ALGARROBA, BUNGA TI

[Gr., ke·raʹti·on].

Iti pangngarig maipapan iti bayanggudaw nga anak, inladawan ni Jesus ti mabisbisin a barito kas agtartarigagay a mangan kadagiti bunga ti algarroba a maipakpakan idi kadagiti baboy. (Lu 15:16) Agtaud dagitoy a bunga kadagiti kayo nga algarroba (Ceratonia siliqua), makaay-ayo a mula a patinayon a berde ti bulongna ken agtubo iti intero a Palestina kasta met iti dadduma pay a lugar ti Mediteraneo. Daytoy a kayo ket dumanon agingga iti katayag a 9 m (30 pie), nga addaan iti babassit a sumilapsilap a bulong nga umarngi iti bulbulong ti presno. Ti ukis dagiti bungana ket nasilap a kasla lalat, purpura-kayumanggi ti marisda, ken nagbakkug a kasla sara ti sukogda, maitunos iti naganda iti Griego (ke·raʹti·on, “bassit a sara”). Agrukod dagita iti kaatiddog a 15 agingga iti 25 cm (6 agingga iti 10 pul.) ken kaakaba nga agarup 2.5 cm (1 pul.). Ket iti unegda, adda sumagmamano a kasla gisantes a bukbukel a pinagsisina ti nasam-it, napigket, ken makan a lasag. Adu ti mangus-usar kadagiti bunga ti algarroba agingga itoy nga aldaw kas taraon maipaay kadagiti kabalio, baka, ken baboy. Ti proseso a panagisulbong (grafting) iti sanga ti algarroba ket naaramat tapno makapataud iti kita ti algarroba a mabalin met a kanen ti tao.