LUGLUGAR KEN TATTAO
Panagpasiar Idiay El Salvador
DANDANI 500 a tawenen ti napalabas idi simmangpet dagiti Espaniol iti lugar a maawagan itan iti El Salvador. Ti kadakkelan idi a tribu sadiay inawaganda ti teritoriada a Cuscatlán a ti kayatna a sawen ket “Daga ti Saniata.” Ita, kaaduan a tattao iti El Salvador ket kaputotan dagiti katutubo a tribu ken dagiti dimmayo a taga-Europa.
Pagaammo a nagaget ken mannakigayyem dagiti Salvadoran. Nasayaat ti ugalida ken nadayawda pay. Sidadayaw a kumablaawda sakbay a makisarita wenno ibagada ti rantada babaen ti, “Buenos días” (naimbag a bigat) wenno “Buenas tardes” (naimbag a malem). Kinapudnona, ibilang dagiti agnanaed kadagiti bario ken babassit nga ili nga awan daydayaw ti maysa no dina kablaawan ti lumabas.
Dakkel ti paset ti panagmula iti kape iti pakasaritaan ti El Salvador
Maysa kadagiti paborito a kanen dagiti Salvadoran ket ti pupusa—tortilla a naaramid manipud nagiling a mais (wenno bagas) a mapalamanan iti keso ken bukbukel, kasta met iti karne ti baboy wenno dadduma pay a palaman. Masansan a maidasar dagiti pupusa a kadua ti sarsa a kamatis ken curtido—napaglalaok a repolio, carrot, sibuyas, ken nagasang a suka. Nupay kutsilio ken tinidor ti usaren ti dadduma, kadawyan nga iggamanda ti pupusa no kanenda.
Pupusa ti maysa kadagiti nalatak a taraon iti El Salvador
Los Tercios Waterfall, Suchitoto
AMMOM KADI? Naawagan ti El Salvador a daga dagiti bulkan. Adda nasurok a 20 a bulkan ken aktibo pay ti dadduma kadagita. Ti Los Tercios Waterfall ket agdissuor kadagiti innem ti sulina nga arintiddog a batbato a pinataud ti bimtak a bulkan.
Adda nasurok a 38,000 a Saksi ni Jehova iti El Salvador, ken naorganisarda iti agarup 700 a kongregasion. Isursuroda ti Biblia iti agarup 43,000 a tattao iti Spanish, English, ken Salvadoran Sign Language.