Manipud Kadagiti Agbasbasa

Ay-ayam a Mangtulad iti Karakter Nabiit pay a simmangpet ti baro a computer-ko. Panggepko idi ti agay-ayam iti sumagmamano laeng ngem dandani diretso a 16 nga oras a nagay-ayamak! Idi naamirisko ti napasamak, dagus a binurak amin nga ay-ayam iti computer-ko. Nupay kasta, naamirisko a medio nalabes ti inaramidko. Ngem iti dayta a lawas, simmangpet ti artikuloyo nga “Agimtuod Dagiti Agtutubo . . . Adda Kadi Aniaman a Peggad Kadagiti Ay-ayam a Mangtulad iti Karakter?” (Agosto 22, 1999) Naamirisko ti pagdaksan dagidiay nga ay-ayam kaniak. Agyamanak ken Jehova ta pinagsalukagnak iti daytoy a peggad.

L. H., Brazil

Adda agraraira ditoy Japan a panagay-ayam iti baraha. Adu a baraha ti addaan iti sataniko a nagan a kas iti “Curtain of the Black Devil.” Naigamerak iti panagbaraha nga uray la a kimmapuy ti espiritualidadko. Idi agangay, nasarakan ni nanangko dagiti baraha ket imbellengna dagitoy. Makabarbarahaak pay laeng. Ngem kalpasan a nabasak daytoy nga artikulo, diak mariknan dayta. Nakatulong unay kaniak ti artikulo.

K. N., Japan

Panangagas nga Awanan Dara Agtawenak iti 11, ket espesial kaniak ti artikulo a “Talaga Kadi a Nesesita ti Panangyalison iti Dara?” (Agosto 22, 1999) Naminduan a naopera ti puso ti adiek a babai. Kiniddaw dagiti nagannak kaniak a maopera a di mayalisonan iti dara. Impagarupko no matay idin, ngem tallo a tawenen ti napalabas, ket isut’ nakakarkaradkad!

C. S., Estados Unidos

Di Umiso a Kabalio! Talaga a nagustuak ti artikulo a “Paglakuan no Oktubre​—‘Ti Kabayaganen nga Internasional a Paglakuan iti Kabalio iti Europa.’” (Marso 22, 1999) Ngem nasdaawak a nakakita a naawagan a “piebald cob” ti retrato ti maysa nga skewbald cob.

S. P., South Africa

Nalaing kadagiti kabalio ti agbasbasa! Sigun iti British Skewbald and Piebald Association, nangisit ken puraw laeng ti urit ti piebald cob​—saan a kas iti skewbald a makita iti retratomi. Despensarenyo ti kamalimi.​—ED.

Dagiti Gene Agtawenak iti 16, ket interesadoak unay iti panagadal kadagiti molekula. Imbes a nakasimsimple wenno nakarikrikut, ekselente ti natimbeng a pannakaisalaysay ti serye a “Panangsolbar iti Misterio Dagiti Gene-mo” (Setiembre 8, 1999). Addan nabasak a libro a nangilawlawag a naimbag kadagiti palimed ti DNA. Nasdaawak ta insalaysay ti artikuloyo amin a material ngem nagusar iti nalawlawag ken maawatan a termino.

S. R., Francia

Pagyamanan kadagiti artikulo ta nakagun-odak iti nangato a marka iti eksamenko iti biology. Nagsimple ken kompleto ti deskripsionyo kadagiti nucleic acid ken no kasano a nainaigda kadagiti banag a mabalin a matawid!

D.A.N., Brazil

Maysaak a maestro iti elementaria, ket sangkapanunotko no kasanok a matulongan dagiti estudiantek a mangtarus iti pakabuklan ti bagi ti tao. Nalaka a maawatan dagiti estudiantek ti impormasion kadagitoy nga artikulo, uray no adu dagiti narikut a termino ti siensia. Nakalawlawag ti panangisalaysay ti Agriingkayo! kadagitoy.

K. M., Lesotho

Buteng nga Ageroplano Pagyamanan! Inton Lunes ti damo a panageroplanok, ket madandanaganak. Siguro ti kangrunaan a makagapu ket diak matukod no kasano a di matnag ti nagdakkel a makina. Isu a naragsakanak a nakabasa iti artikulo nga “Ania ti Kasapulan Tapno Mataginayon ti Panagtayabda?” (Setiembre 8, 1999) Ti pannakaammok a manmanteneren a naimbag ti adu a kompania dagiti eroplanoda tapno natalged dagitoy​—nga uray la a ma-X-ray-da pay​—ti nakatulong kaniak tapno diak unay mabuteng nga ageroplano. Isu a nupay mabutbutengak, laglagipekto daytoy nga artikulo ket talaga nga agluganakto iti dayta nga eroplano!

T. T., Estados Unidos