24 Dimo apalan ti dakes a tattao,
Ken dimo tarigagayan ti makikadua kadakuada,+
2 Ta kinaranggas ti pampanunoten ti pusoda,
Ken riribuk ti sasawen ti bibigda.
3 Mapatibker ti balay babaen ti sirib,+
Ket bumileg babaen ti pannakatarus.
4 Babaen ti pannakaammo, mapno dagiti kuartona
Iti amin a kita ti napateg ken makaay-ayo a gameng.+
5 Nabileg ti masirib a tao,+
Ken ad-adda a bumileg ti maysa a tao babaen ti pannakaammona.
6 Kasapulam ti nasayaat a panangiwanwan tapno mangabakka iti gubat,+
Ket adda balligi no adu ti mamalbalakad.+
7 Saan a magun-odan ti maag ti pudno a sirib;+
Awan maibagana iti ruangan ti siudad.
8 Asinoman nga agplano iti dakes
Maawaganto iti nalaing nga agpanunot iti dakes.+
9 Ti minamaag a plano ket basol,
Ken kagura dagiti tattao ti nauyaw.+
10 No maupayka iti aldaw ti rigat,
Agkurangto ti pigsam.
11 Isalakanmo dagidiay agturturong ken patay,
Ken igawidmo dagidiay agpegpeggad a mapapatay.+
12 No ibagam, “Saanmi nga ammo daytoy,”
Saan aya a mailasin dayta Daydiay mangsuksukimat kadagiti puso?+
Wen, maammuanto dayta Daydiay mangkitkita kenka
Ken supapakanna ti tunggal tao sigun iti aramidna.+
13 Anakko, manganka iti diro, ta naimbag dayta;
Nasam-it ti agtedtedted a diro.
14 Ammuem met a ti sirib ket pagimbagam.+
No masarakam dayta, addanto masakbayam
Ket saanto a mapaay ti namnamam.+
15 Dika agtambang nga agaramid iti dakes iti asideg ti balay ti nalinteg a tao;
Dimo dadaelen ti pagin-inanaanna.
16 Ta uray mamimpito a matuang ti nalinteg, tumakderto manen,+
Ngem matumbanto ti dakes gapu iti didigra.+
17 Dika agragsak no matuang ti kabusormo,
Ket saan koma nga agrag-o ti pusom no matumba,+
18 Ta makita dayta ni Jehova ken saan a maragsakan,
Ket saannanton a kapungtot dayta a tao.+
19 Dika madanagan gapu iti dakes a tattao;
Dimo apalan dagiti dakes.
20 Ta awan ti masakbayan ti asinoman a dakes;+
Maiddepto ti lampara dagiti dakes.+
21 Anakko, agbutengka ken Jehova ken iti ari.+
Ken dika makikadua kadagiti rebelde,+
22 Ta biglanto nga umay ti pannakadadaelda.+
Asino ti makaammo iti didigra nga iyegda kadakuada?+
23 Dagitoy met ti kuna dagiti masirib:
Saan a nasayaat ti mangidumduma no mangukom.+
24 Ti mangibaga iti dakes a tao, “Nalintegka,”+
Ilunodto dagiti ili ken kondenaren dagiti nasion.
25 Ngem nasayaatto ti pagbanagan dagiti mangtubngar kenkuana;+
Mabendisionandanto iti naimbag a bambanag.+
26 Bisongento dagiti tattao daydiay pudno ti sungbatna.+
27 Planuem ti aramidem iti ruar, ken isaganam ti talonmo;
Kalpasanna, bangonem ti balaymo.
28 Dika agtestigo maibusor iti kaarrubam nga awan gapgapuna.+
Dimo usaren ti bibigmo a mangallilaw.+
29 Dimo ibaga: “Aramidek kenkuana ti inaramidna kaniak;
Ibaleskonto kenkuana ti inaramidna.”+
30 Limmabasak iti talon ti sadut,+
Iti kaubasan ti tao a saan a masirib.
31 Nakitak a napno dayta iti ruot;
Nasaknapan iti siitan a mula,
Ken narpuog ti bato a paderna.+
32 Daytoy ti napaliiw ken impapusok;
Nakitak dayta ket daytoy ti nasursurok:
33 Bassit pay a turog, bassit pay a ridep,
Bassit pay a dalikepkep tapno aginana,
34 Ket umayen ti kinapanglawmo kas iti mannanakaw,
Ken ti panagkasapulam kas iti armado a lalaki.+