ARABIANO
Iti Kasuratan, dagiti awag nga Arabo ken Arabiano ket kangrunaanna a maus-usar nga addaan nalawa a kaipapanan a tumukoy iti maysa a tao nga agnanaed iti Arabia, ti nagdakkelan a daga iti daya ken iti abagatan ti Palestina. No dadduma, ti ipasimudaag ti konteksto ken ti pannakausarna ket maysa nga espesipiko a tribu wenno etniko a grupo.—1Ar 10:15; 2Cr 9:14; 21:16.
Semitiko ti adu nga Arabiano a tribu, a nagtaudda ken Sem babaen ken Joctan; Hamitiko ti dadduma, a nagtaudda babaen ken Cus nga anak ni Ham. (Ge 10:6, 7, 26-30) Idi agangay, nagnaed met idiay Arabia ti sumagmamano kadagiti kaputotan ni Abraham babaen kada Agar ken Ketura, kas iti annak ni Ismael, a “nagtabtabernakuloda manipud Havila iti asideg ti Sur, nga adda iti sango ti Egipto, agingga iti Asiria.” (Ge 25:1-4, 12-18) Dagiti putot ni Esau, a nagnaed iti kabambantayan a rehion ti Seir, nagbalinda met a paset ti pangkaaduan a klasipikasion nga Arabiano.—Ge 36:1-43.
Kaaduanna kadagiti Arabiano ket nagallaalla a papastor nga agnanaed kadagiti tolda. (Isa 13:20; Jer 3:2) Negosiante ti dadduma, ket nadakamat ti sumagmamano kas komersiante maipaay iti Tiro. (Eze 27:21) Adu ti pannakilanglangen kadakuada dagiti adipen ti Dios. Arabiano dagiti Midianita a komersiante nga agturturong idi idiay Egipto ken nakailakuan ni Jose, kasta met dagiti Sabeo manipud makin-abagatan nga Arabia a nangrubbuot iti bakbaka ken as-asna ni Job. (Ge 37:28; Job 1:1, 15) Bayat ti 40-tawen a panagdaliasat dagiti Israelita iti let-ang, naaddaanda iti pannakilangen kadagiti Midianita a managdaydayaw ni Baal a nagbanag iti pannakadidigrada (Nu 25:6, 14-18), ket bayat ti panawen ti Uk-ukom, bungbunggoy nga Arabiano a nakasakay iti kamelio ti kanayon a nangrubbuot iti Israel iti pito a tawen, agingga iti nakaro a pannakaabakda iti im-ima ni Ukom Gideon.—Uk 6:1-6; 7:12-25.
Dagiti agtuturay iti Arabiano a pagpagarian nagbayadda ken Ari Solomon iti impuesto. (1Ar 10:15; 2Cr 9:14) Dagiti Arabo nagbayadda ken Jehosafat iti impuesto a 7,700 a kalakian a karnero ken kasta met laeng a kaadu dagiti kalakian a kalding, ngem idi agangay nakialiansada kadagiti Filisteo maibusor ken Jehoram nga anak ken suno ni Jehosafat, a ti kukuada a buybuyot dagiti tulisan pinapatayda ti adu kadagiti annak ni Jehoram. (2Cr 17:11; 21:16; 22:1) Naballigi ti pannakigubat kadakuada ni Ozias bayat ti panagturayna. (2Cr 26:1, 7) Karaman dagiti Arabiano a bumusbusor kadagidiay nangparnuay iti parikut ken Nehemias bayat ti pannakatarimaan manen dagiti pader ti Jerusalem.—Ne 2:19; 4:7, 8; 6:1.
Nupay agakar-akar dagiti Arabo, gagangay nga agwaywayasda, ken masansan a naiputputongda manipud kadawyan nga ar-aramid kadagidi a tiempo, naiturong kadakuada ti padto ken panangukom ti Dios. (Isa 21:13; Jer 25:17-24) Sinigsiglo kalpasanna, mabalin a karaman ti sumagmamano nga Arabiano a nagbalin a kameng ti nagkauna a kongregasion Kristiano idi Pentecostes.—Ara 2:11, 41; kitaenyo ti ARABIA.