Ti Pateg ti Maysa a Magasin nga Agriingkayo!

Idi Agosto 1993, nasarakan ti maysa a lalaki idiay São Paulo, Brazil, ti maysa a kopia ti Agriingkayo! iti maysa a pagbasuraan. Kalpasan ti panangbasana iti dayta buyogen ti panangapresiar, nagsurat iti direksion ti Watch Tower Society idiay Brazil. Insuratna: “Pangngaasiyo ta patulodandak iti impormasion maipapan iti libre a panagadal iti Biblia. Siguradoak a dakkelto ti maitulongna kaniak.”

Naipatulod ti kiddaw ti lalaki iti kongregasion dagiti Saksi ni Jehova iti asideg ti pagnanaedanna. Nasarungkaran ti lalaki, ket nairugi ti panagadal iti Biblia kenkuana. Idi Setiembre 1995, insimbolo ti lalaki ti dedikasionna iti Dios babaen iti bautismo iti danum iti maysa a kombension dagiti Saksi.

Saan koma a matagibassit ti pateg ti maysa a magasin nga Agriingkayo! Ti linaonna apektaranna dagiti biag iti personal a wagas. No kayatmo ti regular nga umawat iti daytoy a pagbasaan, agkiddawka iti maysa kadagiti Saksi ni Jehova wenno agsuratka iti maitutop a direksion a nailista iti panid 5.