Panggep Dagiti Klero a Tulongan Dagiti Agtutubo
“Ti kinatsaplin iti McGill University . . . ket rinaut ti barkada dagiti nakapomadat’ buokda, naka-jacket iti lalat a punk,” impadamag ti The Gazette ti Montreal Canada. Ngem, karkarna a kita dagiti “punk.” Isudat’ kameng ti klero—dagiti tsaplin iti unibersidad—ken paset ti aw-awagan ti periodiko a “kabarbaro a timmanor a teologo a direkta a tumultulong kadagiti estudiante iti unibersidad nga agsapsapul iti naespirituan a lawag.”
Nagkawes dagiti tsaplin kas “punk” agpaay iti maysa a poster a nadisenio a mangyanunsio kadagiti serbisioda iti campus. Inlawlawag ti maysa kadakuada, maysa a Presbiteriano a ministro nga agnagan Roberta Clare: “Inkeddengmi ti mangaramid iti poster a punk agsipud ta kayatmi nga idian dayta nasansanto-ngem-sika, manangipato a ladawan a masansan a pampanunoten ti tattao kadakami.”
Ngem, kinunana nga ad-adu nga amang nga estudiante ngem iti napalabas ti interesado nga agadal iti relihion idiay eskuelaan. Adu ti mariribukan kadagiti nagrigat a tukoden a saludsod ket agkidkiddawda iti sungbat kadagiti mannursuro ken tsaplin iti unibersidad. Kinasarita ti periodiko ti maysa nga estudiante a sigagagar a mangammo no apay a kasta unay ti panangimpluensia ti relihion iti komunidad, no apay a nagadu ti tumaud a relihion, ken no apay a kasla dagitoy ti pakaigapuan ti kasta unay a riribuk iti lubong. Isut’ mariribukan iti pudno a kinasiasino ni Jesu-Kristo agraman ti saludsod maipapan iti namunganayan ti uniberso.
Us-usaren kadi dagitoy a tsaplin ti Biblia a tumulong kadagiti estudiante a mangsapul kadagiti sungbat ti Dios kadagita a nagrigat tukoden a saludsod? Kasla manmano. Nagaanamongan dagitoy Kabarbaro a Timmanor a teologo a dida mangkomberte, a matmatmatanda kas “panangtakaw iti karkarnero.”
Nupay mabalin a nasayaat ti panggepda, adayon ti simmiasian dagita a klero manipud kadagiti wagas ti panangisuro nga inusar ni Kristo ken dagiti pasurotna. Di naseknan dagiti nagkauna a Kristiano maipapan iti “panangtakaw iti karkarnero,” wenno linapdanda ti bagbagida nga isuro ti Sao ti Dios ken biroken dagiti napasnek a mangsapsapul iti kinapudno tapno maawatanda dayta. (Lucas 24:44, 45; Aramid 20:20) Ngamin, ti umiso a pannakaammo ken Jehova a Dios ken ti Anakna, ni Jesu-Kristo, ket kasapulan tapno maragpat ti agnanayon a biag. (Juan 17:3) Pagayatan ti Dios nga amin a kita ti tattao rumbeng a “dumtengda iti umiso a pannakaammo iti kinapudno” tapno maisalakanda.—1 Timoteo 2:3, 4.
Ti trabaho dagiti Saksi ni Jehova iramanna ti panangidaulo iti libre a panagadal ti Biblia iti pagtaengan kadagidiay agtarigagay a masungbatan dagiti saludsodda iti Biblia. Maragsakanto dagiti Saksi ni Jehova iti komunidadyo a tumulong kadakayo.