ANTILOP

[Heb., di·shonʹ].

Agngatingat nga animal ken agpisi ti kukona, a ti kakaisuna a nakadakamatanna ket iti Deuteronomio 14:5, a sadiay nairaman iti listaan dagiti animal a naipalubos a pagtaraon dagiti Israelita. Di masigurado no ania nga animal ti tuktukoyen ti Hebreo a sao a di·shonʹ.

Ti addax nga antilop (Addax nasomaculatus), nga adda pay laeng kadagiti desierto a rehion ti Amianan nga Africa, masansan a maisingsingasing a katupag ti di·shonʹ iti Hebreo a Kasuratan. Agrukod daytoy nga antilop iti katayag nga agarup 1 m (40 pul.) agingga iti abagana. Dagiti nagukrad, naglengngan a kukona nakaskasdaaw ti panangkabalda iti dayta maipaay iti panagdaliasat kadagiti naruka a kadaratan ti desierto, a sadiay makapagbiag uray awan danum kadagiti napaut unay a tiempo. Dagiti marantiddog a sara daytoy nga animal ket sikkubeng a kas iti tornilio, nga addaan manipud maysa ket kagudua agingga iti gistay tallo a panagtiritir, ken agrukod iti agarup 1 m (40 pul.) iti nagkurbaanna. Malaksid ti tian, ipus, kamaudi a saksaka, ken gargarit iti rupa, a kanayon a puraw, ti maris ti addax nga antilop tumayengteng nga ad-adda no iti panawen ti lam-ek, nga agbaliw manipud maris a panaraten nga agbalin a kimmayumanggi. Ti sabali pay a posibilidad isu ti oryx ti Arabia (Oryx leucoryx), maysa met nga antilop iti desierto.