ARABAS

[Heb., ga·zamʹ].

Ti igges a kasasaad dagiti kulibangbang wenno dagiti sanga. Ti Hebreo a sao a ga·zamʹ ket naipagarup a nagtaud iti sao a kaipapananna ti “putden.” Iti nakaad-adu a bilang, dagiti arabas, kas kadagiti dudon, literal a putedputedenda wenno gettegettengenda dagiti bulong ti mulmula, sagtunggal bulong, agingga a gistay nakalbon ti mula iti nalangto a bulbulongna. (Joe 1:4; 2:25; Am 4:9) Iti laksid ti nabayagen a patpatien a ti Hebreo a termino a ga·zamʹ ket tumukoy iti “dudon,” inaramat dagiti managipatarus iti Septuagint ti Griego a sao a kamʹpe, a kaipapananna ti arabas. Kasta met, anamongan da Koehler ken Baumgartner ti panangipatarus iti ga·zamʹ kas arabas. (Lexicon in Veteris Testamenti Libros, Leiden, 1958, p. 178) Kasta ti pannakaipatarusna, iti Joel 1:4; 2:25, iti patarus ni Isaac Leeser ken iti Baro a Lubong a Patarus; “palmerworm” iti King James Version; “mananggetteng” iti An American Translation.

Dagiti arabas ket gistay mulmula laeng ti kanenda. Nakarawrawetda, a ti sumagmamano nga arabas makaibusda iti nalangto a mulmula a mamindua iti mismo a kadagsenda iti maysa nga aldaw. Ngarud, iti dadakkel a bilangda kasta unay ti parnuayenda a dadael iti mulmula.