“Pinukawda Dagiti Panagduaduak”

KASTAT’ kinuna ti maysa a tin-edyer a taga Mexico maipapan kadagiti artikulo a nabasana iti Agriingkayo! Nagsurat: “Agtawenak iti 17, ket addaak iti maikadua a semestre iti accounting technical a high school. Pagay-ayatko unay dagiti magasinyo. Nabasak idan bayat ti tallo a tawen ket iduldulinko pay dagiti kopia dagiti magasin.

“Yantangay saanak a maysa a Saksi ni Jehova ket Katoliko ti intero a pamiliak, diak maitured ti mapan kadagiti gimong. Diak kanayon a magun-odan dagiti magasin, agsipud ta saan a kanayon nga umay idiay balay dagiti Saksi wenno no umayda, awanak idiay pagtaengan, ket ti pamiliak dida mangala kadakuada. Daytat’ gapu a nagsuratak tapno kalikagumak a patulodandak kadagiti magasin iti Ingles ken kasta met iti Español.

“Tinulongandak dagiti artikuloyo idiay eskuelaan, agraman dagidiay maipapan iti pannakaibukbok ti krudo (Setiembre 22, 1989), dagiti biag iti makinruar a law-ang (Abril 8, 1990), dagiti dinosaur (Pebrero 8, 1990), ken adu a dadduma pay. Impaayda ti impormasion a kasapulak, ken pinukawda dagiti panagduaduak.

“Maragsakanak unay a mangbasa iti paset ti Agriingkayo! nga ‘Agimtuod Dagiti Agtutubo . . . ,’ yantangay tulongannak dayta iti inaldaw-aldaw a panagbiag ken iti pannakilangen kadagiti dadduma nga agtutubo.”

No tarigagayanyo ti maysa a kopia ti Agriingkayo! a maibuson iti pagtaenganyo, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.