Manipud Managbasatayo

Irarang-ay ti Agriingkayo! Nabiit pay a nakitak ti maysa a kopia ti Abril 8, 1994 nga Agriingkayo! iti de-screen a ruanganko. Wow! Aniat’ napasamak? Nakapartuatkayo iti naintiempuan, makaisuro a “moderno” a publikasion. Nasarakak a napartak unay ti panagbaliwna, ket iti damo unay a gundaway, talaga a binasak dagiti artikulo. (Sangkakunak idi iti bagik, ‘Ayna, immayda manen,’ sak ibelleng dayta.) Tunggal maysa ket makasarak iti makapainteres iti dayta. Nangnangruna a tinagiragsakko dagiti artikulo maipapan iti kanser ken “Ti Nakaskasdaaw nga ‘Agay-ayus a Dalan’ iti Canada.” Rumangrang-aykayo. Itultuloyyo ti nasayaat a trabahoyo, ket ikarik a diakton ibelleng ti aniaman a kopia agingga a mabasak ida.

D. G., Estados Unidos

Makariro a Lugar Iti Oktubre 22, 1994 nga artikuloyo maipapan kadagiti misionero a napauluan “Nagpalaud Idiay Europa,” kinunayo a ni Boniface “situtured a pinukanna ti sagrado a kayo nga oak ti Thor” idiay Geismar, asideg ti Göttingen, Alemania. Ti ammok, ti makariro a Geismar ket saan nga iti asideg ti Göttingen no di ket iti asideg ti Fritzlar.

A. L., Alemania

Talaga nga umisokayo. Adda gayam dua a lugar a maawagan Geismar, ket napagsinnukatmi ida. Pagyamanan iti panangilawlawagyo iti kamali.​—ED.

Relihion ken Gubat Inlawlawag dagiti seryeyo iti Oktubre 22, 1994 a “No Adda Dasigan ti Relihion iti Gubat” ti naawatanyo kas pannakapaay iti biang dagiti Katoliko a panguluen tapno sibabatad a makondenaryo ti gubat. Ngem maisupadi ti ipalgak ti historia. Iti panangrugi ti panangidadanes ni Hitler kadagiti Judio nga Aleman, inkasaba ni Kardinal Faulhaber iti Munich dagiti sermon a sadiay indepensana dagiti Judio. Dadduma a banuar a klero ti sibabatad a nangkondenar kadagiti linteg ti Nazi a nangiparit iti panagasawa dagiti “Aryano” ken Judio. Kalpasan ti panagbettak ti Gubat Sangalubongan II idiay Europa, sinerraan ni Hitler dagiti Katoliko nga eskuelaan, pinawilanna ti Katoliko a warnakan, ket, idiay Poland, sinerraanna amin a kombento, monasterio, ken seminario.

J. L., Estados Unidos

Dagiti artikulo ket naibasar kadagiti napudno ken mapagtalkan a gubuayan. Kas pagarigan, ti libro a “German Catholics and Hitler’s Wars” nga insurat ni Gordon C. Zahn, a maysa a Katoliko a propesor. Kinapudnona, nagadu ti pammaneknek nga idi damo, inted ti herarkia a Katoliko ti naan-anay a suportana iti partido a Nazi. Di kaipapanan daytoy nga awan dadduma nga indibidual a Katoliko a klero a situtured a nangbusor kadagiti Nazi. Ngem nalawag a naidumduma dagitoy.​—ED.

Panagpasuso Nangipaay ti artikuloyo a “Dagiti Napateg a Kinapudno Maipapan iti Panagpasuso” (Agosto 22, 1994) iti ad-adu a detaliado nga impormasion ngem kadagiti napalabas nga artikuloyo maipapan iti tema. Kaaduan a tiempo, di man laeng mangaramid dagiti amma iti pamuspusan a mamagballigi iti panagpasuso dagiti assawada. Ngem aktual nga imbaga ti artikuloyo kadagiti amma ken dadduma pay a kameng ti pamilia no aniat’ maaramidanda tapno makatulong iti naballigi ti panagpasuso.

D. D., Estados Unidos

Nakaskasdaaw ti kapadasak a nagpasuso iti tunggal maysa kadagiti dua nga annakko. Addada parikut idi damo, kas iti ileletteg, ngem buyogen ti pammaregta ni manangko ken ti balakad ti doktorko, naparmekko ti pakarigatak. Paregtaek ti tunggal makabael nga ina a pasusuenna ti anakna, tangay ti nadekket a relasion ti ina ken ti ubing ket maysa a nakaay-ayat a kapadasan a dinto malipatan ti maysa.

U. B., Alemania

Misterioso a Sakit Kas managbasa kadagiti magasinyo manipud pay idi agtawenak iti lima, talaga nga apresiarek ti artikulo a “Misterioso a Saksakit Idiay Guam.” (Agosto 8, 1994) Ni nanangko, maysa a matalek nga adipen ti Dios agingga iti ipapatayna idi 1972, ket maysa a biktima daytoy a sakit. Kayatko ti agyaman iti impaayyo nga impormasion ken iti naan-anay a panangilawlawagyo. Inranudko daytoy a ruar iti pamiliak ken gagayyemko tapno maipakitak ti kinapateg ti magasinyo.

W. A., Estados Unidos