Panagpasiar Idiay Kazakhstan

GAGANGAY idi kadagiti Kazakh nga awan ti permanente a pagyananda. Ita, adda pay laeng met dagiti Kazakh a mangyakar-akar kadagiti tarakenda nga animal depende iti paniempo. No summer, agyanda iti nangato ken nalamiis a karuotan. Sa sumalogda no um-umayen ti winter.

Dadduma a Kazakh ti aggigian kadagiti moderno ken narang-ay a siudad. Ngem iti adu a tradision, makan, ken produktoda, makita latta ti panagbiag dagiti kapuonanda. Nabaknang dagiti Kazakh kadagiti natawidda a daniw, kanta, ken musika a mapatpatokar babaen kadagiti bukod nga instrumento dagiti lumugar.

Ti yurt—maysa a tradisional a mayakar-akar a balay—ket nagbalin a simbolo ti panangipakita iti respeto iti nakaparsuaan. Ti yurt latta ti kaykayat dagiti pastor a pagyanan, ken masansan nga usaren dayta dagiti taga-siudad a Kazakh kadagiti espesial nga okasion. Agserbi pay dayta a komportable a pagdagusan dagiti turista. Makita met iti uneg ti yurt ti kinalaing dagiti babbai a Kazakh nga agborda, agabel (weave), ken agaramid iti karpet.

Ipatpateg unay dagiti taga-away dagiti kabalioda. Adda di kumurang a 21 a Kazakh a sao para iti kabalio ken nagduduma ti kaipapanan dagita. Ken adda met nasurok a 30 a sasao a mangiladawan iti kolor dagiti kabalio. Ti nasayaat ti kalidadna a kabalio ket maibilang latta a nabalor ken maipatpateg a regalo. Iti aw-away, nasapa nga agsursuro dagiti ubbing a lallaki nga agkabalio.

Kanayon nga adda maidasar a karne iti tradisional a pannangan dagiti Kazakh ken masansan a saan a nagasang. Maysa ti koumiss kadagiti paboritoda nga inumen, a naaramid iti gatas ti kabalio ken naikuna nga adu ti pagsayaatanna iti salun-at. Paboritoda pay ti shubat a medio naalsem a mainum a naaramid iti gatas ti kamelio.

Ti branch office dagiti Saksi ni Jehova idiay Almaty ket umaw-awat kadagiti bisita ken nakalukat para iti tour.