Panagrag-o Idiay Union Soviet

DAYTOY nga ubing a babai idiay Lvov adda rasonna nga agrag-o. Isu ket maysa kadagiti 74,252 a tattao a nagtitipon a siwayawaya idiay Union Soviet tapno tagiragsakenda ti Nakristianuan a kumbension ken umawat iti kopia itoy nagsayaatan a baro a publikasion a Ti Katan-okan a Tao a Nagbiag Pay Laeng iti pagsasao a Ruso. Nupay saan a pulos idi a napalubosan dagiti Saksi ni Jehova nga agtataripnong idiay Union Soviet, idi napan a kalgaw nangangayda iti pito a kumbension. Agparang iti napalabas a panid ti bilang dagiti timmabuno iti tunggal lugar.

Naangay ti maysa kadagiti kumbension idiay siudad ti Alma-Ata, Kazakhstan, a sadiay dagiti delegado naggapuda met kadagiti republika ti Soviet a Russia, Uzbekistan, Kirghizia, Tadzhikistan, ken Turkmenistan. Idiay Alma-Ata nasurok nga 6,000 ti naragsakan nga immawat iti baro a libro. Idi a ti tunggal maysa kadagiti nasurok nga 4,000 a timmabuno idiay Usolye-Sibirskoye, Siberia, immawatda iti libre a personal a kopia, kinuna ti manangaywan iti estadium: “Maysa a milagro daytoy!”

Idiay Kiev, idi a ti sumagmamano a polis ken bombero nakitada ti libro, dimmawatda iti kopia, a kunkunada: “Ngamin sinalaknibandakayo; kaduadakami idiay kumbension.” Kayat a maammuan ti kapitan ti polis, “Nakaipablaakanna daytoy? Manon a kopia ti naiyimprenta?”

Iti agdama, nasuroken a 12 milion a kopia ti naiyimprenta iti agarup 60 a pagsasao, agraman dagiti saan a pagaammo unay kas ti Bislama, Efik, Ewe, Ga, Igbo, Rarotongan, Sepedi, Shona, Tsonga, Tswana, Twi, ken Venda.

Minilion iti aglawlaw ti lubong ti maay-ayatan a mangbasbasa itoy nasudi a baro a 448-panid a publikasion maipanggep iti biag ken ministerio ni Jesu-Kristo. No tarigagayanyo ti umawat iti kanayonan nga impormasion maipapan ken Jesus ken ti akemna iti pannakatungpal ti panggep ti Dios ditoy daga, pangaasiyo ta agsuratkayo iti Watchtower, P.O. Box 2044, 1099 Manila, wenno iti maitutop a direksion a nailanad iti panid 5.