No Apay Adda Krisis iti Moral
ITAY napan nga Oktubre, inyebkas ti maysa a mannurat a taga Loja, Ecuador, ti panangapresiarna iti ministerio dagiti Saksi ni Jehova. Malaksid iti dadduma pay a banag, kinunana:
“Ti krisis iti moral ti maysa kadagiti kakaruan a didigra a mangap-apektar iti sangatauan . . . Kas man la nalipatanen dagiti tattao a tungpalen ti Sangapulo a Bilin ken didan ikankano ti konsiensiada, isu a di agkikinnaawatan dagiti tattao. Iti sadinoman ken iti inaldaw, mangngegtayo ti maipapan iti gura, kinaranggas, krimen, pannakainegosio ti droga, terorismo, ken di panagraem iti dignidad ti tao. . . .
“Nupay di iparammag dagiti Saksi ni Jehova, sitatalna ken sikakalma nga ar-aramidenda ti rebbengenda, mamalaybalayda a sumarungkar kadagiti padada a tattao ken mangituktukonda iti dua a nagpipintas a magasin a Ti Pagwanawanan ken Agriingkayo!, a pakaipablaakan ti kaaduan a makapainteres nga artikulo. Saklawen a nangnangruna ti Agriingkayo! ti nadumaduma a makapainteres a banag a nalawag nga aglaon kadagiti nasientipikuan ken nainaig-kultura nga impormasion. Makaay-ayo ti kinalawag ken kinaumiso ti pannakaisurat amin dagitoy.”
Nabatad nga adda krisis iti moral kadagitoy a panawen, ngem kas nailanad iti panid 4 daytoy a magasin iti benneg a “No Apay Maipabpablaak ti Agriingkayo!,” ti Agriingkayo! “sukimaten ken ipaganetgetna ti pudno a kaipapanan dagiti agdama a pasamak.” Ipabigbig ti broshur a Pudno Aya a Maseknan ti Dios Kadatayo? ti panagsagaba a dadaeran dagiti tattao, ngem saan la a dayta. Ipakitana no apay adda krisis iti moral ken dagiti nakaro nga epektona. Napatpateg pay, ipalgakna no kasano a dumtengto ti solusion.
Mabalinmo ti agkiddaw iti kopia daytoy a makaliwliwa a 32 ti panidna a broshur babaen ti panangsuratmo iti naipakuyog a kupon ken panangibusonmo iti dayta iti address a makita iti kupon wenno iti maitutop nga address iti panid 5 daytoy a magasin.
□ Kayatko ti maaddaan iti broshur a Pudno Aya a Maseknan ti Dios Kadatayo?
□ Interesadoak iti libre a panagadal iti Biblia iti pagtaengan.