5
Mangipasdekkayo Kadagiti Rutina sa Taginayonenyo Dagita
Apay a nasken dayta? Dagiti rutina ket kangrunaan a paset ti biag ti maysa a nataengan. Kaaduanna, adda rutina ti trabaho, panagdayaw, ken uray ti panaglinglingay. Pagdaksan dagiti annak no saan ida nga isuro dagiti nagannak a mangiplano iti tiempoda ken sumurot iti eskediul. Iti sabali a bangir, “ipakita dagiti panagsirarak a no adda dagiti paglintegan ken urnos a sursuroten ti ubing, natalged ti riknana ken masursurona ti agteppel ken maaddaan iti kompiansa,” kuna ni Dr. Laurence Steinberg, maysa a propesor iti sikolohia.
Ti karit: Adu ti pakakumikoman iti biag. Adu nga oras nga agtartrabaho dagiti nagannak, isu a kanayon a kurang ti panawenda kadagiti annakda. Tapno maipasdek ken mataginayon dagiti rutina, kasapulan dagiti nagannak ti determinasion ken disiplina iti bagi. Iti kasta, masumra ti damo a panagtukiad ti anak a sumurot kadagiti rutina.
Ti solusion: Iyaplikaryo ti balakad ti Biblia nga “amin a bambanag maaramid koma a sitatakneng ken sigun iti urnos.” (1 Corinto 14:40) Kas pagarigan, uray ubbing pay dagiti annakda, adu a nagannak ti nainsiriban a nangyeskediul iti nainget ken regular nga oras a pannaturog dagiti annakda. Nupay kasta, kaay-ayo koma dagiti ubbing ti tiempo ti pannaturogda. Kastoy ti kuna ni Tatiana, nga agnanaed idiay Greece ken addaan iti dua a babbalasitang: “No nakaiddan dagiti annakko, silalailo nga ap-aprosak ida ken ibagak kadakuada ti inaramidko bayat nga addada idiay eskuelaan. Kalpasanna, damagek no kayatda nga ibaga ti sumagmamano nga inaramidda iti dayta nga aldaw. Nakarelaksda. Kaaduanna a sibubulosda nga agestoria kadagiti kapadasanda.”
Ni Kostas nga asawa ni Tatiana ibasaanna dagiti annakda kadagiti estoria. Kunana: “Komentuanda ti estoria ket masansan nga agturong ti saritaan kadagiti personal a problemada. Dida kayat ti agsao no diretsaek lattan a damagen no ania dagiti parikutda.” Siempre, baliwanyon ti oras ti pannaturogda no dumakdakkeldan. Ngem no taginayonenyo ti rutina, itultuloyto dagiti annakyo nga usaren dayta a tiempo a makisarita kadakayo.
Kanayonanna, nainsiriban no aggigiddan a mangan ti sangapamiliaan uray maminsan laeng iti kada aldaw. Tapno mayugali dayta, mabalin a mabaliwan no dadduma ti oras ti pannangan. “No dadduma, maladawak a sumangpet nga aggapu iti trabaho,” kuna ni Charles, nga addaan iti dua nga annak. “Tapno dida mabisinan, pagmeriendaen pay laeng ni baketko dagiti annakmi. Sakaminto la mangrabii no addakami aminen. Pagsasaritaanmi dagiti inaramidmi iti nagmalem, repasuenmi ti maysa a teksto ti Biblia, pagtutungtonganmi dagiti parikut, ken agkakatawakami. Dayta a rutina ti mangparparagsak iti pamiliami.”
Diyo palubosan a ti panagbirokyo iti kuarta ti mangdadael iti rutina ti pamiliayo. Iyaplikaryo ti balakad ti Biblia a ‘siguraduenyo ti napatpateg a bambanag.’—Filipos 1:10.
Ania ti kanayonan a maaramidan dagiti nagannak tapno mapasayaatda ti komunikasionda iti annakda?
[Blurb iti panid 7]
“Amin a bambanag maaramid koma a sitatakneng ken sigun iti urnos.”—1 Corinto 14:40