PAKAUNA

Sadino ti Pakasarakak iti Kasayaatan a Balakad?

Para Kadagiti Babbai

Kanayonmo a pampanunoten ti nataer a baro a nabiit pay iti klaseyo. ‘Dinak met am-ammo, isu nga ania koma ti dakesna no agar-arapaapak iti maipapan kenkuana?’ kunam iti bagim. Maysa pay, saan laeng met a sika ti kasta. Amin a babbai ket agkursonada iti daytoy a baro. Ammom dayta ta mangmangngegmo ti dadduma a babbai nga agsasarita maipapan kenkuana.

Idi kuan nagsabet dagiti matayo. Saanmo a ninamnama ti makakayaw nga isemna. Inisemam met. Umasideg kenkan.

“Mabalin ti makiam-ammo? Siak ni Brett,” arimbainen a kinunana.

“Kabbaroka ditoy ania?” kinunam kalpasan nga imbagam ti naganmo.

“Sumagmamano pay la a lawas sipud idi immakar ti pamiliami ditoy.”

Dika latta makappapati a makisarsarita kenka ni Brett!

“Adda padaya idiay balaymi inton malpas ti klase ita nga aldaw. Kayatmo ti umay?” inyawis ni Brett.

Kalpasanna, medio inyasidegna ti ulona sa kimmidday.

“Dika agdanag ta awan dagiti dadakkelko,” kinunana. “Ken saan a nakakandado ti estante ti arak. Ania ti makunam?”

Ur-urayen ni Brett ti sungbatmo. Dagus la ketdi a wen ti isungbat ti uray siasino a babai iti eskuelaanyo!

Ania ngay ti ibagam?

Para Kadagiti Lallaki

Umas-asideg ti dua kadagiti kaklasem. Madanaganka ta naminduadakan iti daytoy a lawas a pinilit nga agsigarilio. Maikatlo no kua daytoyen.

Kuna ti umuna a lalaki: “Agmaymaysaka manen? Agurayka man ta iyam-ammoka iti maysa a gayyem.” Inkid- dayna ti panangibagana iti “gayyem” bayat a kakautenna ti bulsana sa adda inyawatna kenka.

Nakitam a kasla sigarilio ti ig-iggamanna. Ammomon no ania ti kaipapanan dayta, ket ad-addan ti danagmo.

“Dispensarendak,” kinunam. “Imbagak metten kadakayo a saanak nga . . .”

Insampitaw ti maikadua a lalaki: “Gapu manen ngatan iti relihionmo, ania? Maiparit met la aminen!”

“Amangan met no takrotka laeng,” inkantiaw ti umuna a lalaki.

“Saanak a takrot!” situtured a kinunam.

Idi kuan sinallabaynaka ti maikadua a lalaki. “Alaem ketdin,” kinunana a siaalumamay.

Ti umuna a lalaki inyasidegna iti rupam ti puraw a banag sana inyarasaas “Saanminto nga ibagbaga. Awan ti uray siasino a makaammo.”

Ania ti aramidem?

DAGITI umasping a kasasaad ket inaldaw a mapaspasamak iti dandani amin a paset ti lubong. Ngem iti kinapudnona, saan nga amin nga agtutubo ket nakasagana a mangsango kadagiti kasta a situasion. No pilitenda nga agsigarilio, mabalin a panunoten ti maysa nga agtutubo a lalaki: ‘Diak kayat ti tumulok ngem saankon a maibturan ti panangpilpilitda kaniak. Apay a diak ipakita kadagiti kaeskuelak a “normalak” met?’ Wenno no maawis a makideyt ti maysa a balasang, nalabit kunana iti bagina: ‘Natakneng met ti panaglanglangana. Uray maminsan laeng​—ita laeng​—apay koma a diak umanamong?’

Iti kasumbangirna, adu nga agtutubo ti nasanay a sititibker a mangitakder iti pammatida. Kas resultana​—nupay kasla karkarna​—basbassit ti panangpilit kadakuada nga agaramid iti dakes. Kayatmo kadi ti agbalin a kasta a kita ti agtutubo? Makaparagsak ta posible dayta! Kasano?

Matulongannaka ti Biblia a maaddaan iti kompiansa a mangsango kadagiti karit iti kinaagtutubo. Linaonna dagiti kasasayaatan a balakad gapu ta daytoy ket naipaltiing a Sao ti Dios. (2 Timoteo 3:16, 17) Ania a kita dagiti parikut ti pakatulongan ti Biblia kenka? Kitaem ti listaan iti baba, ket markaam iti ✔ ti abay ti topiko a makapainteres kenka.

□ Pannakilangen iti saanko a kasekso

□ Panangammo ken panangakseptar kadagiti panagbalbaliw iti bagik

□ Pannakigayyem

□ Naballigi a panageskuela

□ Panangbadyet iti kuartak

□ Pannakilangen kadagiti dadakkelko

□ Panangkontrol iti rikriknak

□ Panangikeddeng no ania a kita ti paglinglingayan ti mabalin kaniak

□ Panangparang-ay iti espiritualidadko

Kas makitam iti panid 4 ken 5, dagiti tema a nailista iti ngato ket katupag dagiti siam a benneg daytoy a libro. Ania dagiti minarkaam? Nalabit kayatmo nga iyun-una a basaen dagita a benneg. Makatulong kenka dagiti prinsipio ti Biblia iti tunggal aspeto ti biag. Ipakita daytoy a libro a basbasaem no kasano.a

Ikkannaka met daytoy a libro iti gundaway a mangipeksa iti kapanunotam. Kas pagarigan, iti ngudo ti tunggal kapitulo, makitam ti kahon a napauluan iti “Dagiti Aramidek!” Dita nga isuratmo dagiti kapanunotam no kasanom nga iyaplikar dagiti nabasam. Dagiti worksheet wenno panid a nairanta a tumulong kenka a mangusig iti espesipiko a tema​—kas koma ti “Dagiti Aramidek no Pilitendak Dagiti Kapatadak” iti panid 132 ken 133​—tulongandaka a mangusig kadagiti karit a sangsanguem. Tulongandaka pay a mangaramid kadagiti praktikal a solusion. Kanayonanna, tunggal benneg daytoy a libro ket agngudo iti panid a napauluan iti “Ti Notak.” Ditoymo nga isurat no kasano nga agaplikar iti biagmo ti partikular nga aspeto ti material. Masarakam met iti nadumaduma a paset ti libro dagiti siam a panid a napauluan iti “Nasayaat nga Ulidan.” Kadagitoy a naitampok dagiti nadumaduma a karakter iti Biblia a maikari a tuladen.

Idagadag ti Biblia: “Gun-odem ti sirib, gun-odem ti pannakaawat.” (Proverbio 4:5) Saan la a basta pannakaammo iti naimbag ken dakes ti kaipapanan dagiti sasao a “sirib” ken “pannakaawat.” Masapul a nalawa ti panangmatmatmo. Kas pagarigan, no ammom dagiti pagbanagan ti dakes nga aramid kasta met dagiti gunggona iti panagaramid iti naimbag, agbalinka a natibker ken natured a mangsaranget iti panangpilit dagiti kapatadam.

Nupay iti panagriknam ket kaska la malapunos kadagiti parikutmo, laglagipem a saan la a sika ti kasta. Napasaran ken napagballigian ti dadduma dagiti karit a kas kadagiti pakaipaspasanguam. Mapagballigiam met dagita! Aprobetsarem ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 2. Makombinsirkanto nga adda iti Biblia ti kasayaatan a balakad!

[Footnote]