BET-LEBAOT

[Balay Dagiti Kabaian a Leon].

Maysa a siudad a nailista a karaman kadagiti lugar a naited iti tribu ni Simeon kas naipasngat a siudsiudad iti uneg ti teritoria ti Juda. (Jos 19:1, 6) Nadakamat ti naganna iti nagbaetan ti Hazar-susa ken Saruhen, ket ipatuldo daytoy ti maysa a lugar iti rehion ti Negeb, nalabit iti laud wenno abagatan a laud ti Beer-seba. Iti Josue 15:32, nabatad nga agparang dayta kas Lebaot laeng, idinto ta iti 1 Cronicas 4:31 nasuktan ti Bet-lebaot iti nagan a “Bet-biri.” Mabalin a ti Bet-biri ket nayawag iti dayta met laeng a lugar kalpasan ti pannakaidestiero.​—Kitaenyo ti BET-BIRI.