KIMMAWIT A PANDARAS

Daytoy ti pakaipatarusan ti Hebreo a sao a ma·ʽatsadhʹ, a mangipasimudaag iti maysa a rimienta a naaramat iti panangsukog iti kayo, ken uray pay iti landok. (Jer 10:3; Isa 44:12) Ti ramut a sao a maipagarup a nakaadawan daytoy a Hebreo a termino ket nainaig iti nadumaduma a sasao kadagiti nainaig a lenguahe a kaipapananda ti “agapit,” “magessat.” Gapuna depinaren da Koehler ken Baumgartner ti ma·ʽatsadhʹ kas “kimmawit a pandaras.” (Lexicon in Veteris Testamenti Libros, Leiden, 1958, p. 550) Ti moderno a pandaras ket addaan iti putan, tadem, ken kimmawit a tirad. Nupay kasta, ti dadduma tarusanda ti ma·ʽatsadhʹ a mangipamatmat iti maysa a kita ti wasay, yantangay daytoy ti kaipapananna iti Hebreo iti naud-udi a tiempo. Gapuna, isingasingda a mabalin a tumukoy dayta iti maysa a kita ti pandaras.