Nasayaat ti Ibunga ti Nadiosan a Panangsanay

Dagiti nagannak a mangsansanay kadagiti annakda manipud kinaubing masansan a masagrapda ti nasayaat a bunga ti panagbannogda. Idiay Peru, Abagatan nga America, adda maysa nga ubing nga agnagan iti Dorian. Isu ket agtawen iti uppat idi damo a nagpaset iti Teokratiko nga Eskuelaan ti Panagministro iti Kingdom Hall dagiti Saksi ni Jehova. Idi nangrugin nga ageskuela, nailawlawagna iti mannursurona ken kadagiti kaklasena babaen ti Biblia no apay a saanna a selselebraran ti Krismas.

Itay nabiit, idi agtawen iti agarup lima, nakiddaw kenni Dorian nga agbitla iti intero nga eskuelaan​—iti imatang ti agarup 500 nga estudiante—​maipapan iti panangmatmatna iti Aldaw Dagiti Amma. Nangisagana iti 10 a minuto a bitla maipapan iti tema a “Dagiti Responsabilidad ti Maysa nga Ama,” a naibasar iti teksto ti Biblia idiay Efeso 6:4. Iti ngudo ti bitlana, kinunana: “Imbes a maminsan iti kada tawen a selebraranda ti Aldaw Dagiti Amma, dagiti annak rumbeng nga inaldaw a raemen ken pagtulnoganda ti nagannakda.”

Idi 1943, nagbalin a maysa kadagiti linawas a gimong dagiti Saksi ni Jehova ti Teokratiko nga Eskuelaan ti Panagministro. Nairanta dayta a mangparang-ay iti abilidad agpadpada dagiti ubbing ken nataengan iti panagsaoda iti publiko. Sipud idi, daytat’ mangipapaayen iti naibasar-Biblia a panangsanay a mangnayon iti pannursuro a naidagadag kadagiti nagannak nga ipaayda kadagiti annakda.​—Proverbio 22:6.

Idi Nobiembre 2005, idi agtawen iti innem ni Simon, a maysa nga ubing idiay Switzerland, imparangna ti damo a pasetna a panagbasa iti Biblia iti Teokratiko nga Eskuelaan ti Panagministro. Agarup makatawen kalpasanna, kinaumanda isuna iti maysa a programa iti dakkel nga asamblea dagiti Saksi ni Jehova. Ania ti napatanorna a kababalin kadagiti naespirituan a banag?

Kaay-ayo ni Simon ti tumabuno kadagiti Nakristianuan a gimong, kas ipakita ti panagreggetna a di pulos aglangan, uray no nabannog. Malaksid iti dayta, kumuykuyog kadagiti miembro ti pamiliana iti panangasaba. Iti kada bulan, mangipapaima iti 30 agingga iti 50 a kopia ti magasin a Pagwanawanan ken Agriingkayo! kadagiti tattao aniaman ti edadda. Kanayonanna, masansan a kasaritana ni tatangna maipapan iti Biblia ken parparegtaenna a kumuyog iti pannakigimong ti pamiliana.

Awan duadua a dagiti nagannak a mangpadpadakkel kadagiti annakda “iti disiplina ken panangiturong-panunot ni Jehova” agapitda iti aglaplapusanan a rag-o no mangipangag dagiti annakda ken mangpataudda iti nalinteg a bunga.​—Efeso 6:4; Santiago 3:17, 18.

[Ladawan iti panid 28]

Ni Dorian idiay eskuelaan

[Ladawan iti panid 28]

Ni Simon idiay Kingdom Hall