Salmo

107 Agyamankayo ken Jehova, ta isu ket naimbag;+

Agnanayon ti napudno nga ayatna.+

 2 Ibaga koma dayta dagidiay binawi* ni Jehova,

Dagidiay binawina iti ima* ti kabusor,+

 3 Dagidiay inummongna manipud kadagiti nasion,+

Manipud iti daya ken manipud iti laud,*

Manipud iti amianan ken manipud iti abagatan.+

 4 Nagpagnapagnada iti desierto nga awan masnup a turongenda;

Dida nakasarak iti dalan nga agturong iti maysa a siudad a mabalinda a pagnaedan.

 5 Mabisin ken mawawda idi;

Dandanida idin matalimudaw gapu iti bannogda.

 6 Intultuloyda ti immawag ken Jehova gapu iti rigatda;+

Inalawna ida iti narigat a kasasaadda.+

 7 Pinapagnana ida iti umiso a dana+

Tapno makapanda iti siudad a pagnaedanda.+

 8 Agyaman koma dagiti tattao ken Jehova+ gapu iti napudno nga ayatna

Ken gapu kadagiti nakaskasdaaw nga aramidna iti annak ti tattao.+

 9 Ta pinennekna ti mawaw*

Ken binussogna ti mabisin* iti nasayaat a bambanag.+

10 Adda idi dagidiay agnanaed iti kasta unay a kinasipnget,

Dagiti maparparigat ken nakawaran a balud.

11 Ta sinukirda ti sao ti Dios;

Saanda a rinaem ti balakad ti Kangatuan.+

12 Isu a pinagpakumbabana ti pusoda babaen ti panagrigat;+

Natuangda ket awan ti asinoman a timmulong kadakuada.

13 Nagpatulongda ken Jehova gapu iti rigatda;

Insalakanna ida iti narigat a kasasaadda.

14 Inruarna ida iti kasta unay a kinasipnget,

Ket pinugsatna dagiti posasda.+

15 Agyaman koma dagiti tattao ken Jehova gapu iti napudno nga ayatna+

Ken gapu kadagiti nakaskasdaaw nga aramidna iti annak ti tattao.

16 Ta dinadaelna dagiti ruangan a gambang

Ken tinukkolna dagiti trangka a landok.+

17 Maagda ken agrigrigatda+

Gapu kadagiti biddut ken kamalida.+

18 Awan ganasdan a mangan iti* amin a taraon;

Asidegda idin kadagiti ruangan ni patay.

19 Agpatulongda ken Jehova gapu iti rigatda;

Isalakanna ida iti narigat a kasasaadda.

20 Ibaonna ti saona ken paimbagenna ida+

Ket aonenna ida iti abut a nakatnaganda.

21 Agyaman koma dagiti tattao ken Jehova gapu iti napudno nga ayatna

Ken gapu kadagiti nakaskasdaaw nga aramidna iti annak ti tattao.

22 Agdatonda koma kas panangipakitada iti panagyaman+

Ken siraragsak nga ipakaammoda dagiti aramidna.

23 Dagidiay agbibiahe iti barko nga aglaylayag iti baybay,

Nga agnegnegosio iti nalawa a taaw,+

24 Nakitada dagiti aramid ni Jehova

Ken dagiti nakaskasdaaw a gapuananna iti baybay;+

25 No kasano a tumaud ti nakapigpigsa nga angin,+

A mangpadakkel kadagiti dalluyon iti baybay.

26 Maipangatoda agingga iti tangatang;

Lumnedda agingga iti lansad ti baybay.

27 Agibar-ibar ken agdiwengdiwengda a kas iti nabartek,

Ket awan serserbi ti amin a paglainganda.+

28 Kalpasanna, immawagda ken Jehova gapu iti rigatda,+

Ket inalawna ida iti narigat a kasasaadda.

29 Pinagkalmana ti nakapigpigsa nga angin;

Ket nagtalna dagiti dalluyon ti baybay.+

30 Naragsakanda idi napasamak dagita,

Ken inturongna ida iti kayatda a pagsangladan.

31 Agyaman koma dagiti tattao ken Jehova gapu iti napudno nga ayatna

Ken gapu kadagiti nakaskasdaaw nga aramidna iti annak ti tattao.+

32 Itan-okda koma ti Dios iti kongregasion dagiti tattao,+

Ken idaydayawda koma iti gimong* dagiti panglakayen.

33 Pagbalinenna a desierto dagiti karayan

Ket pagmagaenna dagiti ubbog ti danum,+

34 Pinaapgadna ti nabunga a daga,+

Gapu iti kinadakes dagiti agnanaed iti dayta.

35 Pinagbalinna a danaw dagiti desierto,

Ken pinagbalinna nga ubbog ti danum ti natikag a daga.+

36 Pinagyanna sadiay dagiti mabisin,+

Tapno mangaramidda iti siudad a pagnaedanda.+

37 Nagmulada kadagiti ubas ken minulaanda dagiti kataltalonan+

A nangpataud iti apit nga aglaplapusanan.+

38 Immaduda iti kasta unay ta binendisionanna ida;

Dina impalubos a maksayan dagiti bakada.+

39 Ngem bimmassitda manen ken naibabainda

Gapu iti pannakairurumen, kalamidad, ken ladingit.

40 Laisenna dagiti natan-ok

Ken pagakar-akarenna ida iti let-ang.+

41 Ngem salaknibanna* dagiti napanglaw manipud iti pannakairurumen+

Ket pinaaduna ti pamiliada a kas iti maysa nga arban.

42 Makita daytoy dagiti nalinteg ket agragsakda;+

Ngem ti amin a nakillo ket awan ti makunada.+

43 Pampanunotento dagitoy ti asinoman a masirib+

Ken utobennanto a naimbag dagiti pakakitaan ti napudno nga ayat ni Jehova.+