2

Ipakitayo ti Kinadungngo iti Pamiliayo

Apay a nasken dayta? Kasapulan dagiti annak ti ayat ta malpayda no awan dayta. Idi dekada 1950, insurat ti antropologo a ni M. F. Ashley Montagu: “Tapno nasalun-at ti maysa nga ubing, kasapulan unay a mataraonan iti ayat; gistay amin a pisikal ken emosional a salun-at ket mainaig iti ayat, nangruna iti las-ud ti umuna nga innem a bulan ti ubing.” Umanamong dagiti moderno a managsirarak iti kapanunotan ni Montagu a “matiltil dagiti ubbing no mabisinanda iti ayat.”

Ti karit: Nairteng ti relasion ti pamilia gapu ta agbibiagtayo iti naulpit ken managimbubukodan a lubong. (2 Timoteo 3:1-5) Mabalin a kumaro dagiti parikut ti agassawa gapu kadagiti pinansial ken emosional a dadagsen iti panangpadakkel kadagiti annak. No kas pagarigan ta datin a dida agkaawatan sa agsubangda pay iti panangdisiplina ken pananggunggona kadagiti annak, mabalin a kumaro ti tension iti nagbaetan ti agassawa.

Ti solusion: Iplanoyo ti regular a panaglalangen ti pamilia. Kasapulan met a mangiplano dagiti agassawa iti tiempo a para laeng kadakuada a dua. (Amos 3:3) Nainsiriban nga usarenyo ti tiempo no nakaturogen dagiti annakyo. Diyo ipalubos a ti telebision ti mangagaw kadagita a napapateg a kanito. Taginayonenyo ti kinalailoyo iti maysa ken maysa. (Proverbio 25:11; Kanta ni Solomon 4:7-10) Imbes a kanayon nga ‘agsapsapulkayo iti biddut,’ inaldaw nga ipamuspusanyo a padayawan ti asawayo.​—Salmo 103:9, 10; Proverbio 31:28.

Ibagayo kadagiti annakyo nga ipatpategyo ida. Babaen ti sibubulos a panangyebkasna iti kinadungngona ken Jesus nga Anakna, impasdek ni Jehova a Dios ti ulidan para kadagiti nagannak. (Mateo 3:17; 17:5) Kastoy ti kuna ni Fleck, maysa nga ama nga agnanaed idiay Austria: “Dagiti annak ket kasla sabsabong. No kasano a kasapulan dagiti sabong ti anaraar ken bara ti init, kasapulan met dagiti annak ti dungngo dagiti nagannak ken ti pammatalged a napategda a kameng ti pamilia.”

Kasadokayo man wenno agsolsolo a nagannak, sumayaat ti biag ti pamiliayo no tulonganyo ida a mangpatanor iti ayat iti maysa ken maysa ken iti Dios.

Ngem ania ti kunaen ti Sao ti Dios no iti panangusar iti autoridadyo kas nagannak?

[Blurb iti panid 4]

‘Ti ayat ket naan-anay a singgalut ti panagkaykaysa.’​—Colosas 3:14