminsan. Kalpasanna, nagsublida iti kampoda ket imyanda sadiay.

12 Kabigatanna, nasapa a bimmangon ni Josue ket binagkat dagiti papadi ti Lakasa+ ni Jehova. 13 Nagna ti pito a nakatangguyob a papadi iti sango ti Lakasa ni Jehova a puypuyotenda dagiti tangguyob. Agmarmartsa dagiti armado a soldado iti sanguananda ken ti guardia iti likud ti Lakasa ni Jehova bayat nga agtultuloy ti pannakapuyot dagiti tangguyob. 14 Naminsan a rinikusda ti siudad iti maikadua nga aldaw sada nagsubli iti kampoda. Kasta ti inaramidda iti uneg ti innem nga aldaw.+

15 Iti maikapito nga aldaw, nasapada a bimmangon, ket namimpito a rinikusda ti siudad iti isu met la a pamay-an. Iti dayta laeng nga aldaw a namimpito a rinikusda ti siudad.+ 16 Iti maikapiton a panagrikusda, pinuyotan dagiti papadi dagiti tangguyob ket kinuna ni Josue kadagiti tattao: “Agpukkawkayo,+ ta inteden ni Jehova kadakayo ti siudad! 17 Masapul a madadael nga interamente ti siudad ken amin nga adda iti dayta;+ kukua amin dagita ni Jehova. Ni laeng Rahab+ a balangkantis ti maisalakan, agraman ti amin nga adda iti balayna, gapu ta inlemmengna dagiti imbaontayo nga espia.+ 18 Adaywanyo dagiti bambanag a masapul a madadael,+ tapno saankayo a masulisog a mangala kadagita,+ ta no kasta ti mapasamak, mairaman a madadael ti kampo dagiti Israelita gapu ta nangyegkayo iti pakadidigraanna.*+ 19 Ngem nasantuan para ken Jehova ti amin a pirak, balitok, ken dagiti alikamen a gambang ken landok.+ Rumbeng a maikabil dagita iti pagidulinan iti gameng ni Jehova.”+

20 Nagpukkaw dagiti Israelita idi mapuyotan dagiti tangguyob.+ Apaman a nangngegda ti uni dagiti tangguyob ken nagpukkawda a kas iti panagikkis dagiti dumarup a makigubat, narba a dagus dagiti pader.+ Kalpasanna, nawayadan a simrek iti siudad ket sinakupda dayta. 21 Pinapatayda iti espada ti amin a lallaki ken babbai, ubbing ken natataengan, ken dagiti baka, karnero, ken asno iti intero a siudad.+

22 Imbaga ni Josue iti dua a lallaki a napan nagespia iti daga: “Inkayo iti balay ti balangkantis, ket iruaryo agraman ti amin nga adda iti balayna kas inkariyo kenkuana.”+ 23 Isu nga inruar dagiti espia ni Rahab agraman da tatang ken nanangna, kakabsatna, ken amin nga adda iti balayna. Inruarda ti intero a pamiliana+ ket impanda ida iti natalged a lugar iti ruar ti kampo dagiti Israelita.

24 Pinuoranda ti siudad ken ti isuamin nga adda iti dayta. Ngem dagiti pirak, balitok, ken dagiti alikamen a gambang ken landok ket inkabilda iti pagidulinan iti gameng iti balay ni Jehova.+ 25 Ni laeng Rahab a balangkantis ken ti intero a pamilia ni amana ken dagiti adda iti balayna ti saan a pinapatay ni Josue.+ Ket nagnaed ni Rahab iti Israel+ gapu ta inlemmengna dagiti imbaon ni Josue nga agespia iti Jerico.+

26 Iti dayta a tiempo, insapata ni Josue:* “Ilunod koma ni Jehova ti tao a mangpadas a mangibangon iti siudad ti Jerico. No ipasdekna ti pundasion, matay ti inauna nga anakna, ken no ikabilna dagiti ruangan, matay ti inaudi nga anakna.”+

27 Adda idi ni Jehova ken ni Josue,+ ket nagbalin a nakalatlatak iti intero a daga.+