BAAL-BERIT

[Makinkukua iti Maysa a Tulag; naminsan, iti Uk 9:46, El-berit, Dios ti Maysa a Tulag].

Ti Baal ti Siquem, a nangrugi a nagdaydayawan dagiti Israelita kalpasan ti ipapatay ni Ukom Gideon. (Uk 8:33) Ti awag a “Baal-berit” mabalin nga ipasimudaagna a daytoy a Baal ket maikunkuna a tartarawidwidanna ti pannakaannurot dagiti tulag.

Adda maysa a kita ti paggamengan a nabatad a nayasibay iti balay wenno templo ni Baal-berit idiay Siquem. (Uk 9:4) Mainaig iti panagburas iti ubas, nalawag a nangangay dagiti Siquemita iti maysa a piesta kas pammadayaw ken Baal-berit, a ti tampok a pasetna isu ti maysa a kita ti pannangan iti sakripisio idiay templo ti diosda. Idiay idi templo ni Baal-berit a napasamak ti pananggutugot ni Gaal nga umalsa dagiti Siquemita maibusor ken Ari Abimelec, bayat a mangmangan, umin-inom, ken ilunlunodda ni Abimelec, nalabit gapu iti impluensia ti arak. (Uk 9:27-29) Idi agangay, idi a dagiti agtagtagikua iti daga iti torre ti Siquem (Migdal-Siquem, AT) agpegpeggad ti biagda gapu ken Abimelec, nagkamangda iti maysa a siled iti baba ti balay ni El-berit (Baal-berit), ngem nagbanag laeng iti ipapatayda iti apuy idi inuram dayta ni Abimelec ken dagiti buyotna.​—Uk 9:46-49.