Eclesiastes
9 Gapuna, impapusok amin dagitoy ken maibagak a dagiti nalinteg ken masirib, kasta met dagiti aramidda, ket adda iti ima ti pudno a Dios.+ Saan nga ammo dagiti tattao ti ayat ken gura a napasamak iti kasakbayanda. 2 Agpapada ti pagbanagan* ti amin,+ ti nalinteg ken ti dakes,+ ti naimbag ken ti nadalus ken ti narugit, dagiti agidatdaton ken dagiti saan nga agidatdaton. Ti naimbag ket kas met laeng iti managbasol; ti agsapsapata ket kas met laeng iti naannad nga agsapata. 3 Daytoy ti makapaupay a mapaspasamak iti baba ti init: Gapu ta agpapada ti pagbanagan* ti amin,+ napno met iti dakes ti puso ti tattao; ken adda kinamauyong iti pusoda bayat ti panagbiagda, sa mataydan!*
4 Adda namnama ti asinoman a kadua dagiti sibibiag, ta nasaysayaat ti sibibiag nga aso ngem ti natay a leon.+ 5 Ta ammo* dagiti sibibiag a mataydanto,+ ngem awan a pulos ti ammo dagiti natay,+ awanen ti gunggonada,* ta nalipatanen ti amin a pakalaglagipanda.+ 6 Napukaw metten ti ayat, gura, ken imonda, ket awanen ti bingayda iti maar-aramid iti baba ti init.+
7 Mapanka, kanem ti taraonmo a sirarag-o, ken inumem ti arakmo a naragsak ti pusom,+ ta naragsakan ti pudno a Dios kadagiti aramidmo.+ 8 Kanayon koma nga agbadoka iti puraw,* ket dimo liplipatan a lanaan ti ulom.+ 9 Tagiragsakem ti biag a kadua ti ay-ayatem nga asawa+ iti amin nga aldaw ti awan serserbina a biagmo, nga inted ti Dios kenka iti baba ti init, iti amin nga aldaw ti kaawan serserbim, ta dayta ti gunggonam* iti biag ken iti napasnek a panagtrabaho a nagbannogam iti baba ti init.+ 10 Aniaman a maaramidan ta imam, ikagumaam nga aramiden, ta awan ti aramid wenno plano wenno pannakaammo wenno sirib iti Tanem,*+ a papanam.
11 Adda pay nakitak iti baba ti init, a saan a kanayon a dagiti napartak ti mangabak iti lumba, wenno dagiti nabileg ti kanayon a mangabak iti gubat,+ wenno dagiti masirib ti kanayon nga addaan iti taraon, wenno dagiti nalaing ti kanayon a nabaknang,+ wenno dagiti addaan pannakaammo ti kanayon nga agballigi,+ ta dumteng kadakuada amin ti tiempo ken di ninamnama* a pasamak. 12 Ta saan nga ammo ti tao ti tiempona.+ No kasano a makalap dagiti ikan iti makapapatay nga iket, ken matiliw dagiti billit iti silo, masiluan met ti annak ti tattao iti tiempo ti didigra,* inton bigla a dumteng dayta kadakuada.
13 Napaliiwko met daytoy maipapan iti sirib iti baba ti init—ket nasdaawak: 14 Adda bassit a siudad a manmano ti tattaona; ket rinaut dayta ti maysa a nabileg nga ari ken pinalawlawanna iti dadakkel a pader a pangraut. 15 Adda agnanaed sadiay a napanglaw ngem masirib a lalaki, ket insalakanna ti siudad babaen ti siribna. Ngem awan ti nakalagip iti dayta a napanglaw a tao.+ 16 Kinunak iti bagik: ‘Nasaysayaat ti sirib ngem ti kinabileg;+ kaskasdi, malalais ti sirib ti napanglaw a tao, ken saan a maipangag ti sasaona.’+
17 Nasaysayaat nga ipangag ti kalmado a sasao ti masirib ngem dagiti pukkaw ti mangiturturay kadagiti maag.
18 Nasaysayaat ti sirib ngem dagiti armas a pakigubat, ngem ti maysa laeng a managbasol madadaelna ti adu a kinaimbag.+