Aramidem Kadi ti Pagayatan ni Jehova?

Pagyamanan iti panangbasam iti daytoy a broshur tapno maam-ammom dagiti Saksi ni Jehova, maammuam dagiti aktibidadmi, ken makitam ti panagandar ti organisasionmi. Sapay koma ta nakatulong daytoy kenka a mangilasin no siasino ita ti mangar-aramid iti pagayatan ni Jehova. Iparegtami nga itultuloymo nga ammuen ti ad-adu pay maipapan iti Dios, ibagam iti amin a kapamiliam ken gagayyemmo dagiti nasursurom, ken regular a makikaduaka kadakami kadagiti Nakristianuan a gimongmi.​—Hebreo 10:23-25.

No ad-adu ti maammuam maipapan ken Jehova, ad-adda a makitam ti kasta unay a panagayatna kenka. Matignaykanto a mangaramid iti amin a kabaelam a mangipakita met iti ayatmo kenkuana. (1 Juan 4:8-10, 19) Ngem kasanom a maipakita nga ay-ayatem ti Dios iti inaldaw a panagbiagmo? Apay a pagsayaatam no tungpalem dagiti moral a pagalagadanna? Ken ania ti makatulong tapno kayatmo ti makikadua kadakami a mangaramid iti pagayatan ti Dios? Maragsakan ti mangyad-adal kenka iti Biblia a tumulong kenka a mangammo kadagiti sungbat tapno sika ken ti pamiliam ket ‘agtalinaed iti ayat ti Dios, . . . a mangiturong iti agnanayon a biag.’​—Judas 21.

Naimpusuan a paregtaendaka nga itultuloymo ti rumang-ay iti dalan ti kinapudno babaen ti panangadalmo iti No Kasano ti Agtalinaed iti Ayat ti Dios.