LUGLUGAR KEN TATTAO
Panagpasiar Idiay Cambodia
DAGITI tumtumpaw a purok, aduan tattao a tiendaan, kalsada a napno iti motorsiklo a mangibiahe iti nagduduma a banag kas kadagiti sibibiag a manok ken refrigerator ket sumagmamano laeng kadagiti makita iti dadduma a lugar iti Cambodia.
Pagaammo a nasingpet, mannakigayyem, ken napasig dagiti taga-Cambodia. No agtutungtongda, mabalin nga agiinnawagda iti manong, manang, ading, anti, angkel, lola, lolo, wenno apong uray no damoda pay laeng nga agkikita!
Dadduma a taga-Cambodia ti agnanaed kadagiti balay a bangka idinto a ti sabsabali ket kadagiti balay a nangato ti adigina wenno naisaad kadagiti tumtumpaw a plataporma. Adda pay ketdi dagiti tumtumpaw nga eskuelaan, klinika, tiendaan, ken gasolinaan
Adu ti dragon fruit iti Cambodia
Innapuy ti kangrunaan a taraon dagiti taga-Cambodia. Kadawyanna a tallo wenno uppat a putahe ti maidasar a masansan a mapakuyogan iti digo. Paboritoda ti ikan wenno lames. Gagangay nga aggigiddan a maidasar iti pannangan dagiti nasam-it, naalsem, ken naapgad a putahe.
Agarup 2,000 a tawenen ti napalabas, masansan a sumanglad iti Cambodia dagiti taga-India a komersiante ken dadduma pay nga agpa-China tapno isukatda kadagiti rekado, nabanglo a kayo, marfil, ken balitok dagiti lakoda a seda ken metal. Idi agangay, naimpluensiaan dagiti taga-Cambodia iti kultura dagiti taga-India, ken China isu a simmaknap ti Hinduismo ken Budismo. Ita, Budista ti nasurok a 90% kadagiti umili.
Iranranud dagiti taga-Cambodia a Saksi ni Jehova ti namnama a mensahe ti Biblia. Adun ti matultulonganda babaen iti libro nga Ania a Talaga ti Isursuro ti Biblia? Mabasa dayta iti agarup 250 a lengguahe a pakairamanan ti Cambodian.
Nasurok a 1,500 a taga-Cambodia ti makipagad-adal iti Biblia kadagiti Saksi ni Jehova isu a naammuandan dagiti sungbat kadagiti saludsod a kas iti “Sadino ti ayan dagiti natay?” ken “Ania ti panggep ti Dios iti daga?”
Ti libro nga Ania a Talaga ti Isursuro ti Biblia? nga impablaak dagiti Saksi ni Jehova ket mabasa iti Cambodian (makita ditoy).