Nasayaat nga Ulidan​—Ni Lidia

Uray no kabbaro pay laeng nga adalan, nagdisnudo ni Lidia a nangsangaili kada Pablo ken dagiti kakaduana. (Aramid 16:14, 15) Kas resultana, isu ket naaddaan iti pribilehio a makilangen kadagitoy nga adalan. Idi nawayawayaan da Pablo ken Silas manipud iti pagbaludan, sadino ti napananda? Nagsublida a dagus iti pagtaengan ni Lidia!​—Aramid 16:40.

Kas ken Lidia, makapagdisnudoka kadi a mangam-ammo kadagiti sabsabali. Kasanom nga aramiden dayta? Mangrugika iti bassit nga addang. Ikagumaam ti makisarita iti saggaysa laeng a tao. Mabalinmo nga aramiden a kalat ti makisarita iti maysa a tao tunggal tumabunoka iti gimong ti kongregasion. Sursuruem ti umisem. No saanmo nga ammo ti ibagam, agsaludsodka wenno mangibagaka iti sumagmamano a banag maipapan iti bagim. Dumngegka a naimbag. Inton agangay, lumaingkanton a makisarita. Masansan a magustuan dagiti tattao ti napasnek a sasao a nadungngo ken makaay-ayo. (Proverbio 16:24) Naaddaan ni Lidia kadagiti nasayaat a gagayyem gapu ta mannakigayyem ken managpadagus. Maaddaanka met iti nasayaat a gagayyem no tuladem ti ulidanna!