Deuteronomio

9 “Denggenyo, O Israel, ballasiwenyo ita nga aldaw ti Jordan+ ket sumrekkayo ken sakupenyo dagiti nasion a dakdakkel ken nabilbileg ngem dakayo,+ dagiti dadakkel a siudad a dumanon idiay langit ti paderna,*+ 2 tattao a nabibileg ken natatayag, annak dagiti Anakim,+ a naammuan ken nadamagyo nga awan ti makaabak kadakuada. 3 Gapuna, ammuenyo ita nga aldaw nga umun-una a bumallasiw ni Jehova a Diosyo.+ Isu ket kasla mangibus nga apuy+ ket ikisapnanto ida. Parmekennanto ida iti sanguananyo tapno dagus a mapapanaw* ken madadaelyo ida, kas inkari kadakayo ni Jehova.+

4 “Diyo ibaga iti pusoyo inton papanawen ida ni Jehova a Diosyo iti sanguananyo, ‘Gapu iti kinalintegko nga impannak ni Jehova iti daytoy a daga a tagikuaek.’+ Imbes ketdi, papanawen ni Jehova dagitoy a nasion iti sanguananyo+ gapu iti kinadakesda. 5 Saan a gapu iti kinalintegyo wenno iti kinapasnek ti pusoyo a matagikuayo ti dagada. Imbes ketdi, papanawen ni Jehova a Diosyo dagitoy a nasion gapu iti kinadakesda,+ ken tapno matungpal ni Jehova ti inkarina kadagidi ammayo, da Abraham,+ Isaac,+ ken Jacob.+ 6 Ammuenyo ngarud a saan a gapu iti kinalintegyo nga ited ni Jehova a Diosyo daytoy nasayaat a daga a tagikuaenyo, ta kinapudnona, nasukirkayo.*+

7 “Laglagipenyo—diyo liplipatan—a pinagpungtotyo ni Jehova a Diosyo idiay let-ang.+ Nasukirkayon ken Jehova sipud idi pimmanawkayo idiay Egipto agingga a nakadanonkayo ditoy.+ 8 Pinagpungtotyo pay ni Jehova idiay Horeb, ket napalalo ti unget ni Jehova nga uray la dandaninakayo inibus.+ 9 Idi simmang-atak iti bantay tapno awatek dagiti tapi a bato,+ a nakaisuratan ti tulag ni Jehova kadakayo,+ nagyanak iti bantay iti 40 nga aldaw ken 40 a rabii,+ ket saanak a nangan wenno imminum. 10 Kalpasanna, inted kaniak ni Jehova ti dua a tapi a bato. Naisurat kadagitoy babaen ti ramay ti Dios dagiti imbaga kadakayo ni Jehova iti bantay manipud iti apuy idi aldaw a naguummongkayo sadiay.+ 11 Kalpasan ti 40 nga aldaw ken 40 a rabii, inted kaniak ni Jehova ti dua a tapi a bato, a nakaisuratan ti tulag, 12 ket kinuna ni Jehova, ‘Tumakderka, alistuam ti sumalog, ta nagaramid iti dakes dagiti tattao nga inruarmo idiay Egipto.+ Nagalistoda a simmina iti dalan nga imbilinko a surotenda. Adda inaramidda a metal nga imahen.’*+ 13 Kinuna kaniak ni Jehova, ‘Nakitak a nasukir* dagitoy a tattao!+ 14 Bay-annak a mangibus kadakuada ken punasek ti naganda iti baba ti langit, ket pagbalinenka a maysa a nasion a nabilbileg ken ad-adu ngem kadakuada.’+

15 “Iti kasta, simmalogak bayat a sumsumged idi ti bantay,+ ket iggemko ti dua a tapi a nakaisuratan ti tulag.+ 16 Nakitak ti panagbasolyo ken Jehova a Diosyo! Nangaramidkayo iti metal nga urbon a baka. Nagalistokayo a simmina iti dalan nga imbilin ni Jehova a surotenyo.+ 17 Gapuna, imbarsakko ti dua a tapi nga iggemko ket naburburakda iti sanguananyo.+ 18 Kalpasanna, nagruknoyak iti sanguanan ni Jehova, kas idi damo, iti 40 nga aldaw ken 40 a rabii. Saanak a nangan wenno imminum,+ gapu iti amin a basolyo ta nagaramidkayo iti dakes iti imatang ni Jehova ket pinagpungtotyo. 19 Nagbutengak gapu iti nakaro a pungtot kadakayo ni Jehova,+ nga uray la dandaninakayo inibus. Ngem dimngeg met kaniak ni Jehova iti daydi a gundaway.+

20 “Nakapungtot unay ni Jehova ken ni Aaron, ket kayatna koman a patayen,+ ngem nagpakpakaasiak met maipaay ken Aaron iti daydi a gundaway. 21 Kalpasanna, innalak ti inaramidyo, ti urbon a baka+ a nagbasolanyo, ket pinuorak; rinumekko agingga a nagbalin a kas kapino ti tapok, sa imbellengko iti danum nga agay-ayus manipud iti bantay.+

22 “Pinagpungtotyo manen ni Jehova idiay Tabera,+ Massa,+ ken Kibrot-hataava.+ 23 Idi imbaonnakayo ni Jehova manipud Kades-barnea+ a kinunana, ‘Inkay tagikuaen ti daga a sigurado nga itedko kadakayo!’ nagsukirkayo manen iti bilin ni Jehova a Diosyo,+ ket saankayo a namati+ kenkuana ken dikay nagtulnog. 24 Nagsukirkayo ken Jehova sipud idi am-ammokayo.

25 “Gapuna, nagruknoyak iti sanguanan ni Jehova iti 40 nga aldaw ken 40 a rabii,+ gapu ta imbaga ni Jehova nga ibusennakayo. 26 Impakpakaasik ken Jehova, ‘O Kangatuan* nga Apo Jehova, saanmo koma a dadaelen dagiti adipenmo. Kukuam* ida+ ken sinubbotmo babaen ti naindaklan a bilegmo ken inruarmo ida idiay Egipto babaen ti mannakabalin nga imam.+ 27 Lagipem dagiti adipenmo a da Abraham, Isaac, ken Jacob.+ Palabsem koma ti kinasukir dagitoy a tattao, ti kinadakesda, ken ti basolda.+ 28 Amangan no ibaganto dagiti tattao iti daga a nangiruaram kadakami: “Saan a kabaelan ni Jehova nga ipan ida iti daga nga inkarina kadakuada. Impanna ida idiay let-ang tapno papatayenna ida gapu iti gurana kadakuada.”+ 29 Ad-adipenmo ida ken kukuam* ida,+ nga inruarmo babaen ti dakkel a pannakabalinmo ken nabileg* a takiagmo.’+