Nasayaat nga Ulidan—Ti Napanglaw a Balo a Babai
Buybuyaen ni Jesus dagiti nabaknang a mangipispisok kadagiti kontribusionda iti baul ti gameng iti templo. Iti bunggoy, napaliiwna ti maysa a marigrigat a balo a babai a nangipisok iti “dua a babassit a sinsilio a bassit unay ti pategna.” (Lucas 21:2) Inapresiar ni Jesus ti kinamanagparabur ti babai. Apay? Agsipud ta dagiti dadduma “nangipisokda manipud kadagiti teddada, ngem isu, manipud iti panagkasapulanna, impisokna ti isuamin nga adda kenkuana, ti intero a pagbiagna.”—Marcos 12:44.
Dagiti kadi prioridadmo ket kas iti prioridad daytoy a babai? Situtulokka kadi a mangusar iti tiempo ken kuartam iti panagserbim iti Dios? Kas iti marigrigat a balo, mabalinmo ti mangted iti donasion para iti pannakamantener dagiti lugar a pagdaydayawan. Mabalinmo met nga usaren ti tiempo ken kuartam a tumulong kadagiti sabsabali nga agsursuro iti maipapan ken Jehova a Dios. Nakita ken inapresiar ni Jehova ti bassit a kantidad nga impaay ti balo a babai kas pangsuporta iti trabaho ti Apo. Apresiaren ken tulongannaka met ti Dios no ipangpangrunam ti panangaramid iti pagayatanna.—Mateo 6:33.