Ti Dios Linagipna ti Anakna

NAGSANGIT ni Jesus idi natay ni Lazaro a gayyemna. Panagkunam naladingitan ngata ni Jehova idi nagsagaba ken natay ni Jesus?— Kuna ti Biblia a mabalin a ‘masaktan ti rikna’ ti Dios babaen kadagiti banag a mapasamak.​​—Salmo 78:​40, 41; Juan 11:35.

Mapanunotmo kadi ti saem a narikna ni Jehova idi kitkitaenna ti ipapatay ti patpatgenna nga Anak?— Masigurado idi ni Jesus a silalagipto kenkuana ti Dios. Dayta ti gapuna a kastoy ti naudi nga imbagana sakbay ti ipapatayna: “Ama, kadagita imam italekko ti [biagko].”​​—Lucas 23:46.

Masigurado ni Jesus a mapagungarto, a saanto a mabaybay-an “iti impierno,” wenno ti tanem. Kalpasan ti pannakapagungar ni Jesus, inadaw ni apostol Pedro ti nadakamat iti Biblia maipapan ken Jesus, a kunkunana: “Saan a nabaybay-an ti kararuana iti impierno, ket saan met a nakita ti lasagna ti panagrupsa.” (Aramid 2:​31, King James Version; Salmo 16:10) Saan a pulos a nabaybay-an ti bagi ni Jesus nga agrupsa iti tanem, kayatna a sawen, saan a naglungsot ken bimmangsit.

Idi adda ni Jesus ditoy daga, imbagana pay ketdi kadagiti adalanna a saan unay a mabayag ti ipapatayna. Inlawlawagna kadakuada a ‘mapapatayto, ket iti maikatlo nga aldaw maibangonto.’ (Lucas 9:22) No kasta, saan a rumbeng a masdaaw dagiti adalan idi agungar ni Jesus. Ngem nasdaawda kadi?— Kitaenta.

Agarup alas tres ti malem ti Biernes idi matay ti Naindaklan a Mannursuro iti kayo a pagtutuokan. Ni Jose, a nabaknang a miembro ti Sanhedrin, ket maysa met a nalimed a manamati ken Jesus. Idi naammuanna a natayen ni Jesus, napan iti Romano a gobernador a ni Pilato. Kiniddawna no mabalinna nga alaen ti bangkay ni Jesus iti nakailansaanna tapno ipumponna. Kalpasanna, innala ni Jose ti bangkay ni Jesus ket impanna iti maysa a hardin nga ayan ti tanem a pakaipumponan dagiti natay.

Idi maiserrekdan ti bangkay iti tanem, intulidda ti dakkel a bato iti ngarabna. Iti kasta, naserraanen ti tanem. Dimtengen ti maikatlo nga aldaw, wenno Domingo. Saan pay a simmingising ti init, isu a nasipnget pay laeng. Adda lallaki sadiay a mangbambantay iti tanem. Dagiti panguluen a papadi ti nangibaon kadakuada nga agbantay. Ammom kadi no apay?—

Naammuan met dagiti papadi a kinuna ni Jesus a mapagungarto. Gapuna, tapno di matakaw dagiti adalanna ti bangkayna sadanto kunaen a nagungaren ni Jesus, nangibaon dagiti papadi kadagiti guardia. Pagammuan ta nagginggined iti napigsa. Iti kasipngetan, adda rumimrimat a lawag. Anghel ni Jehova dayta! Nakigtot unay dagiti soldado isu a saandan a nakagunay. Immasideg ti anghel iti tanem ket intulidna ti nakaserra a bato. Awan nagyannan ti tanem!

Wen, maitunos dayta iti kinuna ni apostol Pedro idi agangay: “Daytoy a Jesus pinagungar ti Dios.” (Aramid 2:32) Ti Dios pinagungarna ni Jesus ket inikkanna iti bagi a kaasping ti dati a bagi ni Jesus sakbay nga immay ditoy daga. Idi napagungar, naaddaan iti espiritu a bagi a kas iti bagi dagiti anghel. (1 Pedro 3:18) Isu a tapno makita dagiti tattao, masapul nga agparang ni Jesus kas tao a naglasag. Kasta kadi ti inaramidna?— Kitaenta.

Sumingsingisingen ti init. Nakapanawen dagiti soldado. Mapmapanen ni Maria Magdalena ken dagiti dadduma pay a babbai nga adalan ni Jesus iti nakaitanemanna. Kastoy ti pagsasaritaanda: ‘Asino ti tumulong kadatayo a mangitulid iti daydiay nagdagsen a bato?’ (Marcos 16:3) Ngem idi makaasidegda iti tanem, naituliden ti bato. Ket awanen ti nagyan ti tanem! Awanen sadiay ti bangkay ni Jesus! Dagus a timmaray ni Maria Magdalena tapno birokenna ti dadduma kadagiti apostol ni Jesus.

Nagbati ti dadduma a babbai iti tanem. Pampanunotenda: ‘Sadino ngata ti ayan ti bangkay ni Jesus?’ Pagammuan ta nagparang ti dua a lallaki a makasisirap ti pagan-anayda. Anghel dagita! Kunada kadagiti babbai: ‘Apay a birbirokenyo ditoy ni Jesus? Napagungaren. Mapankayo a dagus ket ibagayo kadagiti adalanna.’ Panunotem no kasano ti kapartak ti panagtaray dagidiay a babbai! Adda lalaki a nangsabat kadakuada iti dalan. Ammom kadi no siasino?—

Ni Jesus, a naglasag kas tao! Kunana met kadagiti babbai: ‘Mapankayo ket ibagayo kadagiti adalak.’ Maragragsakan dagiti babbai. Nasarakanda dagiti adalan ket imbagada kadakuada: ‘Sibibiag ni Jesus! Nakitami!’ Naibagan ni Maria kada Pedro ken Juan nga awanen ti nagyan ti tanem. Ita, sinarungkaranda dayta, kas makitam ditoy. Kinitada dagiti lienso a lupot a pinangbalkotda ken Jesus, ngem dida ammo no ania a talaga ti napasamak. Kayatda a patien a nagungaren ni Jesus, ngem kasla di nakappapati.

Idi mumalemen iti dayta a Domingo, nagparang ni Jesus iti dua kadagiti adalanna a magmagna iti dalan nga agturong iti purok ti Emmaus. Nakipagna ni Jesus ken nakisarsarita kadakuada, ngem dida nailasin gapu ta sabali a bagi ti inusarna. Nabigbigda laeng nga isu ni Jesus idi nakipangan kadakuada ken nagkararag. Napalalo ti ragsak dagiti adalan isu a nagdardarasda a nagsubli idiay Jerusalem uray adu a kilometro ti kaadayona! Nalabit di nagbayag kalpasan daytoy a nagparang ni Jesus ken Pedro tapno makitana a nagungaren.

Kalpasanna, iti dayta a rabii ti Domingo, nagtataripnong ti adu nga adalan iti maysa a siled. Nakatrangka dagiti ridaw. Pagammuan ta addan ni Jesus iti ayanda! Ita, ammodan a nagungar a talaga ti Naindaklan a Mannursuro. Anian a ragsakda!​​—Mateo 28:​1-​15; Lucas 24:​1-​49; Juan 19:38–20:21.

Iti las-ud ti 40 nga aldaw, nagparang ni Jesus iti nadumaduma a bagi tapno ipakitana kadagiti adalanna a nagungaren. Kalpasanna, pimmanawen ditoy daga sa nagsubli ken ni Amana idiay langit. (Aramid 1:​9-​11) Di nagbayag, rinugianen dagiti adalan nga ipakaammo kadagiti isuamin a ti Dios pinagungarna ni Jesus. Uray idi kinabkabil ida dagiti papadi ken pinapatayda ti dadduma kadakuada, intultuloyda ti nangasaba. Ammoda a no matayda, lagipen ida ti Dios a kas ti pananglagipna iti Anakna.

Anian a naiduma dagidiay a pasurot ni Jesus idi un-unana no idilig iti adu a tattao itatta! Dagitoy a tattao pampanunotenda laeng dagiti koneho ken dagiti nakoloran nga itlog iti Easter no dumteng ti petsa a pannakapagungar ni Jesus. Ngem awan ti dinakamat ti Biblia maipapan kadagiti koneho ken itlog iti Easter. Ti isursurona ket maipapan iti panagserbi iti Dios.

Matuladtayo dagiti adalan ni Jesus babaen ti panangibagatayo kadagiti tattao a nangaramid ti Dios iti nakaskasdaaw a banag idi pinagungarna ti Anakna. Ditay koma pulos agbuteng uray kunaen dagiti tattao a papatayendatayo. No kas pagarigan ta mataytayo, lagipen ken pagungarennatayto ni Jehova, a kas ti inaramidna ken Jesus.

Ditay kadi maragsakan a makaammo a silalagip ti Dios kadagidiay agserserbi kenkuana ken pagungarennanto pay ida?— Yantangay ammotayo dagitoy matignaytayo koma nga agtarigagay a mangammo no kasanotayo a maparagsak ti Dios. Ammom kadi a talaga a mabalintayo a paragsaken ti Dios?— Daytoy ti sumaruno a pagsaritaanta.