LUGLUGAR KEN TATTAO
Panagpasiar Idiay Italy
TI Italy ket pagilian dagiti agsusupadi. Addaan kadagiti atiddog nga igid ti baybay ken narangkis a kabambantayan; nakabarbara no tiempo ti kalgaw iti abagatan ken nakalamlamiis no tiempo ti lam-ek iti amianan. Adu ti bulkan ditoy ngem manmano laeng ti aktibo a kas iti Stromboli ken Mount Etna.
Maysa ti Italy iti kaaduan ti populasionna a pagilian iti Europa. Adun ti nagdaliasat ditoy a pakairamanan dagiti Arabo, Bizantino, Feniciano, Griego, ken Norman.
Gondola a lumasat iti adu a kanal ti pagluganan dagiti turista nga agpasiar iti Venice
Daytoy a pagilian ket nabaknang iti historikal ken artistiko a gameng. Iti kaaduan nga ili ken siudad, adda pay laeng dagiti narba a patakder dagiti nagkauna a Griego ken Romano wenno dagiti arkitektura nga estilo Baroque ken Renaissance. Dagiti painting, marmol nga estatua, ken fountain ket inaramid dagiti artist a kas kada Bernini, Michelangelo, ken Raphael.
Ti taraon ket napateg a paset iti inaldaw a biag, ken adu a kostumbre ti masurot kadagiti lokal a putahe. Masansan a maidasar nga umuna ti pasta, sa sumaruno ti karne wenno ikan nga addaan iti natnateng. Nagadu ti olive oil isu a masansan a maus-usar dayta. Nalatak ditoy ti pizza ken risotto a taraon dagiti Italiano.
Pasta ti kangrunaan a taraon dagiti Italiano
Pagaammo a mannakigayyem, managpadagus, ken mannakipulapol dagiti Italiano. Paggugustoda ti makiinnestoria isu a gagangay a makitam nga agtutungtongda kadagiti plasa wenno naragsak nga agsasaritada bayat a magmagnada.
Romano Katoliko ti kaaduan nga umili ti Italy, ngem manmano ti makimismisa. Kadagiti kallabes a dekada, saan kanon a sursuroten dagiti tattao ti ibagbaga ti simbaan ken dagiti nabayagen a pagannurotan maipapan iti aborsion ken diborsio.
Umad-adu dagiti Saksi ni Jehova iti Italy. Nakalatlatakda gapu iti trabahoda a panangisuro iti Biblia kas paset ti ministerioda ken ti panagbiagda maitunos kadagiti pagalagadan ti Biblia. Nasurok a 3,000 ti kongregasion dagiti Saksi ni Jehova ditoy. Adu kadagita a kongregasion ti mangbirbirok kadagiti tattao a saan la nga Italiano ti lengguaheda. Kasapulan la unay ti panangisuro iti Biblia kadagiti dadduma pay a lengguahe ta iti napalabas a 10 a tawen, nagtriple ti bilang dagiti ganggannaet iti daytoy a pagilian.
Ti narangkis a kabambantayan ti Dolomites iti makin-amianan a daya ti Italy
AMMOM KADI?
Nupay iti Rome ti ayan ti Vatican City, maysa daytoy nga independiente a pagilian manipud pay idi 1929 isu a para kadagiti umili ti Italy, sabali dayta a pagilian.