Ezekiel

34 Kinuna manen kaniak ni Jehova: 2 “Anak ti tao, agipadtoka maibusor kadagiti pastor ti Israel. Agipadtoka, ket ibagam kadakuada, ‘Daytoy ti kinuna ti Kangatuan* nga Apo Jehova: “Kaasi pay dagiti pastor ti Israel,+ a ti bagbagida laeng ti pakpakanenda! Saan aya a ti arban ti pakanen koma dagiti pastor?+ 3 Kankanenyo ti taba, agbadbadokayo iti delana, ken parpartienyo ti kalukmegan nga animal,+ ngem saanyo a pakpakanen ti arban.+ 4 Saanyo a pinapigsa dagiti nakapuy wenno pinaimbag dagiti masakit wenno binedbedan dagiti nasugatan wenno insubli dagiti nayaw-awan wenno sinapul dagiti napukaw;+ no di ket sigugubsang ken siuulpit nga inturayanyo ida.+ 5 Naiwarawarada gapu ta awan ti pastor;+ naiwarawarada ken kinnan ida ti tunggal atap nga animal iti tanap. 6 Nayaw-awan dagiti karnerok iti amin a bantay ken iti tunggal nangato a turod; naiwarawara dagiti karnerok iti intero a daga, ket awan ti mangbirbirok wenno mangsapsapul kadakuada.

7 “‘“Gapuna, dakayo a pastor, denggenyo ti sao ni Jehova: 8 ‘“Ikarik,” kuna ti sibibiag a Kangatuan nga Apo Jehova, “gapu ta kinnan ti tunggal atap nga animal iti tanap dagiti karnerok, ta awan ti pastor, ken saan a binirok dagiti pastorko dagiti karnerok; no di ket pinakpakanda laeng ti bagbagida, ken saanda a pinakan dagiti karnerok,”’ 9 gapuna, dakayo a pastor, denggenyo ti sao ni Jehova. 10 Daytoy ti kinuna ti Kangatuan nga Apo Jehova: ‘Busorek dagiti pastor, ket singirekto ida gapu kadagiti karnerok,* ken saandanton a pakanen* dagiti karnerok,+ ken saanton a pakanen dagiti pastor ti bagbagida. Ispalekto dagiti karnerok iti ngiwatda, ket saandanton a kanen ida.’”

11 “‘Ta daytoy ti kinuna ti Kangatuan nga Apo Jehova: “Adtoyak, birokekto a mismo dagiti karnerok, ket aywanak ida.+ 12 Aywanakto dagiti karnerok a kas iti pastor a nakasarak kadagiti naiwarawara a karnerona ket pakanenna ida.+ Ispalekto ida iti amin a lugar a nakaiwarawaraanda iti aldaw dagiti ulep ken nakaro a kinasipnget.+ 13 Iruarkonto ida kadagiti ili ket ummongek ida manipud kadagiti daga ken ipanko ida iti dagada ken pakanek ida kadagiti bantay ti Israel,+ iti abay dagiti pagayusan iti danum ken iti abay ti amin a pagnaedan a disso iti daga. 14 Pakanekto ida iti nasayaat a pagpastoran, ket agarabdanto kadagiti nangato a bantay ti Israel.+ Aginanadanto iti nasayaat a disso a pagaraban,+ ket agarabdanto kadagiti nasayaat a pagpastoran kadagiti bantay ti Israel.”

15 “‘“Pakanekto a mismo dagiti karnerok,+ ket paginanaekto ida,”+ kuna ti Kangatuan nga Apo Jehova. 16 “Birokekto ti napukaw,+ isublikto ti nayaw-awan, bedbedakto ti nasugatan, ken papigsaekto ti masakit. Ngem papatayekto ti nalukmeg ken napigsa ket pakanekto iti pannakaukom.”

17 “‘No maipapan kadakayo a karnerok, daytoy ti kinuna ti Kangatuan nga Apo Jehova: “Ukomekto dagiti karnerok, ken ukomekto dagiti kalakian a karnero, ken dagiti kalakian a kalding.+ 18 Dikay pay kadi napnek a nangan kadagiti kasayaatan a pagpastoran? Masapul kadi nga ipayatpayatyo pay ti dadduma a pagpastoran? Ket kalpasan nga ininumyo ti kalitnawan a danum, masapul kadi a rugitanyo babaen ti panangibaddebaddekyo? 19 Rumbeng kadi a mangan dagiti karnerok iti pagpastoran nga impayatpayatyo ken uminum iti danum a rinugitanyo babaen ti panangibaddebaddekyo?”

20 “‘Gapuna, daytoy ti kinuna kadakuada ti Kangatuan nga Apo Jehova: “Adtoyak, ukomekto a mismo ti nalukmeg ken ti nakuttong a karnero, 21 ta itultuloyyo ti agiduron babaen ti bakrang ken abagayo ken sangduenyo ti amin a masakit agingga a maiwarawarayo ida iti ruar. 22 Isalakankonto dagiti karnerok, ket saanton a kanen ida ti dadduma nga animal;+ ukomekto dagiti karnero. 23 Mangdutokakto iti pastorda,+ ni adipenko a David,+ ket pakanennanto ida. Pakanennanto a mismo ida ket isunto ti pastorda.+ 24 Siak, ni Jehova, agbalinakto a Diosda,+ ket ni adipenko a David ti panguluen iti tengngada.+ Siak, ni Jehova, ti nagsao.

25 “‘“Mangaramidakto kadakuada iti tulag ti kappia,+ ket pukawekto iti daga dagiti narungsot nga atap nga animal,+ tapno natalged ti panagnaedda iti let-ang ken ti pannaturogda iti kabakiran.+ 26 Pagbalinekto ida ken ti aglawlaw ti turodko a maysa a bendision,+ ket pagtuduekto iti umiso a tiempo. Agbuyatto dagiti bendision a kas iti tudo.+ 27 Agbunganto dagiti kayo iti tanap, ken mangtedto iti apit ti daga,+ ket agnaeddanto a sitatalged iti daga. Maammuandanto a siak ni Jehova inton tukkolek dagiti sangolda+ ken ispalek ida kadagidiay nangadipen kadakuada. 28 Saanto idan a tiliwen dagiti nasion, ken saanto idan nga alun-onen dagiti narungsot nga animal iti daga, ket agnaeddanto a sitatalged, nga awan ti pagbutnganda.+

29 “‘“Iyaramidakto ida iti nalatak a pagmulaan,* ket saandanton a matay gapu iti nakaro a bisin iti daga,+ ken saanto idan nga ibabain dagiti nasion.+ 30 ‘Maammuandanto a siak, ni Jehova a Diosda, addaak kadakuada ket isuda ti ilik,+ ti sangakabbalayan ti Israel,’ kuna ti Kangatuan nga Apo Jehova.”’

31 “‘No maipapan kadakayo a karnerok,+ dagiti karnero nga ay-aywanak, tattaokayo laeng, ket siak ti Diosyo,’ kuna ti Kangatuan nga Apo Jehova.”