Panglaglagip (Pangrabii ti Apo)

Aniat’ kaipapanan ti Panglaglagip?

Kinuna ni Jesus kadagidiay matalek nga apostolna: “Aramidenyo daytoy a panglaglagip kaniak.” (Luc. 22:19) Idi nagsurat kadagiti kameng ti napulotan iti espiritu a Nakristianuan a kongregasion, innayon ni apostol Pablo: “No masansan a kanenyo daytoy a tinapay ken uminumkayo itoy a kopa, iwarwaragawagyo ti ipapatay ti Apo, agingga ti yaayna.” (1 Cor. 11:26) No kasta, ti Panglaglagip iturongna ti naisangsangayan nga atension iti kaipapanan ti ipapatay ni Jesu-Kristo kas nainaig iti pannakarisut ti panggep ni Jehova. Itampokna ti kayulogan ti ipapatay a daton ni Jesus nangnangruna iti pannakainaigna iti baro a tulag ken iti wagas a ti ipapatayna apektaranna dagidiay agbalinto a makipagtawid kenkuana iti nailangitan a Pagarian.—Juan 14:2, 3; Heb. 9:15.

Ti Panglaglagip maysa met a mangipabigbig a ti ipapatay ni Jesus ken ti pannakapasamak daytoy, kas maitunos iti panggep ti Dios a naiyebkas idiay Genesis 3:15 ken kalpasan dayta, nagserbi a mangalangon iti nagan ni Jehova. Babaen ti panangtaginayonna iti kinatarnawna ken Jehova agingga ken patay, pinaneknekan ni Jesus a ti basol ni Adan saan a gapu iti aniaman a kamali no iti panangdisenio ti Namarsua iti tao no di ket posible a ti tao taginayonenna ti perpekto a nadiosan a debosion uray no iti sidong ti nakaro a rigat, ket iti kasta inalangon ni Jesus ni Jehova a Dios bilang Namarsua ken Sapasap a Soberano. Malaksid iti dayta, pinanggep ni Jehova a ti ipapatay ni Jesus ipaayna ti perpekto a natauan a daton a kasapulan tapno masubbot dagiti kaputotan ni Adan, ket iti kasta posible a dagiti binilion a mangalagad iti pammati ket agbiagda nga agnanayon iti paraiso a daga, kas kaitungpalan ti orihinal a panggep ni Jehova ken kas ebkas ti dakkel nga ayatna para iti sangatauan.—Juan 3:16; Gen. 1:28.

Anian a nagdagsen nga awit ti naipabaklay ken Jesus idi maudi a rabiina ditoy daga a kas tao! Pagaammona ti pinanggep ti nailangitan nga Amana para kenkuana, ngem pagaammona met a masapul a paneknekanna ti kinamatalekna no isu ket masubok. No isu ket di nagballigi, anian a pannakaibabain koma ni Amana ken anian a pannakalugi koma ti sangatauan! Gaput’ kinawadwad ti maibanag dayta nga ipapatayna, maikanatad unay nga imbilin ni Jesus ti pannakalaglagipna.

Aniat’ kaipapanan ti tinapay ken ti arak a maidiaya kabayatan ti Panglaglagip?

No maipapan iti di nalebaduraan a tinapay nga inted ni Jesus kadagiti apostolna idi inyusuatna ti Panglaglagip, kinunana: “Daytoy kaipapananna ti bagik.” (Mar. 14:22) Daydi a tinapay insimbolona ti mismo nga awan basolna a silalasag a bagina. Daytoy ti intedna agpaay iti namnama ti masanguanan a biag ti sangatauan, ket iti daytoy nga okasion maiturong ti naisangsangayan nga atension kadagiti namnama ti panagbiag a posible para kadagidiay mapili a makiraman ken Jesus idiay nailangitan a Pagarian.

Idi impasana ti arak kadagidiay matalek nga apostol, kinuna ni Jesus: “Daytoy kaipapananna ti ‘darak iti tulag,’ isu a maibukbok a maipaay kadagiti adu.” (Mar. 14:24) Dayta nga arak insimbolona ti mismo a dara ti biagna. Babaen iti naiparukpok a dara posible ti pannakapakawan ti basbasol dagidiay mamati iti dayta. Iti daytoy nga okasion itamtampok ni Jesus ti pannakadalus manipud basol a posible para kadagidiay kandidato a kakaduana nga agtawid. Ti sasaona impasimudaagna a babaen iti dayta a dara agandaren ti baro a tulag iti nagbaetan ni Jehova a Dios ken iti daydiay napulotan iti espiritu a Nakristianuan a kongregasion.

Kitaenyo met ti panid 237-239, iti sidong ti paulo a “Misa.”

Siasinoda ti makiraman iti tinapay ken iti arak?

Siasinoda ti nakiraman idi inyusuat ni Jesus ti Pangrabii ti Apo di mabayag kasakbayan ti ipapatayna? Dagiti sangapulo ket maysa a matalek a pasurotna a nagkunaan ni Jesus: “Makitulagak kadakayo, a kas pannakitulag ni Amak kaniak, a maipaay iti maysa a pagarian.” (Luc. 22:29) Isuda amin ket maaw-awisda idi a makiraman ken Kristo idiay nailangitan a Pagarian. (Juan 14:2, 3) Amin a makiraman iti tinapay ken iti arak itatta masapul a dagidiay iyeg ni Kristo iti dayta a ‘tulag a maipaay iti pagarian.’

Manoda dagidiay makiraman? Kinuna ni Jesus a “bassit nga ipastoran” laeng ti umawat iti nailangitan a Pagarian bilang gunggonada. (Luc. 12:32) Ti intero a dagup isut’ 144,000. (Apoc. 14:1-3) Dayta a grupo nangrugi a napili idi 33 K.P. Kaawatan, a bassit laengen ti dagup dagidiay makiramraman ita.

Ipasimudaag kadi ti Juan 6:53, 54 a dagidiay laeng makiraman ti makagun-od ti agnanayon a biag?

Juan 6:53, 54: “Ni Jesus kinunana kadakuada: ‘Pudno unay kunak kadakayo, No saankayo a mangan iti lasag ti Anak ti tao ken uminum iti darana, awanankayo a mismo iti biag. Ti mangan iti lasagko ken uminum iti darak adda biagna nga agnanayon, ket isu pagungarekto iti kamaudianan nga aldaw.’”

Daytoy a pannangan ken panaginum nabatad a simboliko ti pannakaaramidna; ta no saan salsalungasingenton ti maysa ti linteg ti Dios. (Gen. 9:4; Ara. 15:28, 29) Nupay kasta, laglagipenyo koma a ti sinaon Jesus idiay Juan 6:53, 54 saan a nainaig iti inagurasion ti Pangrabii ti Apo. Awan iti panunot dagiti nakangngeg kenkuanat’ maipapan iti tinapay ken arak a nausar a mangirepresenta iti lasag ken dara ni Jesus. Sa la naiyusuat dayta agarup nakatawen kalpasanna, ket ti report ni apostol Juan maipapan iti Pangrabii ti Apo inlanadna nasurok a pito a kapitulo kalpasanna (idiay Juan 14) iti Ebanghelio a nainagan kenkuana.

Kasano, ngarud, a ti maysa “mangan iti lasag ti Anak ti tao ken uminum iti darana” iti piguratibo a wagas no saan met a makiraman iti tinapay ken arak no Memorial? Paliiwenyo ta kinuna ni Jesus a dagidiay mangan ken uminum ket maaddaandat’ “biag nga agnanayon.” Idiay bersikulo 40 sakbay dayta, idi inlawlawagna ti aramidenda tapno maaddaandat’ biag nga agnanayon, aniat’ imbagana a pagayatan ni Amana? A “tunggal maysa a makakita iti Anak ket alagadenna ti pammati kenkuana adda koma ti biagna nga agnanayon.” Nainkalintegan, no kasta, a ti ‘pannangan iti lasagna ken pananginum iti darana’ iti piguratibo a wagas maaramid babaen iti panangalagad iti pammati iti subbot a bileg ti lasag ken dara ni Jesus nga isut’ indatonna. Daytoy a panangalagad iti pammati makalikaguman kadagiti amin a gumun-od iti naan-anay a biag, para langitda man a kadua ni Kristo wenno para iti naindagaan a Paraiso.

Kasanot’ kasansan ti pannakarambak ti Panglaglagip, ken kaano?

Saan nga impiho ni Jesus no kasanot’ kasansan ti pannakarambakna dayta. Basta kinunana: “Aramidenyo daytoy a panglaglagip kaniak.” (Luc. 22:19) Kuna ni Pablo: “No masansan a kanenyo daytoy a tinapay ken uminumkayo itoy a kopa, iwarwaragawagyo ti ipapatay ti Apo, agingga ti yaayna.” (1 Cor. 11:26) Ti “masansan” dina kaipapanan a mamin-adu iti makatawen; mabalin a tinawen dayta bayat ti adu a tawtawen. No rambakanyo ti nasken a pasamak, a kas iti anibersario ti kasar, wenno no ti maysa a nasion rambakanna ti nasken a pasamak iti historiana, kasanot’ kasansanna? Maminsan iti makatawen iti daydiay petsa ti anibersariona. Maiyataday met daytoy iti kinapudno a ti Pangrabii ti Apo ket naiyusuat iti petsa ti Paskua dagiti Judio, maysa a tinawen a selebrasion a saanen a masapul pay a salimetmetan dagiti Judio a nagbalin a Kristiano.

Dagiti Saksi ni Jehova rambakanda ti Panglaglagip kalpasan ti ilelennek ti init ti Nisan 14, sigun ti panagbilang ti kalendario dagiti Judio idi immuna a siglo. Ti aldaw dagiti Judio nangrugi no lumnek ti init ket agtultuloy dayta agingga iti sumuno nga ilelennek ti init. Gapuna natay ni Jesus iti daydi met la nga aldaw sigun iti kalendario dagiti Judio nga inyusuatna ti Panglaglagip. Ti rugi ti bulan ti Nisan isu daydiay ilelennek ti init wenno asideg unay iti tiempo a ti baro a bulan a dumenna unay iti spring equinox ket agparang idiay Jerusalem. (Gapuna ti petsa ti Memorial wenno Panglaglagip mabalin a dida aggiddan iti Paskua a salsalimetmetan dagiti moderno a Judio. Apay a saan? Ti irurugi dagiti bulan ti kalendarioda ket maigiddan iti astronomikal a baro a bulan, saan ket nga iti agparang a baro a bulan idiay Jerusalem, a mabalin a 18 aginggat’ 30 nga oras ti ladladawanna. Kasta met, kaaduan a Judio itatta ket salsalimetmetanda ti Paskua iti Nisan 15, saan nga iti maika-14 a kas inaramid idi ni Jesus nga isut’ maitunos iti nailanad idiay Linteg Mosaiko.)