No Kasano nga Ad-adda a Maipakitatayo ti Kinahustisia
KAYAT ti Namarsua kadatayo nga agbalintayo a naragsak, maaddaantayo iti natalna a panunot, ken makatulongtayo iti dadduma nga agbalin a naragsak. Gapuna, ikalkalikagumna kadatayo “ti panangwatwat iti kinahustisia ken panangayat iti kinamanangngaasi.” (Mikias 6:8) Kasanotayo a maaramidan dagita? Nasken a parang-ayentayo dagiti galad a mangikkat kadagiti ugali a manglapped iti panangipakitatayo iti kinahustisia. Usigem no kasano a makatulong kadatayo ti Biblia.
IWAKSI TI KINAAGUM. Ti kabilgan a pangontra iti kinaagum ket ayat—saan a basta rikna wenno romantiko a tarigagay—no di ket managsakripisio nga ayat. “Manangngaasi” ti kasta nga “ayat” ken “saanna a sapulen dagiti bukodna a pagimbagan,” kuna ti 1 Corinto 13:4, 5. Saan la nga agpaay dayta nga ayat iti pamilia ken gagayyem. “No ayatenyo dagidiay mangay-ayat kadakayo, ania a gunggona ti adda kadakayo?” insaludsod ni Jesus, sana innayon nga uray dagiti di makaammo iti Dios ayatenda dagidiay mangay-ayat kadakuada.—Mateo 5:46.
IWAKSI TI DISKRIMINASION. Kuna ti Aramid 10:34, 35: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” Saan a mangisalakan ti Dios maibatay iti puli, kasasaad iti kagimongan, ken kinalalaki wenno kinababai. Iti imatangna, “awan ti Judio wenno uray Griego, awan ti adipen wenno uray siwayawaya a tao, awan ti lalaki wenno uray babai.” (Galacia 3:28) No tuladentayo ti Dios, maparmektayo ti diskriminasion. Usigem ti kapadasan ni Dorothy, nga aggigian idi idiay Estados Unidos.
Makapungtot unay idi ni Dorothy gapu iti panangidumduma iti puli isu a kayatna ti makikadua kadagiti rebelde tapno maksayan ti panagsagaba dagiti nangisit nga umili. Ngem bayat dayta a tiempo, tinabunuanna ti Nakristianuan a gimong dagiti Saksi ni Jehova. Nagustuanna unay ti naayat a panangpasangbay kenkuana dagiti nangisit ken puraw. Di nagbayag, naamirisna a ti laeng Dios ti makabael a mangbalbaliw iti personalidad ti tao. Natukay unay ti pusona nga uray la a dina nalapdan ti naganug-og idi nariknana ti pudno nga ayat dagiti puraw a Saksi—a kinunana a sigurado koma a pinapatayna gapu ta purawda.
IWAKSI TI GURA ITI KAGIMONGAN. Sakbayda a nagbalin a Kristiano, ti dadduma kadagiti immuna a pasurot ni Jesus ket mammartek, manangkikil, managayat iti ragragsak, ken mamadpadakes. Ngem babaen iti tulong ti Dios, dagita a dakes a kababalin sinukatanda iti ayat, kinamanangngaasi, ken kinaimbag. (1 Corinto 5:11; 6:9-11; Galacia 5:22) Minilion met ita ti nakaaramid iti nasayaat a panagbalbaliw iti biagda babaen ti panagdayawda iti Dios. Maysa a pagarigan ni Firuddin a taga-Azerbaijan.
Napadakkel ni Firuddin iti institusion a para kadagiti ulila wenno nabaybay-an. Masansan idi a makidinnanog iti dadduma nga ubbing. Idi agkabannuagen, nagbalin nga instruktor ti manomano a rinnanget. “Bastos, nauyong, ken naranggasak idi,” kinunana. “No mangmangankami ket adda nalipatan ni baketko a Zahra—uray no pagingat laeng—kabilek isuna. Ket no adda kumita kenkuana bayat a magmagnakami, kabilek dayta a tao!”
Maysa nga aldaw, natukay ti rikna ti Firuddin idi naammuanna nga indawat ni Jesus iti Dios a mapakawan koma dagiti soldado a nangilansa kenkuana. (Lucas 23:34) Napanunotna a ‘ti laeng Anak ti Dios ti makaaramid iti kasta.’ Sipud idin, kayatnan a maammuan ti ad-adu pay maipapan iti Dios. Isu nga idi kayat dagiti Saksi ni Jehova nga iyadalan iti Biblia, inawatna a dagus. Di nagbayag, simmayaaten ti personalidadna. Nagbalin payen a nakadungdungngo ken ni Zahra isu a nagpayadal metten iti Biblia. Ita, nasayaaten ti relasionda ken agkaduadan iti pudno a panagdaydayaw.
No adda balbaliwantayo iti kinataotayo, dina kayat a sawen a sumayaaten ti intero a lubong! No ngay ti Dios ti mangyeg iti baro a lubong nga addaan iti pudno a kinahustisia? Total, sigurado a kabaelanna dayta! Ken panunotem daytoy: Iti 2 Timoteo 3:1-4, a nakotar iti rugi ti panid 4, nakitatayo a silalawag nga impakpakauna ti Biblia no ania ti kababalin ti kaaduan a tattao ita. Detalyado a matungtungpalen dayta—kas iti adu pay a padto iti Biblia. No kasta, adda panggapuantayo a mamati iti kari ti Dios a pagpatinggaenna amin a kinaawan hustisia. Kinapudnona, tungpalento ti Dios dayta a panggepna. Kasano?
[Kahon/Ladawan iti panid 7]
TI PANANGBIROK NI HEIDE ITI HUSTISIA
“Kagurak idi ti rasismo, gubat, kinapanglaw, ken dadduma pay a kinaawan hustisia isu a nagbirokak iti solusion,” malagip ni Heide a taga-Estados Unidos. “Pinadasko ti nakitinnulong iti organisasion a mangilablaban kadagiti kalintegan dagiti sibilian. Idi agangay, nakimiembroak iti maysa a partido politika ngem kasla dida kabaelan a solbaren ti kinaawan hustisia.
“Napanunotko a kasapulan ti dakdakkel a panagbalbaliw, ken kasla nasayaat met ti asosasion dagiti hippie. Ngem saan met gayam. Napaliiwko nga adu a hippie ti mas interesado iti seks, droga, ken rock and roll ngem iti panangbalbaliw iti sistema. Gapu iti dayta, naaddaanak iti nakaro a depresion. Idi kuan, adda naam-ammok a Saksi ni Jehova. Impakitana kaniak iti Biblia dagiti panggep ti Dios a panagbalbaliw. Kas pagarigan, impabasana dagiti teksto a kas iti Apocalipsis 21:3, 4, nga agkuna a punasento ti Dios dagiti lua iti amin a rupa ken pukawennanto ti leddaang, sangsangit, ken ut-ot a masansan a resulta ti kinaawan hustisia. ‘Agpayso ngata dagita a kari?’ insaludsodko iti bagik.
“Nakombinsirak idi nabasak iti Biblia ti maipapan iti pannakabalin ken ayat ti Dios ken idi nariknak a mismo ti ayat iti nagbabaetan dagiti Saksi ni Jehova. Magagaranak unayen a mangur-ray iti kaitungpalan dagiti kari ti Dios.”
[Ladawan iti panid 6]
Maparmek ti diskriminasion no tuladentayo ti ayat ti Dios
[Ladawan iti panid 6]
Ni Firuddin ken ni baketna a Zahra