Dagiti Singasing Para iti Cassette Tapesyo
ITALMEGYO ti buton, agsadagka, ket agsaganakan a malinglingay. Ngem kellaat, ti nalawag ken nabatad a timek sipapartaken a suminggit. Timmakderkayo a dagus, ngem naladawen. Ti cassette tape a mangipapaay kadakayo iti kasta a ragsak ket nakaam-amaken ti pannakakulkolna. Nadadaelen ti recordingyo.
Dagiti paspasamak a kas iti daytoy ket masansan a mapasamak, ngem adda maaramidanyo a manglapped kadakuada. Iti dayta met laeng a tiempo, dayta ti mamagbalin kadakayo a makagun-od iti kaaduan manipud iti recordingyo. Adtoy ti sumagmamano a singasing para kadagiti cassette tapesyo:
◼ Idulinyo dagiti cassettesyo kadagiti bukodda a kahon wenno albums. Dagitoy ti manglapped ti pannakatapukda ket maserraan dagiti getleng ti cassette ket saan a lumukay ti tape. Daytoy ti mangpabassit iti peggad iti pannakakulkol ti tape iti mekanismo ti recorder.
◼ Dikay pulos baybay-an dagiti cassettes iti asideg ti gubuayan ti pudot wenno lugar a mainitan, kas iti paladlad iti sango ti makinlikud a tawa ti kotseyo.
◼ Dikay baybay-an ti cassetteyo iti asideg ti trompa, iti rabaw ti telebision, iti asideg ti telepono, wenno iti abay dagiti dadduma pay a bambanag nga addaan iti magnetiko a tay-ak. Mabalin a mabura dagiti dadduma a pasetna wenno naan-anay a mabura.
◼ Kanayon a dalusanyo ti magnetic heads, pinch rollers, capstans, ken dagiti amin a metaliko a paspaset iti dalan iti tape. Maabutyo dagitoy a paspaset a silalaka babaen ti pananglukatyo iti ruangan ti pagikkan iti tape. Malaksid no sabali ti ibagbaga ti manual a pagannurotan, mabalin a dalusanyo daytoy babaen iti kapas ken isopropyl nga alkohol. Liklikanyo ti panangitalmeg kadagiti heads, ta ti posision dagitoy ti siaannad a naipuesto. Siempre, dikay mangibatbati iti kapas iti makina.
◼ Maysa a demagnetizer (mangikkat iti magneto) ti makatulong unay a mangikkat iti nabati a magnetismo a mabalin a makaperdi iti nasayaat a panagandar ti recorder. Ngem siguraduenyo nga iddepen ti recorderyo ket iyadayuyo dagiti cassettes manipud iti dalan ti demagnetizer. Ket annadanyo a saan a sagsagiden wenno kur-itan dagiti heads. Tapno nalaklaka ti trabaho, addada dagiti magatangen a cassettes a mangdalus wenno demagnetizer a cassettes.
No dagitoy a pamay-an ti panangtaginayon ket kasla narigat para kadakayo, dawatenyo ti maysa a tumulong kadakayo. Dagiti cassette tapes ken recorders gagangayen itatta ket saan a narigat ti mangsapul iti maysa a gayyem a makaipakita kadakayo no ania ti aramidenyo. Ngem laglagipenyo, ti kanayon a panangdalus ken panangikkat iti magneto iti alikamenyo ken ti panangidulinyo kadagiti cassettes a siuumiso ti mamagbalin kadakayo a mangtagiragsak iti recordingsyo iti napaut a tiempo.
Ita, ti Watchtower Society mangpatpatauden iti agarup 500,000 a cassettes iti tunggal bulan. Dagitoy iramanna dagiti recordings iti liblibro ti Biblia, dagiti drama nga addaan tema ti Biblia, ken dagiti musikal a kankanta nga us-usaren dagiti Saksi ni Jehova iti isuamin a lubong. Daytoy a moderno a pamay-an ti komunikasion ket addaan iti napateg a paset iti panangisaknap iti naimbag a damag iti Pagarian iti sangalubongan.—Mateo 24:14.
[Dagiti ladawan iti panid 17]
Ti panangdalus ken panangikkat iti magneto: dua a nalaka a pamay-an a pananggun-od iti kaaduan kadagiti cassettesyo