Exodo

14 Kinuna ni Jehova ken Moises: 2 “Ibagam kadagiti Israelita nga agsublida ken agkampoda iti asideg ti Pihahirot, iti nagbaetan ti Migdol ken ti baybay, nga asideg ti Baal-zefon.+ Agkampokayo iti igid ti baybay. 3 Ket ipagarupto ni Faraon: ‘Nayaw-awanen dagiti Israelita ken napupokdan iti let-ang.’ 4 Ipaluboskonto a sumukir ni Faraon+ isu a kamatennanto ida. Ngem itan-okkonto ti naganko babaen ti panangdadaelko ken Faraon ken iti amin nga armadana.+ Sigurado a maammuanto dagiti Egipcio a siak ni Jehova.”+ Kasta ti eksakto nga inaramid dagiti Israelita.

5 Kalpasanna, naipadamag iti ari ti Egipto a nakapanawen dagiti Israelita. Dagus a nagbaliw ti panunot ni Faraon ken dagiti adipenna+ ket kinunada: “Ania daytoy nga inaramidtayo? Apay a pinalubosantayo a pumanaw dagiti adipentayo nga Israelita?” 6 Gapuna, impaisaganana dagiti karuahena a pakigubat, ket nagrubbuat a kadua dagiti tattaona.+ 7 Intugotna ti 600 a kasayaatan a karuahena ken ti amin a dadduma pay a karuahe ti Egipto. Dagita ti nagluganan dagiti soldadona. 8 Impalubos ni Jehova a sumukir ni Faraon nga ari ti Egipto, ket kinamatna dagiti Israelita bayat a situturedda* a rumrummuar idiay Egipto.+ 9 Kinamat ida dagiti Egipcio.+ Ket kumamkamakam dagiti karuahe ni Faraon ken dagiti kabalierona ken ti armadana bayat nga agkamkampo dagiti Israelita iti igid ti baybay, nga asideg ti Pihahirot sakbay ti Baal-zefon.

10 Idi makita dagiti Israelita nga asidegen ni Faraon ken dagiti Egipcio a kumamkamat kadakuada, kasta unay ti butengda ket nagpaarayatda ken Jehova.+ 11 Kinunada ken Moises: “Apay nga inruarnakami manipud Egipto? Gapu kadi ta awan ti pagitaneman idiay isu nga impannakami ditoy let-ang tapno ditoykami a matay?+ Ania daytoy nga inaramidmo kadakami? 12 Saan kadi nga imbagami idi kenka idiay Egipto: ‘Bay-annakami lattan nga agserbi kadagiti Egipcio’? Ta nasaysayaat laengen nga agpaadipenkami kadagiti Egipcio ngem iti mataykami iti let-ang.”+ 13 Kinuna ni Moises kadagiti Israelita: “Dikay agbuteng.+ Agtakderkayo a sititibker ken kitaenyo ti panangisalakan ni Jehova kadakayo ita nga aldaw.+ Ta dagiti Egipcio a makitkitayo ita ket pulos a diyonton makita pay.+ 14 Ni Jehova ti makigubat para kadakayo,+ isu nga agulimekkayo.”

15 Kinuna ni Jehova ken Moises: “Apay nga agpapaarayatka kaniak? Ibagam kadagiti Israelita nga itultuloyda ti magna. 16 Ket iyunnatmo ta bastonmo iti baybay tapno mabisngay. Iti kasta, makaballasiw dagiti Israelita iti namaga a daga iti tengnga ti baybay. 17 Ipalubosko a sumukir latta dagiti Egipcio tapno kamatenda ida. Iti kasta, itan-okkonto ti naganko babaen ti panangdadaelko ken Faraon ken iti amin nga armadana, karuahe, ken kabalierona.+ 18 Ket maammuanto dagiti Egipcio a siak ni Jehova inton itan-okko ti naganko babaen ti panangdadaelko ken Faraon, agraman dagiti karuahe ken kabalierona.”+

19 Pimmanaw ken napan iti likudanda ti anghel nga imbaon ti pudno a Dios+ iti sanguananda, isu nga immakar met iti likudanda ti sinan-adigi nga ulep.+ 20 Nagyan ti sinan-adigi nga ulep iti nagbaetan ti kampo dagiti Egipcio ken ti kampo dagiti Israelita.+ Gapu iti ulep, nasipnget iti ayan dagiti Egipcio ngem nalawag latta iti ayan dagiti Israelita iti rabii.+ Isu nga iti agpatnag, saan a nakaasideg dagiti Egipcio iti kampo dagiti Israelita.

21 Inyunnat ni Moises ti imana iti rabaw ti baybay+ ket iti agpatnag, nangyeg ni Jehova iti napigsa nga angin nga aggapu iti daya. In-inut a nabisngay ti baybay+ ket nagmaga ti lansadna.+ 22 Ket nagna dagiti Israelita iti tengnga ti namaga a lansad ti baybay+ bayat a nagbalin a kasla pader ti danum iti agsumbangirda.+ 23 Kinamat ida dagiti Egipcio. Ket amin a kabalio ni Faraon agraman dagiti karuahe ken kabalierona sinurotda ida iti tengnga ti baybay.+ 24 Bayat ti panagbantay iti bigat,* kinita ni Jehova ti kampo dagiti Egipcio manipud iti sinan-adigi nga apuy ken ulep+ ket riniribukna ti kampoda. 25 Inikkatna dagiti pilid dagiti karuaheda isu a narigatanda nga agpataray. Kinuna dagiti Egipcio: “Panawantayon dagiti Israelita ta ni Jehova ti makigubgubat kadagiti Egipcio.”+

26 Ket kinuna ni Jehova ken Moises: “Iyunnatmo ta imam iti baybay tapno agsinnabat manen dagiti danum a manglemmes kadagiti Egipcio, agraman kadagiti karuahe ken kabalieroda.” 27 Inyunnat a dagus ni Moises ti imana iti baybay ket idi bumigaten, nagsubli ti danum iti sigud a kaadalemna. Bayat nga itartarayan dayta dagiti Egipcio, inyanud ida ni Jehova iti tengnga ti baybay.+ 28 Nagsinnabat manen dagiti danum ket linapunosda dagiti karuahe, kabaliero, ken ti armada ni Faraon a mangkamkamat kadagiti Israelita iti baybay.+ Awan uray maysa a nakalasat.+

29 Ngem nagna dagiti Israelita iti namaga a daga iti lansad ti baybay,+ ket nagbalin a kasla pader ti danum iti agsumbangirda.+ 30 Iti dayta nga aldaw, insalakan ni Jehova dagiti Israelita manipud kadagiti Egipcio,+ ket nakitada iti igid ti baybay dagiti nayanud a bangkay dagiti Egipcio. 31 Nakita met dagiti Israelita ti dakkel a pannakabalin* ni Jehova idi pinarmekna dagiti Egipcio. Nagbuteng dagiti tattao ken Jehova ket naaddaanda iti pammati ken Jehova ken iti adipenna a ni Moises.+